ភ្នំពេញ៖ ឯកឧត្តម វង្សី វិស្សុត មានប្រសាសន៍ថា ការរៀបចំគោលនយោបាយ និងកម្មវិធី ជំនួយសង្គម ក្នុងអំឡុងពេលប្រយុទ្ធប្រឆាំងនឹងជំងឺកូវីដ-១៩ គឺផ្អែកលើផែនការមេសម្រាប់ ទប់ស្កាត់ និងឆ្លើយតបទៅនឹងការគំរាមកំហែងពីជំងឺកូវីដ-១៩ និងក្របខ័ណ្ឌយុទ្ធសាស្ត្រ សម្រាប់គ្រប់គ្រងសភាពការណ៍ប្រយុទ្ធនឹងជំងឺកូវីដ-១៩ ដែលបានដាក់ចេញដោយ រាជរដ្ឋាភិបាល។
នៅថ្ងៃទី២១ខែ មេសា ឆ្នាំ២០២០ នេះលោកវង្សី វិស្សុតរដ្ឋលេខាធិការប្រចាំការ នៃក្រសួងសេដ្ឋកិច្ចនិងហិរញ្ញវត្ថុ និងជាប្រធានក្រុមការងារ ចំពោះកិច្ច រៀបចំគោលនយោបាយថវិកាហិរញ្ញប្បទាន និងជំនួយសង្គមដើម្បីគ្រប់គ្រងការប្រយុទ្ធនឹងជំងឺកូវីដ-១៩បានដឹកនាំកិច្ចប្រជុំពិភាក្សាពិគ្រោះយោបល់តាមរយៈVideo Conference អំពីគោលនយោបាយ និងកម្មវិធីជំនួយសង្គមក្នុងអំឡុងពេលប្រយុទ្ធប្រឆាំងនឹងជំងឺកូវីដ-១៩ជាមួយបណ្តាដៃគូអភិវឌ្ឍន៍ ចំនួន ២៣ដែលមានវត្តមាននៅកម្ពុជា រួមមាន៖ ADB, WB, IMF, FAO, WHO, UNDP, ILO, IOM, UNFPA, UN HABITAT, UNICEF, WFP, តំណាងសហភាពអ៊ឺរ៉ុប, ស្ថានទូតអូស្ត្រាលី, ស្ថានទូតជប៉ុន, ស្ថានទូតអាឡឺម៉ង់, JICA, KOICA, EDCF, GIZ, SDC, SIDA និង GRET។
ឯកឧត្តមបន្តថា គោលបំណងនៃការធ្វើការពិភាក្សាពិគ្រោះយោបល់កម្រិត បច្ចេកទេសជាមួយដៃគូអភិវឌ្ឍន៍ទាំងអស់នាពេលនេះ គឺដើម្បីប្រមូលនូវមតិយោបល់ និង ធាតុចូលបន្ថែមពីដៃគូទាំងអស់ ពាក់ព័ន្ធនឹងទំហំនៃតម្រូវការហិញ្ញប្បទាន និងការកំណត់អត្ត សញ្ញាណកម្មក្រុមជនងាយរងគ្រោះ ដែលជាគោលដៅអ្នកត្រូវទទួលបាននូវកម្មវិធីជំនួយ សង្គមនេះ ក៏ដូចជាយន្តការបើកផ្តល់ ព្រមទាំងបន្តស្វែងរកការគាំទ្រ បន្ថែមពីសំណាក់ ដៃគូទាំងអស់។
ឯកឧត្តម វង្សី វិស្សុត ក៏បានលើកឡើងផងដែរថា ការរីករាលដាលនៃជំងឺកូវីដ-១៩ បានក្លាយជាវិបត្តិសកលលោក និងជាករណីមិនធ្លាប់មានពីមុនមក ហើយទំហំនៃផលប៉ះពាល់ និងវិធានការឆ្លើយតបរបស់ប្រទេសនីមួយៗក៏មិនដូចគ្នាដែរ។
ឯកឧត្តម វង្សី វិស្សុត បានបន្តថា រាជរដ្ឋាភិបាលបានផ្តោតលើមុខព្រួញចំនួន៤គឺ៖ ១.ការប្រយុទ្ធប្រឆាំងទៅនឹងជំងឺកូវីដ-១៩ ដើម្បីទប់ស្កាត់ការឆ្លង និងការការពារអាយុជីវិតរបស់ប្រជាជន ២.ការរក្សាលំនឹងជីវភាព ប្រជាជនក្នុងកម្រិតអប្បបរមាមួយ (មិនឱ្យអត់បាយ) ពិសេសសម្រាប់ប្រជាជនក្រីក្រ និងក្រុមជនងាយរងគ្រោះ ព្រមទាំងអ្នកបាត់បង់ការងារ ដើម្បីធ្វើឱ្យពួកគេអាចមាន លទ្ធភាពវិលទៅរកជីវភាពជាធម្មតាវិញនៅពេលផុតពីជំងឺនេះ ៣.ការខិតខំជួយឱ្យអស់ លទ្ធភាព ដើម្បីជួយឱ្យធុរកិច្ច និងអាជីវកម្មអាចរស់បាន និងរក្សាការងារ ពិសេសការរក្សា និងជំរុញសកម្មភាពសេដ្ឋកិច្ចក្នុងស្រុក និងការត្រៀមខ្លួនក្រោយពេលដែលជំងឺកូវីដ-១៩ ស្រាកស្រាន្ត ដើម្បីជ្រោងសេដ្ឋកិច្ចឱ្យងើបឡើងវិញបានឆាប់រហ័ស និង ៤.ការរក្សាឱ្យបាន នូវសន្តិសុខសណ្តាប់ធ្នាប់សាធារណៈ និងស្ថិរភាពសង្គម។
ឯកឧត្តមបានថ្លែងប្រាប់កិច្ចពិគ្រោះយោបល់នេះថា ក្នុងការប្រយុទ្ធប្រឆាំងនឹងជំងឺកូវីដ-១៩ និងការទប់ទល់ផលប៉ះពាល់លើសេដ្ឋកិច្ច-សង្គម រាជរដ្ឋាភិបាលបានគ្រោងថវិកាចំនួន ១០០ លានដុល្លារ សម្រាប់អនុវត្តផែនការមេសម្រាប់ប្រយុទ្ធប្រឆាំងនឹងជំងឺកូវីដ-១៩( ក្នុងនោះ៦០លានដុល្លារ ប្រភពពីថវិកាជាតិនិង៤០លានប្រភពកៀរគរពីដៃគូអភិវឌ្ឍន៍) និងគ្រោងថវិកាជាតិចំនួន ៣៥០ លានដុល្លារអាមេរិក សម្រាប់ធ្វើអន្តរាគមន៍ដើម្បីរក្សាលំនឹងជីវភាពប្រជាជនក្រីក្រងាយរងគ្រោះ និង សម្រាប់ឧបត្ថម្ភដល់កម្មករនៅពេលដែលរោងចក្រព្យួរអាជីវកម្ម។ តែទំហំទឹកប្រាក់ត្រៀម សម្រាប់អន្តរាគមន៍មុខសញ្ញាខាងលើនេះ អាចនឹងមិនគ្រប់គ្រាន់ ក្នុងករណីប្រសិនបើស្ថានភាពនៃជំងឺកូវីដ-១៩ ត្រូវអូសបន្លាយយូរ ឬករណីមានការរីករាលដាលខ្លាំង។
រាជរដ្ឋាភិបាលក៏បានបង្កើនការផ្តល់ទុនកម្ចីចំនួន៥០លានដុល្លារអាមេរិក ដល់សហគ្រាសធុនតូចនិងមធ្យម តាមរយៈធនាគារអភិវឌ្ឍជនបទនិងកសិកម្ម ចំពោះវិស័យកសិកម្ម និងកសិ-ឧស្សាហកម្ម និងវិស័យផ្សេងទៀត ចំនួន ១០០ លានដុល្លារអាមេរិក បន្ថែមទៀតដោយក្នុងនោះ តាមរយៈធនាគារសហគ្រាសធុនតូចនិងមធ្យមចំនួន ៥០ លានដុល្លារអាមេរិក និង ធនាគារពាណិជ្ជ ចំនួន ៥០លានដុល្លារអាមេរិក៕ដោយ៖បញ្ញាស័ក្តិ
