សៀមរាប ៖ ជនសង្ស័យម្នាក់ ប្រើកាំបិតប៉័ងតោ តែងប្រព្រឹត្តអំពើហិង្សា ដោយចេតនាមានស្ថានទម្ងន់ទោស (កាប់នឹងកាំបិត) លើជនរងគ្រោះចំនួន៣ករណី ក្នុងក្រុងសៀមរាបកន្លងមក ត្រូវបង្ក្រាបបានហើយ កាលពីវេលាម៉ោងជាង៦ល្ងាច នាថ្ងៃទី១១ ខែមេសា ឆ្នាំ២០២០។
លោក ណុប សារ៉ាក់ អធិការនគរបាលក្រុងសៀមរៀប បានឲ្យដឹងថា ជនសង្ស័យ ដែលឃាត់ខ្លូនខាងលើ មានឈ្មោះ នុត សុកេត ហៅឡេវ ភេទប្រុស អាយុ២៩ឆ្នាំ ស្នាក់នៅក្នុងភូមិក្រវ៉ាន់ ឃុំរំចេក ស្រុកបន្ទាយស្រី ខេត្តសៀមរាប ។ ក្នុងការឃាត់ខ្លួនជនសង្ស័យ សមត្ថកិច្ចបានធ្វើការដកហូតកាំបិតប៉័ងតោ១ដើម និងម៉ូតូ១គ្រឿងម៉ាកឌ្រីម ១២៥ ខ្មៅ ស៊េរីឆ្នាំ២០០៥ ។
អធិការដ្ឋាននគរបាលក្រុងសៀមរាប បានឲ្យដឹងថា ករណីទី១ កើតហេតុថ្ងៃទី៥ ខែមេសា ឆ្នាំ២០២០ វេលាម៉ោង១២និង១០នាទី នៅចំណុចមុខបន្ទាយអាវុធហត្ថចាស់ ក្នុងភូមិត្រពាំងសេះ សង្កាត់គោកចក ក្រុង.ខេត្តសៀមរាប ជនរងគ្រោះឈ្មោះឆាន់ ដារ៉ូ ភេទប្រុស អាយុ២៥ឆ្នាំ រស់នៅភូមិទក្សិណខាងត្បូង សង្កាត់គោកចក (របួសត្រង់ស្លាប្រចៀវឆ្វេង) ។ ករណីទី២ កើតហេតុថ្ងៃទី៩ ខែមេសា ឆ្នាំ២០២០ វេលាម៉ោង៦និង១០នាទី តាមបណ្តោយផ្លូវ៦០ម៉ែត្រ នៅភូមិចុងកៅស៊ូ សង្កាត់ស្លក្រាម ជនរងគ្រោះឈ្មោះទុយ ហ៊ាន ភេទប្រុស អាយុ៣៣ឆ្នាំ រស់នៅភូមិវត្តបូព៌ សង្កាត់សាលាកំរើក (រងរបួសត្រង់ស្លាបប្រចៀវខាងឆ្វេង) ។ ករណីទី៣ កើតហេតុថ្ងៃទី១១ ខែមេសា ឆ្នាំ២០២០ វេលាម៉ោង១៦ នៅមុខចំណតរថយន្តប្រាសាទអង្គរ ក្នុងភូមិត្រពាំងសេះ សង្កាត់គោកចក ជនរងគ្រោះឈ្មោះឃឹម សុឃីម ភេទប្រុស អាយុ២៣ឆ្នាំ រស់នៅភូមិខ្វៀន សង្កាត់គោកចក ( របួសត្រង់ខ្នង)។
ក្រោយពីមានកើតហេតុការណ៍ ករណីប្រើកាំបិតកាប់លើជនរងគ្រោះ កើតឡើងនៅក្នុងក្រុងសៀមរាប
លោកវរសេនីយ៍ឯក ណុប សារ៉ាក់ អធិការនគរបាលក្រុងសៀមរាប បានដាក់បទបញ្ជាយ៉ាងម៉ឺងម៉ាត់ នៅក្នុងអង្គប្រជុំ ឱ្យជំនាញព្រហ្មទណ្ឌ និងប៉ុស្តិ៍ទាំងអស់ បើកការស៊ើបអង្កេតស្រាវជ្រាវវែកមុខ ជនដៃដល់ឲ្យឃើញ ដើម្បីចាប់ខ្លួនយកផ្ដន្ទាទោសតាមផ្លូវច្បាប់ នឹងរកយុត្តិធម៌ ជូនជនរងគ្រោះ ឲ្យបានដោយសារតែកិច្ចខិតខំស្រាវជ្រាវ យកចិត្តទុកពីជំនាញព្រហ្មទណ្ទក្រុង និងប៉ុស្ដិ៍ ទើបឈានដល់ធ្វើការឃាត់ខ្លួនជនសង្ស័យបាននៅថ្ងៃទី១១ ខែមេសា ឆ្នាំ២០២០ វេលាម៉ោង១៨នាទី ធ្វើការឃាត់ខ្លួនមុខសញ្ញាជនសង្ស័យបានឈ្មោះ នុត សុកេត ហៅឡេវ ភេទប្រុស អាយុ២៩ឆ្នាំ ស្នាក់នៅអាសយដ្ឋានភូមិក្រវ៉ាន់ ឃុំរំចេក ស្រុកបន្ទាយស្រី ខេត្តសៀមរាប នៅចំណុចផ្លូវបំបែកជាបួនមុខអង្គរ ក្នុងភូមិត្រពាំងសេះ សង្កាត់គោកចក ក្រុងសៀមរាប ដឹកនាំកិច្ចប្រតិបត្តិការស្រាវជ្រាវ ស៊ើបអង្កេត និងឃាត់ខ្លួនដោយលោក អនុសេនីយ៍ឯករិន ម៉ុន នាយប៉ុស្តិ៍នគរបាលរដ្ឋបាលគោកចក។
វត្ថុតាងដកហូតបាន កាំបិតប៉័ងតោ១ដើម និងម៉ូតូ១គ្រឿងម៉ាកឌ្រីម ១២៥ ពណ៌ខ្មៅ ស៊េរី២០០៥។ ជនសង្ស័យ បានសារភាពថា ករណីទាំងបីខាងលើ គឺខ្លួនជាអ្នកប្រព្រឹត្ត ពិតប្រាកដមែនហើយ តែម្នាក់ឯងនោះទេ។
បច្ចុប្បន្នជនសង្ស័យ លោកឧត្តមសេនីយ៍ត្រីភឹង ចិន្តារ៉េត ស្នងការរង និងជាប្រធានផែនទទួលការងារព្រហ្មទណ្ឌ នៃស្នងការដ្ឋាននគរបាលខេត្តសៀមរាប អនុញ្ញាតឱ្យធ្វើការឃាត់ខ្លួន ដើម្បីរៀបចំសំណុំរឿង តាមនីតិវិធី បញ្ជូនទៅតុលាការ ធ្វើការបានផ្ដន្ទាទោសច្បាប់លើជនល្មើសនេះ៕ ដោយ៖កូឡាប
