បន្ទាយមានជ័យ៖ អាវុធហត្ថក្រុងប៉ោយប៉ែត បានឃាត់ខ្លួនបានជនសង្ស័យចំនួន១នាក់ ដែលកាន់ពូថៅ បានធ្វើសកម្មភាពដេញកាប់ជនរងគ្រោះបណ្ដាលឱ្យរងរបួស៣កន្លែង ក្នុងករណីក្មេងស្ទាយដៃដល់ ធ្លាប់មានទំនាស់ជាមួយជនរងគ្រោះ ម្ដងរួចមកហើយ តែមិនបានបង្កឱ្យមានហិង្សាឡើយ រហូតដល់ថ្ងៃទី១៦ ខែមេសានេះ រូបគេបានជិះម៉ូតូដឹកបក្ខពួកចំនួន២នាក់ទៀត មកដេញកាប់ជនរងគ្រោះតែម្តង ។
បញ្ជាការដ្ឋានកងរាជអាវុធហត្ថខេត្តបន្ទាយមានជ័យ បានឲ្យដឹងថា យោងតាមពាក្យបណ្ដឹងរបស់ជនរងគ្រោះឈ្មោះ ប៊នឡុង គឹមឈីន ភេទប្រុស អាយុ១៦ឆ្នាំ ស្ដីពីករណីហិង្សាដោយចេតនា កាលពីថ្ងៃទី១៦ ខែមេសា ឆ្នាំ២០២០ វេលាម៉ោង៩និង២០នាទី នៅចំណុចម្ដុំផ្សារដើមពុទ្រា ភូមិក្បាលស្ពាន១ សង្កាត់/ក្រុងប៉ោយប៉ែត ខេត្ត បន្ទាយមានជ័យ ។ ក្រោយពីទទួលបានពាក្យបណ្ដឹង លោក វរសេនីយ៍ត្រី នួន នីណារ៉ូ មេបញ្ជាការអាវុធហត្ថក្រុងប៉ោយប៉ែត បានដឹកនាំកម្លាំងចុះស្រាវជ្រាវ រហូតឈានដល់ការឃាត់ខ្លួន បានជនសង្ស័យចំនួន១នាក់ នៅវេលាម៉ោង៨និង៣០នាទី ថ្ងៃទី១៨ ខែមេសា ឆ្នាំ២០២០ ហើយបាននាំយកមកបញ្ជាការមូលដ្ឋាន អាវុធហត្ថ ក្រុងប៉ោយប៉ែត ដើម្បីធ្វើការសាកសួរតាមនីតិវិធី។
លោក វរសេនីយ៍ត្រី នួន នីណារ៉ូ បានឱ្យដឹងថា ជនសង្ស័យឈ្មោះ សៀវ ម៉េងនូចាន់ ភេទប្រុស អាយុ១៦ឆ្នាំ រស់នៅភូមិព្រៃព្រិច សង្កាត់/ក្រុងប៉ោយប៉ែត ខេត្ត បន្ទាយមានជ័យ ក្រោយពីកម្លាំងជំនាញធ្វើការសាកសួរ ជនសង្ស័យបានឆ្លើយសារភាពថា រូបគេធ្លាប់មានទំនាស់ជាមួយជនរងគ្រោះខាងលើ ម្ដងរួចមកហើយ តែមិនបានបង្កឱ្យមានហិង្សាឡើយ រហូតដល់ថ្ងៃទី១៦ ខែមេសា នេះ រូបគេបានជិះម៉ូតូដឹកបក្ខពួកចំនួន២នាក់ទៀត ១/.ឈ្មោះ លាង ភេទប្រុស អាយុប្រហែល១៦ឆ្នាំ ២/.ឈ្មោះ ឆៃ ភេទប្រុស អាយុ ប្រហែល១៧ឆ្នាំ។ ពេលជិះម៉ូតូដល់ចំណុចកើតហេតុ បក្ខពួកគេម្នាក់ឈ្មោះ លាង ជាអ្នកកាន់ពូថៅ បានធ្វើសកម្មភាព ដេញកាប់ជនរងគ្រោះ បណ្ដាលឱ្យរងរបួស៣កន្លែង ១.របួសត្រង់ថ្កាមខាងឆ្វេងធ្ងន់ធ្ងរ ២.ប្រអប់ដៃខាងឆ្វេងចំនួន២កន្លែង ពិតប្រាកដមែន។
លោក វរសេនីយ៍ត្រី នួន នីណារ៉ូ បានឱ្យដឹងទៀតថា យោងតាមពាក្យបណ្ដឹងរបស់ជនរងគ្រោះ ,សាក្សី និងចម្លើយសារភាពជនសង្ស័យ កម្លាំងជំនាញ អាវុធហត្ថ ក្រុងប៉ោយប៉ែត កសាងសំណុំរឿង និងបញ្ជូនជនសង្ស័យមកបញ្ជាការដ្ឋាន អាវុធហត្ថខេត្តបន្ទាយមានជ័យ ចាត់ការបន្ត។
បច្ចុប្បន្ន ជនសង្ស័យត្រូវបានកម្លាំងការិយាល័យបទល្មើសព្រហ្មទណ្ឌ អាវុធហត្ថខេត្តបន្ទាយមានជ័យ បញ្ជូនទៅសាលាដំបូងខេត្ត ចាត់ការតាមច្បាប់ហើយ ។ចំណែកជនដៃដល់ឈ្មោះ លាង និងបក្ខពួកម្នាក់ទៀតឈ្មោះ ឆៃ ដែលរត់គេចខ្លួននោះ សមត្ថកិច្ចកំពុងធ្វើការស្រាវជ្រាវចាប់ខ្លួនបន្ត៕ដោយ៖កូឡាប
