ភ្នំពេញ ៖ កាលពីថ្ងៃទី១០ ខែមេសា ឆ្នាំ២០២០ អ្នកស្រី អ៊ាន សៀវម៉ី ជាអគ្គនាយិកា ក្រុមហ៊ុន Castle E Diamond នាំចូល ផលិតផលថែរក្សាសម្ផស្សម៉ាក់ Ei Ei ផ្ដាច់មុខពីក្រៅប្រទេស បានបរិច្ចាគថវិកាផ្ទាល់ខ្លួន ចំនួន៥០០០ដុល្លារ ជេលលាងដៃ ចំនួន១០០ដប និង Sprayកំចាត់មេរោគ ចំនួន១០០ដប ជូន លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនង ជាមួយ រដ្ឋសភា-ព្រឹទ្ធសភា និងអធិការកិច្ច ដើម្បីប្រយុទ្ធប្រឆាំងទៅនឹង ជំងឺកូវីដ-១៩។
នាឱកាសនោះដែរ អ្នកស្រី អ៊ាន សៀវម៉ី មានចំណាប់អារម្មណ៍ថា «ថ្ងៃនេះសប្បាយចិត្ត ណាស់ ដែលបានមកចូលរួមសម្ដែងការគួសម ជាមួយនឹង លោកជំទាវ ម៉ែន សំអន ។ ហើយ ខ្ញុំក៏បានយកសម្ភារមួយចំនួន និងថវិកាខ្លះជូនលោកជំទាវ ដើម្បីយកទៅប្រើប្រាស់ប្រយុទ្ធ ប្រឆាំង កូវីដ-១៩ កំពុងកើតមានឡើងនៅកម្ពុជា។ខ្ញុំសូមគោរពជូនពរ លោកជំទាវ សូមមានសុខភាពល្អ ជោគជ័យ គ្រប់ភារកិច្ច ផងដែរ»។
អ្នកស្រី រៀបរាប់ថា មិនថាធ្វើអ្វី ឬទៅណាមកណា ការលាងសម្អាតដៃ មុនប៉ះ កាន់អាហារ ឬខ្លួនប្រាណ មុខមាត់របស់អ្នក គឺជារឿងដែលមនុស្សគ្រប់រូប ត្រូវអនុវត្តន៍ជាប្រចាំ មិនថាក្មេង ឬចាស់ ចាំបាច់ត្រូវតែការពារ ហើយសកម្មភាពដ៏សាមញ្ញនេះ អាចការ ពារអ្នកពីជំងឺផ្សេងៗ។
អ្នកស្រីបន្ដថា ម្យ៉ាងវិញទៀត បច្ចុប្បន្នពិភពលោក កំពុងផ្ទុះឡើងវីរុសថ្មី កូវីដ-១៩ ដែល ក្រសួងសុខាភិបាល បានប្រកាសឲ្យប្រជាពលរដ្ឋ មានការប្រុងប្រយ័ត្នខ្ពស់ ត្រូវលាងសម្អាត ដៃជាប្រចាំ ក្រោយពេលប៉ះកាន់ របស់ផ្សេងៗ ពីអ្នកដទៃ ឬទីកន្លែងសាធារណៈ។
សូមបញ្ជាក់ថា ក្រុមហ៊ុន Castle E Diamond របស់អ្នកស្រី អ៊ាន សៀវម៉ី ឬហៅថា Siv mey Online Shop ដ៏ល្បីល្បាញ នៅក្នុងប្រទេសកម្ពុជា បាននាំចូលផលិតផល ថែរក្សាសម្ផស្ស ម៉ាក់ Ei Ei មកលក់នៅទីផ្សារកម្ពុជា ហើយទទួលបានការគាំទ្រយ៉ាងច្រើន ពីសំណាក់ ប្រជាជនកម្ពុជា តាមរយៈធ្វើឲ្យ លោក-អ្នក ដែលស្រឡាញ់ភាពស្រស់ស្អាត ក្លាយជាការពិត៕ ដោយ ៖ ចំរើន
