ភ្នំពេញ៖ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា ក្រសួង គ្រោងថវិការ ប្រមាណ ៣លាន ៥សែនដុល្លារ ក្នុងការចំនាយលើការផលិតពូជដំទ្បូងបារាំង នៅខេត្តមណ្ឌលគិរី ដោយការចាប់ដៃគូរជាមួយប្រទេសកូរ៉េខាងត្បូង។
ឯកឧត្តម បានបញ្ជាក់ថា នៅពេលចប់ វីរុសកូវីដ១៩ ការផលិតពូជដំទ្បូង និងការដាំដុះ ដើម្បីទទួលទិន្នផលខ្ពស់ នឹងចាប់ផ្តើមធ្វើនៅខេត្តមណ្ឌលគិរី។ ការជ្រើសរើសខេត្តមណ្ឌលគិរី ដើម្បីធ្វើការផលិតពូជនិងដាំដុះដំទ្បូងបារាំងនេះ ដោយសារអំណោយផលនៃអាកាសធាតុ និងដីមានជីជាតិ តែបញ្ហាចោទគឺហេដ្ឋារចនាសម្ព័ន្ធប្រព័ន្ធទឹក ដែលមិនមានដល់កន្លែងដាំ។
ប៉ុន្តែទោះបីជាយ៉ាងណា ឯកឧត្តមរដ្ឋមន្ត្រីក្រសួងកសិកម្ម សង្ឃឹមថា បន្ទាប់ពីជោគជ័យក្នុងការផលិតដំទ្បូងបារាំងនេះ កម្ពុជា នឹងកាត់បន្ថយការនាំចូលដំទ្បូងបារាំងពីប្រទេសជិតខាង។ ប្រទេសកម្ពុជា បាននាំចូលដំឡូងបារាំងជាង ៥ពាន់តោន ក្នុង១ឆ្នាំៗ។
សូមជម្រាបថា ដំទ្បូងបារាំង ត្រូវបានសាកល្បងដាំ នៅខេត្តមណ្ឌលគិរី តាំងពីឆ្នាំ២០១៩ ហើយឃើញថា ទទួលបានទិន្នផលខ្ពស់ប្រមាណ ១៨តោន ក្នុងដីដាំដុះមួយហិចតា ដោយអ្នកដាំអាចរកចំនូលបាន ពី១៥០០០ដុល្លារ ទៅ១៧០០០ដុល្លារ គ្រាន់តែការដាំដុះ រយៈពេល ៣ខែប៉ុណ្ណោះ។
ដំទ្បូងបារាំង ត្រូវបានដឹកជញ្ជូនមកភ្នំពេញ និងទៅខេត្តសៀមរាប ផ្គត់ផ្គង់ទៅតាមសណ្ឋាគារ និងភោជនីយដ្ឋានមួយចំនួន៕ដោយ៖សម្ផស្ស
