ប្រទេសកូរ៉េខាងជើង នៅថ្ងៃអង្គារនេះ បានធ្វើការបាញ់មីស៊ីលជាច្រើនគ្រាប់ ចូលទៅក្នុងសមុទ្រជប៉ុន។ មីស៊ីលនោះ ត្រូវគេសង្ស័យថា ជាប្រភេទមីស៊ីលប្រឆាំងគោលដៅនៅលើដី។ នេះបើតាមការឲ្យដឹងរបស់យោធាកូរ៉េខាងត្បូង។
អគ្គសេនាធិការចម្រុះ របស់កូរ៉េខាងត្បូង បានថ្លែងក្នុងសេចក្តីប្រកាសថា “មីស៊ីលជាច្រើនគ្រប់បាញ់ចេញពីតំបន់ Munchon ភាគខាងកើតប្រទេស ហើយវាត្រូវគេជឿជាក់ថា ជាមីស៊ីលរយៈចម្ងាយខ្លី”។
ការបាញ់សាកល្បងនេះ កើតឡើងតែមួយថ្ងៃប៉ុណ្ណោះ មុនពេលរបបនេះនឹងប្រារព្ធខួបលើកទី ១០៨របស់លោក គីម អ៊ីស៊ុង ដែលជាស្ថាបនិករបស់កូរ៉េខាងជើង និងជាជីតារបស់មេដឹកនាំកូរ៉េខាងជើងបច្ចុប្បន្ន គីម ជុងអ៊ុន។
វាក៏កើតឡើងមួយថ្ងៃផងដែរ មុនពេលប្រទេសកូរ៉េខាងត្បូង ធ្វើបោះឆ្នោតសភា និងស្របពេលដែលពិភពលោក កំពុងយកចិត្តទុកដាក់ខ្លាំងបំផុត ទៅលើការផ្ទុះរាតត្បាតវីរុសកូរ៉ូណា។ កូរ៉េខាងជើងធ្លាប់ប្រកាសថា ប្រទេសខ្លួនគ្មានវីរុសកូរ៉ូណា សូម្បីមួយករណី។
កូរ៉េខាងជើង បានធ្វើការបាញ់សាកល្បងមីស៊ីល ផ្លោងជាច្រើនលើកច្រើនសារ ក្នុងរយៈពេលប៉ុន្មានឆ្នាំនេះ ដែលមីស៊ីលទាំងនោះ បានហោះឡើងខ្ពស់ផុត ពីផែនដីចូលក្នុងលំហរអាកាស មុនពេលសំដៅទៅរកគោលដៅ ដោយហោះក្នុងល្បឿនខ្ពស់។
យោធាកូរ៉េខាងត្បូងថ្លែងថា មីស៊ីលរបស់កូរ៉េខាងជើងនៅថ្ងៃនេះ បានបោះលើសមុទ្រជប៉ុន មុនពេលវាធ្លាក់ចូលទៅក្នុងទឹក។
“អាជ្ញាធរចារកម្មកូរ៉េខាងត្បូង និងអាមេរិច កំពុងធ្វើការវិភាគយ៉ាងល្អិតល្អន់ ទៅលើបញ្ហាទាក់ទង”។
សូមបញ្ជាក់ថា កូរ៉េខាងជើង បានរកទណ្ឌកម្មជាច្រើន របស់អង្គការសហប្រជាជាតិ ជុំវិញកម្មវិធីអាវុធប្រល័យលោករបស់ខ្លួន៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
