ភ្នំពេញ៖ ដូចដែលប្រិយមិត្តបានស្គាល់ច្បាស់ហើយ លោក វ៉ាន់ សុខសីហា ហៅហោរ៉ាអាគ្គីនេត ដែលល្បីកាប់មិនមុតដុតមិនឆេះ និងខ្លាំងពូកែទៅរឿងអប្បិយជំនឿផ្សេងៗទៀត តែភ្លាត់ស្នៀតត្រូវជាប់គុកជិត២ឆ្នាំ ទើបចេញបានប៉ុន្មានខែ ដោយសារគ្រឿងញៀន ពេលនេះ បានចូលប៉ុស្តិ៍ប៉ូលិសជាថ្មីម្តងទៀតហើយ ។
បុរសវ័យក្មេងដែលអះអាងថា ខ្លួនជាកូនកាត់៣សាសន៍ (ខ្មែរ ចិន យួន) រូបនេះ សមត្ថកិច្ចជំនាញរបស់ស្នងការដ្ឋាននគរបាលរាជធានីភ្នំពេញ សហការជាមួយ នគរបាលអធិការខណ្ឌទួលគោក បានហៅលោកគ្រូ អគ្គីនេត មកសាកសួរនៅព្រឹកថ្ងៃទី ២ ខែ មេសា ឆ្នាំ ២០២០ នេះ គឺជាប់ពាក់ព័ន្ធទៅនឹងសកម្មភាពផ្សាយធ្វើយ័ន្តការពារវីរុសកូវីដ-១៩ ។
ពិតណាស់ ដោយអះអាងថា មានកូនសិស្សជាច្រើន ឆាតមកសួរនាំអំពីដំណោះស្រាយទល់ទល់នឹងវីរុសកូវីដ-១៩ កាលពីពេលថ្មីៗនេះ គ្រូប៉ោកតាឡិនសាច់សដូចសំឡី មុខស្រដៀងតារាកូរ៉េរូបនេះ បានឡាយវីដេអូបង្ហាញ ពីភាពខ្លាំងរបស់ខ្លួន អាចធ្វើយ័ន្តការពារកូរ៉ូណា និងបកស្រាយពីចំណុចខ្លាំងពូកែៗ នៅក្នុងយ័ន្តរបស់ខ្លួន ក្រោមលក្ខខ័ណ្ឌ “ឡើង View” រង់ចាំមានអ្នកចូលមើលច្រើន ។
ទោះយ៉ាងណា គ្រូរូបនេះបាននិយាយការពារជាមុនថា មិនឲ្យគ្រប់គ្នាជឿដោយគ្មានការពិចារណានោះទេ ដោយយកអប្បិយជំនឿនេះ បូកផ្សំនឹងវិទ្យាសាស្ត្រផង ។ លើសនេះ គ្រូក៏ហ៊ានដាក់ជីវិតទៀតផង ដោយឲ្យអ្នកជាវមកដុតអាសនៈចោល ឬអាចកាប់ក្បាលម្នាក់៣ពូថៅៗ ប្រសិនបើយ័ន្តនេះយកទៅប្រើមិនមានប្រសិទ្ធភាព ចំពោះវីរុសកូវីដ-១៩ ៕ ដោយ៖ លឹម ហុង