អាជ្ញាធរប្រទេសវៀតណាម បានបញ្ជាឲ្យដាក់កម្មករទាំងអស់ដែលបំរើការនៅរោងចក្រ Samsung Display ក្នុងប្រទេសខ្លួន នៅដាច់ដោយឡែក បន្ទាប់ពីកម្មករម្នាក់ធ្វើតេស្តមានផ្ទុកវីរុសកូរ៉ូណា។
កម្មករវ័យ ២៥ឆ្នាំ ដែលធ្វើការនៅរោងចក្រ Samsung Display ក្នុងខេត្ត Bac Ninh ភាគខាងជើងវៀតណាម ត្រូវបានគេពិនិត្យឃើញមានផ្ទុកវីរុសកូរ៉ូណាកាលពីថ្ងៃអាទិត្យម្សិលមិញនេះ។ នេះបើតាមសេចក្តីប្រកាសរបស់ស្ថាប័នប្រឆាំងនឹងវីរុស COVID-19។
ក្រុមហ៊ុនធំ Samsung Electronics ក៏បានបញ្ជាក់ពីករណីមានវីរុសកូរ៉ូណាលើបុគ្គលិករបស់ខ្លួនដែរ ប៉ុន្តែបានប្រកាសថា វាមិនប៉ះដល់សង្វាក់ផលិតកម្មរបស់រោងក្រខ្លួននៅក្នុងប្រទេសវៀតណាមឡើយ។
លោក Nguyen Huong Giang ប្រធានគណៈកម្មាធិការប្រជាជនប្រចាំខេត្ត Bac Ninh បានថ្លែងប្រាប់ទូរទស្សន៍វៀតណាម VTV ថ្ងៃនេះថា មនុស្សចំនួន ៤៤នាក់ត្រូវបានដាក់ឲ្យស្ថិតនៅដោយឡែក ហើយរៀងចក្រ និងឡានក្រុងដែលគេប្រើដឹកអ្នកទាំងនោះ ត្រូវបានគេបាញ់ថ្នាំរំងាប់មេរោគ។
សូមបញ្ជាក់ថា ក្រសួងសុខាភិបាលវៀតណាមប្រកាសថា មានអ្នកឆ្លងវីរុសកូរ៉ូណាចំនួន ២៦២នាក់នៅក្នុងប្រទេស និងមិនមានអ្នកជំងឺណាម្នាក់ស្លាប់ឡើយ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia