ភ្នំពេញ៖ វិស័យទូរគមន៍ និង ICT អ្នកប្រើប្រាស់ទូរស័ព្ទ និងសេវាអ៊ីនធើណិត ចល័ត និងអចល័តនៅទូទាំងប្រទេសមានកំណើនគួរឲ្យគត់សំគាល់។ គិតមកដល់បច្ចុប្បន្ននេះ ចំនួនអ្នកជួលជាវសេវាទូរស័ព្ទចល័តមានចំនួន ២១.៦៧៥.៥២៣ ស៊ីមកាត ស្មើនិង១៤១,៧៨% នៃចំនួនប្រជាជន ទូរស័ព្ទអចល័តមានអ្នកជួលជាវ ចំនួន ៥៧.៤៣៨នាក់ ស្មើនិង ០,៣៧% នៃចំនួនប្រជាជន និងសេវាអ៊ីនធើណិតចល័ត និងអចល័ត មានជួលជាវចំនួន ១៦.៣៥០.៤៦០នាក់ ស្មើនិង ១០៦,៩៤% នៃចំនួនប្រជាជន។ នេះបើយោងតាមប្រសាសន៍របស់ឯកឧត្តម ត្រាំ អ៊ីវតឹក អតីតរដ្ឋមន្ត្រីក្រសួងប្រៃសណីយ៍ និងទូរគមនាគមន៍កម្ពុជា ក្នុងពិធីប្រកាសចូលកាន់តំណែងជាផ្លូវការនៃរដ្ឋមន្ត្រីក្រសួងប្រៃសណីយ៍ និងទូរគមនាគមន៍ថ្មី ដែលឯកឧត្តម ជា វ៉ាន់ដេត ជារដ្ឋមន្ត្រីថ្មី ជំនួសឯកឧត្តម ត្រាំ អ៊ីវតឹក។
ឯកឧត្តម ត្រាំ អ៊ីវតឹក បានបន្ថែមថា ក្រសួងប្រៃសណីយ៍រកចំណូលបាននៅឆ្នាំ ២០១៩ ប្រមាណ ៥៤,៦៨លានដុល្លារ កើនឡើងប្រមាណ ៣៦,៤% នៃចំណូលឆ្នាំ ២០១៨ ដែលមានប្រមាណ ៤០,០៨លានដុល្លារ និងចំណាយឆ្នាំ ២០១៩ ប្រមាណ ២៣,៨ លានដុល្លារ កើនឡើងប្រមាណ ២០% នៃចំណាយឆ្នាំ ២០១៨ ដែលមានប្រមាណ ១៩,៨លានដុល្លារ។ បើតាមឯកឧត្តម ត្រាំ អ៊ីវតឹក ប្រសិទ្ធភាពនៃការប្រើប្រាស់ថវិកាកាន់តែបានលើកកំពស់ និងយកចិត្តទុកដាក់ជម្រុញការទារបំណុល ការប្រមូល និងការគ្រប់គ្រងចំណូល។
បើតាមក្រសួងប្រៃសណីយ៍ និងទូរគមនាគមន៍ ហេដ្ឋារចនាសម្ព័ន្ធទូរគមនាគមន៍កម្ពុជា រួមមានខ្សែកាប្លិ៍ក្រោមបាតសមុទ្រ ត្រូវបានតភ្ជាប់ចំនួន៣ គឺ ១ តភ្ជាប់ទៅប្រទេសម៉ាឡេស៊ី និងថៃ (MCT) ២ ខ្សែកាប្លិ៍ក្រោមបាតសមុទ្រដែលតភ្ជាប់ពីអាស៊ីអាគ្នេយ៍ ទៅអ៊ឺរ៉ុប ដោយឆ្លងកាត់ប្រទេសអេហ្ស៊ីប (AAE-1) និង៣ គម្រោងរបស់ក្រសួងប្រៃសណីយ៍ និងទូរគមនាគមន៍មួយ គឺការតភ្ជាប់ខ្សែកាប្លិ៍អុបទិកក្រោមបាតសមុទ្រត្រង់ទៅហុងកុង ដែលអាចពង្រីកសមត្ថភាព នៃលំហូរទិន្នន័យធំទូលាយ និងល្បឿនលឿនរួមចំណែក ការអភិវឌ្ឍន៍សង្គមសេដ្ឋកិច្ច ធនធានមនុស្ស ការស្រាវជ្រាវ ការធ្វើពាណិជ្ជកម្ម និងសេវារដ្ឋបាលជាដើម។ បណ្តញខ្សែកាបអុបទិកលើគោក បានពង្រីកជាបន្តបន្ទាប់ និងបានតភ្ជាប់ពីរាជធានីភ្នំពេញ ទៅគ្រប់ស្រុកខណ្ឌទូទាំងប្រទេសមានប្រវែងសរុប ៤៣.០០០ Km ៕ ដោយ ៖ សម្ផស្ស