ភ្នំពេញ៖ សម្ដេចអគ្គមហាពញាចក្រី ហេង សំរិន ប្រធានរដ្ឋសភា បានសម្រេចបន្តសម័យប្រជុំរដ្ឋសភាលើកទី៤ នីតិកាលទី៦ នៅព្រឹកថ្ងៃទី១០ ខែមេសានេះ ដើម្បីពិភាក្សាអនុម័តសេចក្តីព្រាងច្បាប់ស្តីពី ការគ្រប់គ្រងប្រទេសជាតិស្ថិតក្នុងភាពអាសន្ន និងធ្វើការបោះឆ្នោតជ្រើសតាំង ផ្លាស់ប្តូរ សមាជិកគណៈកម្មការជំនាញរដ្ឋសភាមួយចំនួន។
ឯកឧត្តមកិត្តិនីតិកោសលបណ្ឌិត ប៉ែន បញ្ញា បានលើកឡើងថា សេចក្តីព្រាងច្បាប់នេះ បានតាក់តែងឡើងស្របគ្នានឹងមាត្រា ២២ថ្មី នៃរដ្ឋធម្មនុញ្ញកម្ពុជា ដែលបានចែងថា នៅពេលប្រជាជាតិប្រឈមមុខគ្រោះថ្នាក់ ព្រះមហាក្សត្រទ្រង់ប្រកាសប្រទានដំណឹងជាសាធារណៈដាក់ប្រទេសជាតិក្នុងភាពអាសន្ន ហើយច្បាប់នេះធ្វើឡើងក្នុងគោលបំណងកំណត់អំពីបែបបទ នីតិវិធី និងលក្ខខណ្ឌ នៃការប្រកាសដាក់ប្រទេសជាតិក្នុងគ្រាមានអាសន្ន។
ឯកឧត្តមកិត្តិនីតិកោសលបណ្ឌិតបានគូសបញ្ជាក់ថា សេចក្តីព្រាងច្បាប់ស្តីពីការគ្រប់គ្រងប្រទេសជាតិស្ថិតក្នុងភាពអាសន្ន នឹងផ្តល់ជាមូលដ្ឋានគតិយុត្ត ដើម្បីឆ្លើយតប ទៅនឹងស្ថានភាពរបស់ប្រទេសក្នុងភាពអាសន្ន សំដៅការពារសន្តិសុខ សណ្តាប់ធ្នាប់សាធារណៈ ការពារអាយុជីវិត និងសុខភាពរបស់ប្រជាពលរដ្ឋ ព្រមទាំងការពារទ្រព្យសម្បត្តិ និងបរិស្ថាន។ ជាពិសេសក្នុងស្ថានភាពរីករាលដាលជំងឺ កូវីដ១៩ ដែលជាវិបត្តិសកលកាន់តែច្រើនឡើងក្នុងពិភពលោកក្នុងពេលបច្ចុប្បន្ននេះ។
ឯកឧត្តម ច័ន្ទ សុផល ប្រធានស្តីទីគណៈកម្មការមហាផ្ទៃ ការពារជាតិ និងមុខងារសាធារណៈនៃរដ្ឋសភា បានដឹកនាំសមាជិក សមាជិកានៃគណៈកម្មការ ប្រជុំផ្ទៃក្នុង ដើម្បីពិនិត្យសិក្សាលើសេចក្តីព្រាងច្បាប់ស្តីពីការគ្រប់គ្រងប្រទេសជាតិស្ថិតក្នុងភាពអាសន្ន។
សូមជម្រាបថា សេចក្តីព្រាងច្បាប់ស្តីពី ការគ្រប់គ្រងប្រទេសជាតិស្ថិតក្នុងភាពអាសន្ន ត្រូវបានរាជរដ្ឋាភិបាលប្រគល់ជូន តាមរយៈលិខិតលេខ២៩៧.លស.កបច ចុះថ្ងៃសុក្រ ១១កើត ខែចេត្រ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី៣ ខែមេសា ឆ្នាំ២០២០ ដើម្បីស្នើសុំរដ្ឋសភាពិនិត្យ និងអនុម័តសេចក្តីព្រាងច្បាប់នេះ រួមមាន៥ជំពូក និង ១២មាត្រា ៖
-ជំពូកទី១ រួមមាន ២មាត្រា (ពីមាត្រា១ ដល់មាត្រា២) ចែងអំពីបទប្បញ្ញត្តិទូទៅ ដែលកំណត់អំពីគោលបំណង និងវិសាលភាព។
-ជំពូកទី២ រួមមាន ២មាត្រា (ពីមាត្រា៣ ដល់មាត្រា៤) ចែងអំពីបែបបទ នីតិវិធី និងលក្ខខណ្ឌនៃការដាក់ប្រទេសជាតិស្ថិតក្នុងភាពអាសន្ន។
-ជំពូកទី៣ រួមមាន ២មាត្រា (ពីមាត្រា៥ ដល់មាត្រា៦) កំណត់អំពីវិធានការក្នុងពេលប្រទេសជាតិស្ថិតក្នុងភាពអាសន្ន និងអំពីរបបរាយការណ៍អំពីវិធានការក្នុងភាពអាសន្នជូនទៅរដ្ឋសភា និងព្រឹទ្ធសភា។
-ជំពូកទី៤ រួមមាន ៤មាត្រា (ពីមាត្រា៧ ដល់មាត្រា១០) ចែងអំពីទោសប្បញ្ញត្តិដែលកំណត់អំពីបទរារាំងដល់កិច្ចប្រតិបត្តិការពេលប្រទេសជាតិស្ថិតក្នុងភាពអាសន្ន បទមិនគោរព វិធានពេលប្រទេសជាតិស្ថិតក្នុងភាពអាសន្ន ការទទួលខុសត្រូវព្រហ្មទណ្ឌរបស់នីតិបុគ្គល និងការទទួលខុសត្រូវរបស់អាជ្ញាធរមានសមត្ថកិច្ច។
-ជំពូកទី៥ រួមមាន ២មាត្រា (ពីមាត្រា១១ ដល់មាត្រា១២) ចែងអំពីអវសានប្បញ្ញតិដែលកំណត់អំពីនិរាករណ៍ និងការប្រកាសជាការប្រញាប់៕ដោយ៖កូឡាប
