ភ្នំពេញ៖ នារសៀលថ្ងៃអាទិត្យ ទី១៩ ខែមេសា ឆ្នាំ២០២០នេះ ឯកឧត្ដម ឃួង ស្រេង អភិបាល នៃគណៈអភិបាលរាជធានីភ្នំពេញ បានដឹកនាំមន្ទីរជំនាញពាក់ព័ន្ធ និងមន្ត្រីរដ្ឋបាលរាជធានីភ្នំពេញចុះពិនិត្យវិទ្យាល័យចំណេះទូទៅ និងបច្ចេកទេស ហ៊ុន សែន ជម្ពូវ័ន អនុវិទ្យាល័យគោកបញ្ជាន់ និងវិទ្យាល័យឫស្សីកែវ សម្រាប់ធ្វើជាទីតាំងចត្តាឡីស័ក រយៈពេល១៤ថ្ងៃ លើបងប្អូនកម្មករ កម្មការិនី ដែលទើបនឹងវិលត្រឡប់ពីស្រុកកំណើត ចូលមករាជធានីភ្នំពេញដើម្បីមកបំពេញការងាររបស់បងប្អូនកម្មករ កម្មការិនីតាមរោងចក្រនានា ដើម្បីចូលរួមកិច្ចការការពារ ទប់ស្កាត់ប្រយុទ្ធប្រឆាំង និងការរីករាលដាលនៃវីរុសកូវីដ១៩ ( Covid19 )។
ឯកឧត្ដម ឃួង ស្រេង បានថ្លែងប្រាប់អ្នកសារព័ត៌មានថា “ខ្ញុំបានចុះពិនិត្យទីតាំងត្រួតពិនិត្យសុខភាពបងប្អូនកម្មករ កម្មការិនី ដែលទើបនឹងវិលត្រឡប់ពីស្រុកកំណើតវិញ”។
ឯកឧត្តម ឃួង ស្រេង បានលើកឡើងថា ការដាក់កម្មករ កម្មការិនី ដែលត្រឡប់មកពីស្រុកកំណើត នាឱកាសបុណ្យចូលឆ្នាំថ្មី ប្រពៃណីជាតិខ្មែរ ឱ្យនៅដាច់ដោយឡែកពីគេរយៈពេល១៤ថ្ងៃ គឺធ្វើឡើងដើម្បីសុខុមាលភាពរបស់កម្មករ កម្មការិនីទាំង ដែលបម្រើការនៅតាមរោងចក្រទាំងអស់គ្នា។
កន្លែងត្រៀមដាក់កម្មករឱ្យនៅដាច់ដោយឡែក ក្នុងនោះវិទ្យាល័យជម្ពូវ័ន្ត មានចំនួន៥០បន្ទប់ អនុវិទ្យាល័យគោកបញ្ជាន់ ចំនួន៣៩បន្ទប់ និងវិទ្យាល័យប្ញស្សីកែវ ចំនួន ៤៩បន្ទប់ ដោយ១បន្ទប់ ដាក់បានតែមនុស្ស ២នាក់។
ឯកឧត្តម ឃួង ស្រេង បានថ្លែងថា “ក្នុងនាមអាជ្ញាធរដែនដី ក៏ដូចជារាជរដ្ឋាភិបាល យើងអត់យកទោសពៃអីទេ ការដាក់ឱ្យកម្មករ កម្មការិនី ដែលត្រឡប់មកពីស្រុកកំណើតដាក់ ឱ្យនៅដាច់ដោយឡែករយៈពេល១៤ថ្ងៃ តាមការណែនាំរបស់ក្រសួងសុខាភិបាល គឺធ្វើឡើងដើម្បីសុខមាលភាពរបស់ប្រជាពលរដ្ឋ កម្មករ កម្មការិនីទាំងអស់គ្នា”។
អភិបាលរាជធានីភ្នំពេញ បានលើកឡើងថា ប្រសិនបើអាជ្ញាធរមិនចាត់វិធានការបែបនេះទេ ប្រសិនបើមានកម្មករ កម្មការិនីណាម្នាក់មានផ្ទុកវីរុស COVID-19 អាចនឹងចម្លងដល់អ្នកដទៃ ព្រមទាំងអាចឱ្យរោងចក្រទាំងមូល ប្រឈមមុខនឹងការបិទទ្វាររោងចក្រតែម្តង។ ដូច្នេះ ការអនុវត្តតាមវិធានការណ៍ ណែនាំរបស់ក្រសួងការងារ គឺដើម្បីធ្វើយ៉ាងធានាដល់សុខុមាលភាពរបស់កម្មករ កម្មការិនីទាំងអស់គ្នាផងដែរ។ ការដឹកនាំរបស់សម្តេចតេជោ ហ៊ុន សែន ក្នុងការទប់ស្កាត់ ប្រយុទ្ធប្រឆាំងនឹងជំងឺ COVID-19 នេះនឹងទទួលបានជោគជ័យ តាមរយៈការដាក់ចេញនូវវិធានការច្បាស់លាស់ ម៉ឺងម៉ាត់ ជាពិសេសនៅតាមបណ្តារាជធានី-ខេត្ត គឺមានគណៈកម្មការទទួលខុសត្រូវលើជំងឺនេះ តាំងពីថ្នាក់ជាតិ រហូតដល់ថ្នាក់ក្រោមជាតិ។
គួរជម្រាបថា នាថ្ងៃទី១៥ ខែមេសា ឆ្នាំ២០២០ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានស្នើក្រសួងការងារ និងបណ្តុះបណ្តាលវិជ្ជាជីវៈ សហការជាមួយរោងចក្រ សហគ្រាស និងក្រុមហ៊ុននានា ដាក់កម្មករ និយោជិត ដែលទៅស្រុកលេងចូលឆ្នាំរយៈពេល១៤ថ្ងៃ មុនឱ្យពួកគេចូលធ្វើការវិញ ដើម្បីបង្ការការចម្លងជំងឺកូវីដ១៩។ ដោយឡែកកម្មករ និយោជិត ដែលត្រឡប់មកពីចូលឆ្នាំវិញ ត្រូវតែដាក់ឱ្យនៅដាច់ដោយឡែកជាចាំបាច់ ហើយត្រូវតាមដានសុខភាពជាប្រចាំ។
សេចក្តីប្រកាសព័ត៌មានរបស់ក្រសួងសុខាភិបាល បានឱ្យដឹងថា គិតត្រឹមថ្ងៃទី១៩ ខែមេសា ឆ្នាំ២០២០នេះ ករណីជំងឺកូវីដ១៩ នៅក្នុងប្រទេសកម្ពុជា មានត្រឹម១២២ករណីដដែល ខណៈដែលអ្នកជាសះស្បើយ កើនដល់១០៥នាក់ នៅទូទាំងប្រទេស និងមានអ្នកជំងឺប្រមាណ១៧នាក់ប៉ុណ្ណោះ កំពុងបន្តសម្រាកព្យាបាលនៅមន្ទីរពេទ្យ៕
ដោយ៖កូឡាប
