តាកែវ៖ កាលពីថ្ងៃទី ១៦ ខែមេសា ឆ្នាំ២០២០ ថ្ងៃម្សិលមិញនេះ លោកឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ បានបញ្ជាឲ្យកងកម្លាំងរបស់ខ្លួនដែលដឹកនាំដោយ លោកវរសេនីយ៍ឯក ឈៀង សុន ស្នងការរងទទួលផែនការិយាល័យប្រយុទ្ធប្រឆាំង និងគ្រឿងញៀន ចុះល្បាតមើលទីតាំងមួយចំនួននៅតាមចង្កេះភ្នំ ស្ថិតនៅក្នុងភូមិសាស្ត្រ ឃុំព្រៃអំពក ស្រុកគិរីវង់ ខេត្តតាកែវ ដោយកម្ទេចនៅដំណាំកញ្ឆា របស់ក្រុមជនខិលខូចលួចដាំនោះចោលឲ្យអស់ ព្រោះករណីលួចដាំដំណាំកញ្ឆានេះ គឺជាអំពើខុសច្បាប់ និងត្រូវស្វែងរកជនខិលខូចនោះមកកាត់ទោសទៅតាមច្បាប់ ។
លោក ឈៀង សុន ស្នងការរងនៃស្នងការដ្ឋាននគរបាលខេត្តតាកែវ បានឲ្យដឹងថា ដឹកនាំកម្លាំងនគរបាលការិយាល័យជំនាញ និងកម្លាំងអន្តរាគមន៍ពិសេស របស់ស្នងការដ្ឋាននគរបាលខេត្តសរុបចំនួន២០នាក់ ដើម្បីឡើងស្វែងរកទីតាំង ដែលជនខិលខូចលួចដាំដំណាំកញ្ឆាខុសច្បាប់ នៅលើកំពូលភ្នំខាងជើងដុបមហាឥសី ជាលទ្ធផលបង្ក្រាបបាន រួមមានការកាប់កម្ទេចដុតបំផ្លាញកញ្ឆាចំនួន ៥ទីតាំងលើផ្ទៃដីដាំដុះសរុប ១៩៧៥ ម៉ែត្រការ៉េ បំផ្លាញអាងស្តុបទឹកចំនួន៧។
បច្ចុប្បន្នកម្លាំងជំនាញកំពុងស្រាវជ្រាវ ស្វែងរកម្ចាស់ទីតាំងខាងលើ ដើម្បីយកមកផ្ដន្ទាទោសតាមផ្លូវច្បាប់ ព្រមទាំងបានផ្សព្វផ្សាយអប់រំ ដល់លោក មេភូមិ មេឃុំ ឲ្យបានជ្រាប និងជួយពន្យល់បន្ថែម ឲ្យប្រជាពលរដ្ឋរស់នៅក្នុងមូលដ្ឋានរបស់ខ្លួន កុំឲ្យបន្តដាំដំណាំកញ្ឆានេះតទៅទៀត ពីព្រោះជាដំណាំខុសច្បាប់៕ ដោយ៖តាកែវ