ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅក្នុងសន្នីសីទសារព័ត៌មានស្តីពីការវិវត្តន៍នៃជំងឺ Covid-19 នៅកម្ពុជា នាថ្ងៃទី ៧ ខែមេសា ឆ្នាំ ២០២០នេះ បានឱ្យដឹងថារដ្ឋាភិបាលនឹងបញ្ចេញថវិកាជាតិ រួមជាមួយនឹងថវិការបស់រោងចក្រ សហគ្រាស ដែលព្យួការងារក្នុងអំឡុងនៃវិបត្តិ Covid-19។
សម្តេចតេជោ ហ៊ុន សែន បានប្រកាសផ្តល់ជំនួយសង្គមជាប្រាក់បៀវត្សដល់កម្មករ-ការិនីក្នុងមួយនាក់ទទួលបាន ៧០ ដុល្លារអាមេរិក្នុងមួយខែ ចំពោះរោងចក្រណា ដែលបានព្យួរការងារដោយសារវិបត្តនៃជំងឺ Covid-19។
សម្តេចតេជោបន្ថែមថា រដ្ឋាភិបាលកម្ពុជា និងផ្តល់ថវិកាបដិភាគប្រមាណ ៤០ ដុល្លារអាមេរិក និង រោងចក្រសហគ្រាស ប្រមាណ ៣០ ដុល្លារអាមេរិក សរុប ៧០ដុល្លារអាមេរិក ដល់កម្មករ ដោយមិនបាច់ចូលរួមវគ្គបណ្តុះបណ្តាលជំនាញវិជ្ជាជីវៈ និងមិនមកធ្វើការនោះទេ។
គួររំលឹកថា កន្លងមក ឯកឧត្តម ហេង សួរ អ្នកនាំពាក្យក្រសួងការងារនិងបណ្តុះបណ្តាលវិជ្ជាជីវ: ធ្លាប់បានមានប្រសាសន៍ថា រោងចក្រចំនួន៩១ បានប្រកាសព្យួការងារដោយសារជំងឺ Covid-19 និងប៉ះពាល់ដល់កម្មករចំនួនជាង ៦ម៉ឺននាក់។ ចំនួនកម្មករ ដែលរងប៉ះពាល់ មានប្រហែលជាង ៦ម៉ឺននាក់ ដោយពេលនោះ រាជរដ្ឋាភិបាល នឹងផ្តល់ជាប្រាក់ខែប្រមាណ ៣០ ដុល្លារអាមេរិក ក្នុងមួយខែ ខណៈដែលពួកគេត្រូវបានព្យួការងារ ក្នុងអំឡងការរីករាលដាលជាសកលនៃជំងឺ Covid-19 ៕ ដោយ ៖ បញ្ញាសុទ្ធ