ភ្នំពេញ៖ ឯកឧត្តមឧបនាយករដ្ឋមន្ត្រី ប្រាក់ សុខុន មានប្រសាសន៍ថា ប្រទេសចិនមិនត្រឹមតែអាចគ្រប់គ្រង ការរីករាលដាលនៃជំងឺវីរុសប៉ុណ្ណោះទេ ក៏បានរួមចំណែកយ៉ាងសំខាន់ ក្នុងការប្រយុទ្ធប្រឆាំងនឹងជំងឺវីរុស លើសកលលោក ហើយភាគីចិន នឹងយកឈ្នះនឹងជំងឺវីរុសនាពេលខាងមុខជាមិនខាន។
នៅព្រឹកថ្ងៃទី៣ ខែមេសា ឆ្នាំ២០២០ នៅអគារមិត្តភាពនៃទីស្តីការគណៈរដ្ឋមន្ត្រី ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ និងឯកឧត្តម វ៉ង វិនធាន ឯកអគ្គរដ្ឋទូតវិសាមញ្ញនិងពេញសមត្ថភាព នៃសាធារណរដ្ឋប្រជាមានិតចិនប្រចាំកម្ពុជា បានអញ្ជើញជាអធិបតីក្នុងពិធីប្រគល់-ទទួលជំនួយឧបត្ថម្ភ ក្រោមក្របខ័ណ្ឌសង្គមស៊ីវិល សម្រាប់ការពារសុខភាព ប្រឆាំងជំងឺកូវីដ១៩ របស់មូលនិធិចិនដើម្បីសន្តិភាពនិងការអភិវឌ្ឍ។
ជំនួយដែលផ្តល់ជូនកម្ពុជាតាមរយៈវេទិកាសម្ព័ន្ធសង្គមស៊ីវិលនៅថ្ងៃនេះ មានម៉ាសពេទ្យចំនួន១៥០០.០០០ សន្លឹក ម៉ាសមុខ3D ចំនួន ៥០.០០០ សន្លឹក អាវពេទ្យសម្រាប់ការពារមេរោគចំនួន៧.៩៤០ឈុត និងថ្នាំបុរាណចិនព្យាបាលជំងឺកូវីដ១៩ ចំនួន៨៤០កញ្ចប់ ដែលមានតម្លៃសរុបចំនួន ១.១៣១.៤០០ យ័ន ឬប្រមាណ ១៥៩.១៩២ ដុល្លារអាមេរិក។
ឯកឧត្តម ឯកអគ្គរដ្ឋទូតចិន មានប្រសាសន៍ថា ក្រោយពីមានការផ្ទុះឡើងនូវជំងឺវីរុសកូវីឌ-១៩ ក្នុងប្រទេសចិន ស្ថិតក្រោមការដឹកនាំ និងចាត់ចែងការងារពីឯកឧត្តមប្រធានាធិបតីចិន Xi Jinping រដ្ឋាភិបាលចិន បានចាត់វិធានការទប់ស្កាត់យ៉ាងតឹងរ៉ឹងបំផុត និងគ្រប់ជ្រុងជ្រោយបំផុត បានយកសកម្មភាពជាក់ស្តែងមក បង្ហាញឲ្យឃើញពីទំនួលខុសត្រូវរបស់ប្រទេសមហាអំណាច ដែលប្រកបដោយការបើកចំហ តម្លាភាព និងការទទួលខុសត្រូវ ក៏បានបង្ហាញទៅកាន់បណ្តាប្រទេស លើសកលលោកឲ្យឃើញពីជំនឿចិត្ត និងកម្លាំងកាយក្នុងការយកជម្នះ លើជំងឺវីរុសលើកនេះ។ បច្ចុប្បន្ននេះ ប្រទេសចិនឆ្លងកាត់ការពិសោធន៍នៃជំងឺវីរុស ស្ថានភាពនៃការទប់ស្កាត់នឹងជំងឺវីរុសបានប្រែមកជាភាពល្អប្រសើរ សណ្តាប់ធ្នាប់នៃសង្វាក់ផលិតកម្មជីវភាព បានចាប់ផ្តើមបើកដំណើរការយ៉ាងឆាប់រហ័ស។ ក្នុងអំឡុងពេលចម្បងនៃការទប់ស្កាត់ នឹងជំងឺវីរុសក្នុងប្រទេសកម្ពុជា ក្នុងនាមជាមិត្តដែកថែប ភាគីចិននឹងផ្តល់ជំនួយទប់ស្កាត់នឹងជំងឺវីរុសកូវីដ-១៩ ជូនភាគីកម្ពុជាតាមលទ្ធភាពដែលអាចធ្វើបាន។ នាពេលបន្ទាប់ រដ្ឋាភិបាលចិននឹងបន្តរៀបចំផែនការកម្លាំងរួមគ្នា សម្រាប់ស្ថាប័នរដ្ឋ និងសង្គមស៊ីវិល ដើម្បីផ្តល់ការគាំទ្រ និងការជួយដ៏ចាំបាច់ជូនដល់ភាគីកម្ពុជា។
ក្នុងសុន្ទរកថា របស់ឯកឧត្តមឧបនាយករដ្ឋមន្ត្រី បានបង្ហាញឲ្យឃើញពីការវាយតម្លៃខ្ពស់ នៃសមិទ្ធផលប្រយុទ្ធប្រឆាំងនឹងជំងឺវីរុស ដែលទទួលបានក្នុងប្រទេសចិន លោកមានប្រសាសន៍ថា ប្រទេសចិនមិនត្រឹមតែអាចគ្រប់គ្រង ការរីករាលដាលនៃជំងឺវីរុសប៉ុណ្ណោះទេ ក៏បានរួមចំណែកយ៉ាងសំខាន់ ក្នុងការប្រយុទ្ធប្រឆាំងនឹងជំងឺវីរុសលើសកលលោកផងដែរ។
លោកជឿជាក់យ៉ាងមុតមាំថា ភាគីចិននឹងយកឈ្នះនឹងជំងឺវីរុសនាពេលខាងមុខជាមិនខាន និងចាប់ផ្តើមអភិវឌ្ឍន៍សេដ្ឋកិច្ចជាបន្តបន្ទាប់ ឲ្យមានភាពរីកចម្រើនយ៉ាងឆាប់រហ័ស។ ចាប់តាំងពីជំងឺវីរុសមានការផ្ទុះឡើងក្នុងប្រទេសកម្ពុជាមក ភាគីចិនបានឈរជាមួយភាគីកម្ពុជា មានអារម្មណ៍ដូចគ្នាជាមួយនឹងកម្ពុជា ក៏បានចាត់បញ្ជូលក្រុមអ្នកជំនាញវេជ្ជសាស្ត្រចិន និងផ្តល់ជំនួយជាសម្ភារៈវេជ្ជសាស្ត្រមកកាន់ប្រទេសកម្ពុជាយ៉ាងទាន់ពេលវេលា នេះបានបង្ហាញឲ្យឃើញពីមនោសញ្ចេតនាបងប្អូន ដែលតែងយកអាសាគ្នា ជួយគ្នាទៅវិញទៅមក រួមសុខរួមទុក្ខជាមួយគ្នា។ ភាគីកម្ពុជានឹងចងចាំក្នុងក្រអៅបេះដូងជារៀងរហូត។ ហើយកម្ពុជានឹងបន្តពង្រឹងកិច្ចសហប្រតិបត្តិការជាមួយនឹងភាគីចិន និងពួតដៃគ្នាយកជម្នះលើជំងឺវីរុសឲ្យបាន៕ដោយ៖កូឡាប
