តាកែវ៖ កម្មកររោងចក្រ ២៨នាក់ ដែលធ្វើដំណើរមកធ្វើការងារ ដោយជិះលើរថយន្តហ៊ីយ៉ាន់ដាយ ១តោនកន្លះ ចេញពីស្រុកគីរីវង់ មកក្រុងដូនកែវ បានជួបគ្រោះថ្នាក់ចរាចរណ៍ ក្រឡាប់រថយន្តដោយខ្លួនឯង បង្កឲ្យមានអ្នករងរបួសធ្ងន់ស្រាលចំនួន ៨នាក់ ក្នុងនោះមានស្ត្រីពោះធំមួយនាក់ កំពុងសម្រាកព្យាបាលនៅមន្ទីរពេទ្យបង្អែកខេត្តតាកែវ។
ហេតុការណ៍គ្រោះថ្នាក់ចរាចរណ៍នេះ បានកើតឡើងនៅលើកំណាត់ផ្លូវជាតិលេខ២ នៅចំណុចភូមិ គោញ័រ ឃុំព្រៃស្លឹក ស្រុកទ្រាំង ខេត្តតាកែវ វេលាម៉ោង ៦និង៣០នាទីព្រឹក ថ្ងៃទី ១៥ ខែមេសា ឆ្នាំ២០២០ ។
បើតាមការឲ្យដឹងពីនគរបាលចរាចរណ៍ផ្លូវគោកស្រុកទ្រាំង ថា ការណីគ្រោះថ្នាក់ចរាចរណ៍ក្រឡាប់រថយន្តដឹកកម្មករនេះ គឺបណ្តាលមកពីមូលហេតុកត្តាយានយន្ត ដោយម្ចាស់រថយន្តបាននិយាយប្រាប់ថា មុនពេលកើតហេតុ ចង្កូតរថយន្តរបស់គាត់មានសភាពគាំងៗ រួចរូបគាត់ករបានជាន់ហ្វ្រាំងហើយកាច់ចង្កូរ ក៏ស្រាប់តែវេចង្កូតបាស់ជើងរថយន្តក្រឡាប់នៅលើផ្លូវថ្នល់តែម្តង តែមិនបង្កឲ្យមានប៉ះពាល់ដល់ការធ្វើដំណើរ របស់អ្នកប្រើប្រាស់ផ្លូវដទៃឡើយ ដោយរងរបួសតែអ្នកជិះនៅក្នុងរថយន្តតែប៉ុណ្ណោះ ។ ក្រោយពេលកើតហេតុរួច កម្មករ កម្មការិនីរោងចក្រ ដែលរងរបួសនោះ ត្រូវបានដឹកបញ្ជូនទៅសង្គ្រោះនៅមន្ទីរពេទ្យបង្អែកខេត្តតាកែវ ចំនួន ៨នាក់ ។
ជុំវិញករណីគ្រោះថ្នាក់ចរាចរណ៍រថយន្តដឹកកម្មកររោងចក្រក្រឡាប់នេះផងដែរ លោកឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ បានជំរុញឲ្យការិយាល័យចរាចរណ៍ផ្លូវគោក ត្រូវតែយកចិត្តទុកដាក់ឲ្យមែនទែន ពិនិត្យទៅលើប័ណ្ណបើកបរ របស់តៃកុងឡាន និងបច្ចេកទេសមួយចំនួន ដែលមាននៅលើរថយន្ត ជួនកាលការប្រើប្រាស់រថយន្តដឹកកម្មករ របស់ពួកគាត់ អាចមិនមានការត្រួតពិនិត្យច្បាស់លាស់ និងឆ្វេសប្រហែសលើចំណុចខូចខាតបន្តិចបន្តួច សម្បកកង់សឹករេចរឹល មិនព្រមធ្វើឬផ្តូរថ្មីឲ្យល្អនោះទេ ដែលនេះជាមូលហេតុមួយបង្កឲ្យមានហេតុការណ៍គ្រោះថ្នាក់ចរាចរណ៍ កើតឡើងដោយសារតែកត្តារថយន្ត ដូច្នេះក្នុងនាមយើងជាមន្ត្រីនគរបាល ដែលបម្រើឲ្យរាស្ត្រ គឺមិនអនុញ្ញាតឲ្យតៃកុងរថយន្តដឹកកម្មករទាំងនោះ យកជីវិតមនុស្សរាប់សិបនាក់ ដែលធ្វើដំណើរជិះលើរថយន្ត មកលេងសើចបាននោះឡើយ។
ឯកឧត្តម អ៊ូច ភា អភិបាលខេត្តតាកែវ បានចុះមកសាកសួរសុខទុក និងនាំយកថវិការបស់សាខាកាកបាទក្រហមកម្ពុជា ចែកជូនដល់កម្មករ កម្មាការិនីរងគ្រោះ ដែលកំពុងសម្រាកព្យាបាល នៅមន្ទីរពេទ្យបង្អែកខេត្តតាកែវ ។
មានប្រសាសន៍នៅក្នុងឱកាសចុះសួរសុខទុកនេះដែរ ឯកឧត្តម អ៊ូច ភា បានធ្វើការណែនាំឲ្យក្រុមគ្រូពេទ្យត្រូវតែយកចិត្តទុកដាក់ពិនិត្យ មើលព្យាបាលដល់បងប្អូនកម្មករ កម្មការិនី ដោយយកចិត្តទុកដាក់ឲ្យមែនទែន ដើម្បីព្យាបាលដល់ពួកគាត់ ឲ្យឆាប់បានជាសះស្បើយ ឆាប់វិលត្រឡប់ចូលបម្រើការងារជាធម្មតាឡើងវិញ ។ ទន្ទឹមនិងនោះដែរ ឯកឧត្តមអភិបាលខេត្តតាកែវ ក៏បានអំពាវនាវឲ្យបងប្អូនប្រជាពលរដ្ឋទាំងអស់ ដែលមានមុខរបរជាតៃកុងឡានដឹកកម្មករ ឬតៃកុងរថយន្តផ្សេងៗ មុននឹងចេញដំណើរទៅណាមកណា ត្រូវតែត្រួតពិនិត្យលើលក្ខណៈយានយន្តឲ្យបានគ្រប់ជ្រុងជ្រោយ ព្រោះអាយុជីវិតមនុស្សជាច្រើននាក់ គឺស្ថិតនៅលើតៃកុងរថយន្ត ហើយនៅពេលដែលពួកគាត់កំពុងបើកបរនៅលើដងផ្លូវ ៕ដោយ៖តាកែវ
