ភ្នំពេញ៖ រដ្ឋបាលរាជធានីភ្នំពេញសហការជាមួយក្រុមហ៊ុនOCIC គ្រោងនឹងចាប់ផ្តើមសាងសង់ស្ពានអាកាសថ្មើរជើងមួយទៀតនៅជុំវិញស្តុបរង្វង់មូលនាងគង្ហីង ជាប់ស្តាតអូឡាំពិក ក្នុងខណ្ឌ៧មករា រាជធានីភ្នំពេញ ហើយគម្រោងនេះបើមិនមានការប្រែប្រួលទេនឹងបើកការដ្ឋានស្ថាបនាឡើងនៅសប្តាហ៍ក្រោយនេះ។
មន្ត្រីរដ្ឋបាលរាជធានីភ្នំពេញបានអោយដឹងថា ដើម្បីសម្រួលដល់ការធ្វើដំណើរថ្មើរជើងឆ្លងកាត់ទីតាំងភ្លើងស្តុបមិនប៉ះពាល់ចរាចរ និងធានាបានសុវត្ថិភាព រដ្ឋបាលរាជធានីភ្នំពេញសហការជាមួយក្រុមហ៊ុនវិនិយោគទុនអាណិកជនកម្ពុជា OCIC នឹងចាប់ផ្តើមសាងសង់ស្ពានអាកាសថ្មើរជើងនៅជុំវិញស្តុបរង្វង់មូលនាងគង្ហីង ក្នុងខណ្ឌ៧មករា នៅសប្តាហ៍ក្រោយនេះតទៅ ។
លោកម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញបានអោយដឹងនៅមុននេះបន្តិចថា គម្រោងសាងសង់ស្ពានអាកាសថ្មើរជើងមួយទៀតនៅជុំវិញស្តុបរង្វង់មូលនាងគង្ហីង ជាប់ស្តាតអូឡាំពិក ក្នុងខណ្ឌ៧មករា នេះ គឺរដ្ឋបាលរាជធានីភ្នំពេញនិងក្រុមហ៊ុនវិនិយោគទុនអាណិកជនកម្ពុជា OCIC បានសហការគ្នាធ្វើការសិក្សារួមគ្នាប្រមាណ២ទៅ៣ខែរួចមកហើយ ហើយនៅពេលមិនយូរទេ ការដ្ឋានមួយនេះបើកដំណើរការនាពេលឆាប់ៗនេះ ។ប៉ុន្តែទោះជាយ៉ាងណាក្តី អ្នកនាំពាក្យរដ្ឋបាលរាជធានីភ្នំពេញរូបនេះមិនបានលំអិតអំពីគម្រោងនេះទេ ។
គួរបញ្ជាក់ថា បើការដ្ឋានខាងលើនេះចាប់ផ្តើមដំណើរការ នោះមានន័យថា នៅរាជធានីភ្នំពេញ មានស្ពានអាកាសថ្មើរជើងចំនួន៣ហើយ ដោយនៅមុខវិទ្យាល័យជម្ពូវ័ន្ត ខណ្ឌពោធិសែនជ័យ២ កន្លែង និងជុំវិញស្តុបរង្វង់មូលនាងគង្ហីង ក្នុងខណ្ឌ៧មករានេះមួយកន្លែងទៀត៕ដោយ៖កូឡាប
