ភ្នំពេញ៖សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានស្នើដល់ស្ថាប័នសារព័ត៌មានទាំងរដ្ឋ និងឯកជន ដែលត្រូវបានគេចាត់ទុកថាជាអំណាចកំពូលមួយ ដូចទៅនឹងអំណាចនីតិប្បញ្ញត្តិ អំណាចនីតិប្រតិបត្តិ និងអំណាចតុលាការដែរនោះ ត្រូវស្វះស្វែងតាមប្រមាញ់ផ្ដិតយករូបភាព និងសកម្មភាពរបស់ស្ថាប័នរដ្ឋឲ្យបានត្រឹមត្រូវ ហើយត្រូវចេះពាំនាំទុក្ខលំបាករបស់ប្រជាពលរដ្ឋ មកផ្សព្វផ្សាយប្រាប់ស្ថាប័នរដ្ឋវិញ ដើម្បីឲ្យស្ថាប័នពាក់ព័ន្ធទាំងនោះ ចាត់វិធានការដោះស្រាយទាន់ពេលវេលា។
សម្ដេចតេជោ ហ៊ុន សែន បានស្នើយ៉ាងដូច្នេះ ត្រូវបានធ្វើឡើងក្នុងឱកាសអញ្ជើញជួបសំណេះសំណាលដោយផ្ទាល់ ជាមួយអ្នកសារព័ត៌មាននិងអ្នកនាំពាក្យជាង៣ពាន់នាក់ នៅសាលពិព័រណ៍កោះពេជ្រ នាថ្ងៃទី២១ ខែមករា ឆ្នាំ២០១៨។
ក្នុងពេលមានប្រសាសន៍ទៅកាន់ក្រុមអ្នកសារព័ត៌មាន នាឱកាសដ៏ឱឡារឹកនោះ សម្ដេចតេជោនាយករដ្ឋមន្ត្រី បានផ្ដាំផ្ញើដល់អ្នកសារព័ត៌មានទាំងអស់ មិនថាសារព័ត៌មានរដ្ឋ ឬឯកជននោះទេ ត្រូវធ្វើយ៉ាងណាប្រឹងប្រែងស្វះស្វែងតាមប្រមាញ់រកព័ត៌មានដោយខ្លួនឯង និងត្រឹមត្រូវគ្រប់ជ្រុងជ្រោយ ទើបក្លាយជាអ្នកសារព័ត៌មានចំណាន។
ដោយសារកន្លងមក ចេះតែមានសារព័ត៌មានមួយចំនួនផ្សព្វផ្សាយមិនអាចទទួលបានផងនោះ ប្រមុខដឹកនាំរាជរដ្ឋាភិបាល ក៏បានស្នើដល់សារព័ត៌មាននូវសំណូមពរមួយចំនួន រួមមាន៖
ទី១៖ សម្ដេចតេជោ ចង់បានស្ថាប័នព័ត៌មានទាំងរដ្ឋ និងឯកជន ត្រូវបំពេញឲ្យបាននូវតួនាទីជាកញ្ចក់ឆ្លុះបញ្ចាំងនូវស្ថានភាពពិតប្រាកដក្នុងសង្គម ដាច់ខាតសារព័ត៌មានមិនត្រូវក្លាយជាកញ្ចក់បែកនោះឡើយ ព្រោះវាអាចជះឥទ្ធិពឡដ៏អាក្រក់ចំពោះសង្គមកម្ពុជា ដូច្នេះទាំងសារព័ត៌មានរដ្ឋ និងឯកជនត្រូវមានតម្លាភាព ដើម្បីធ្វើជាកញ្ចក់ឆ្លុះបញ្ចាំងជាមួយគ្នា។
ទី២៖ សម្ដេចចង់បានព័ត៌មានមួយដែលជួយផ្ដល់ព័ត៌មានពីស្ថាប័នរដ្ឋទៅឲ្យប្រជាពលរដ្ឋ និងពីប្រជាពលរដ្ឋមកស្ថាប័នរដ្ឋវិញ ពោលសារព័ត៌មាន និងស្ថាប័នរដ្ឋត្រូវជួយគ្នាទៅវិញទៅមក ដើម្បីជួយជ្រោមជ្រែងសង្គមកម្ពុជាមួយនេះឲ្យកាន់តែរីកចម្រើន។ សម្ដេចបានបញ្ជាក់ថា សារព័ត៌មានមានសារសំខាន់ខ្លាំងណាស់ រវាងគោលនយោបាយរបស់រដ្ឋជាមួយប្រជាពលរដ្ឋ ដូច្នេះសម្ដេចបានស្នើឲ្យស្ថាប័នព័ត៌មាន និងស្ថាប័នរដ្ឋ ជួយបំពេញគ្នាទៅវិញទៅមក តាមរយៈការបញ្ជូនសារទាក់ទងទៅនឹងក្របខណ្ឌគោលនយោបាយរបស់រដ្ឋទៅដល់ប្រជាពលរដ្ឋ ហើយនាំទុក្ខកង្វល់របស់ប្រជាពលរដ្ឋប្រាប់មកស្ថាប័នរដ្ឋវិញ ដោយឆ្លុះបញ្ចាំងការពិតជាក់ស្ដែង។
ទី៣៖ សម្ដេចតេជោចង់បានព័ត៌មានចេះជួយរិះគន់ក្នុងន័យស្ថាបនា ចេះជួយតាមពិនិត្យការអនុវត្តរបស់ស្ថាប័នរដ្ឋ ដោយប្រៀបធៀបជាមួយនឹងនយោបាយ ឬកម្មវិធីដែលបានដាក់ចេញ ព្រោះនេះជាចំណុចមិនអាចខ្លះបាននៅក្នុងសង្គមប្រជាធិបតេយ្យ។
ទី៤៖ សម្ដេចតេជោនាយករដ្ឋមន្ត្រី ចង់បានស្ថាប័នព័ត៌មាន ដែលមានលទ្ធភាពចូលរួមវិភាគយុទ្ធសាស្ត្រនយោបាយ ក្នុងក្របខណ្ឌជាតិ និងអន្តរជាតិ។ សម្ដេចតេជោបានលើកឡើងថា កុំឲ្យសារព័ត៌មានអន្តរជាតិសរសេរពីកម្ពុជា អ្នកសារព័ត៌មានកម្ពុជាគួរតែសរសេរពីអន្តរជាតិវិញម្ដង។
សម្ដេចបានបញ្ជាក់ថា គ្រប់មជ្ឈដ្ឋានទាំងអស់ត្រូវគោរពសេរីភាពនៃសារព័ត៌មាន ប៉ុន្តែអ្នកសារព័ត៌មានខ្លួនឯង ក៏ត្រូវហ៊ានទទួលខុសត្រូវចំពោះការសរសេរ និងពាក្យសម្ដីរបស់ខ្លួន។
សម្តេចតេជោ ហ៊ុន សែន នាយករដ្ឋមន្ត្រី សប្បាយរីករាយយ៉ាងខ្លាំងដែលបាន អញ្ជើញមកជួបជុំសំណេះសំណាលជាមួយបងប្អូនកូនក្មួយជាអ្នកសារព័ត៌មានជាតិ គោលបំណងដើម្បី ស្វែងយល់អំពីសុខទុក្ខផ្ទាល់របស់បងប្អូនអ្នកសារព័ត៌មាន និងបានផ្តល់នូវ អនុសាសន៍ល្អៗ ដើម្បីជំរុញការផ្សព្វផ្សាយព័ត៌មានអោយបានល្អត្រឹមត្រូវតាមក្រមសីលធម៍ច្បាស់លាស់ដើម្បីបំរើសង្គមជាតិឲ្យកាន់តែរីកចម្រើន។
សម្តេចតេជោ ហ៊ុន សែន នាយករដ្ឋមន្ត្រី បានមានប្រសាសន៍ថា បច្ចុប្បន្ននេះវិស័យសារព័ត៌មានកំពុងមានការីកចម្រើនយ៉ាងខ្លាំង។ ដើម្បីផលិតព័ត៌មានឲ្យបានល្អ អ្នកសារព័ត៌មានទាំងអស់ត្រូវយល់ដឹងឲ្យបានច្បាស់នូវរឿងរ៉ាវពិតដែលបានកើតមានឡើងក្នុងសង្គម ជាពិសេសត្រូវសរសេរព័ត៌មានទាំងល្អ និងមិនល្អដើម្បីចូលរួមធ្វើការកែលម្អក្នុងន័យស្ថាបនាអភិវឌ្ឍន៍សង្គមឲ្យរីកចម្រើន។
សម្តេចតេជោ ហ៊ុន សែន បានមានប្រសាសន៍ ហាមដាច់ខាតចំពោះសារព័ត៌មានមួយចំនួន ដែលផ្សាយព័ត៌មានគ្មានប្រភពច្បាស់លាស់ ហើយគំរាមកំហែង (ម៉ាហ្វា) ជំរិតទារប្រាក់ ពិសេសដូចជាការផ្សាយទាក់ទងពីបទល្មើសព្រៃឈើជាដើម។ ត្រូវធ្វើជាអ្នកសារព័ត៌មានដែលពិតប្រាកដ កុំធ្វើជាសារព័ត៌មានក្លែងក្លាយផ្សាយព័ត៌មានមិនពិតធ្វើឲ្យប៉ះពាល់ដល់សង្គមជាខ្លាំង។ សូមអ្នកនិយាយព័ត៌មានកុំតាំងខ្លួនជាចៅក្រមកាត់សេចក្តី ត្រូវនិយាយអ្វីពិតដែលមានប្រភពច្បាស់លាស់ មិនត្រូវអារកាត់ដោយខ្លួនឯងឡើយ ត្រូវគោរពក្រមសីលធម៌វិជ្ជាជីវៈសារព័ត៌មាន។
សម្តេចតេជោ ហ៊ុន សែន នាយករដ្ឋមន្ត្រីបានមានប្រសាសន៍ផងដែរថា ថ្នាក់ដឹកនាំ និងអ្នកសារព័ត៌មានតែងតែមានទំនាក់ទំនងគ្នា ពីព្រោះត្រូវផ្តល់ព័ត៌មានឲ្យគ្នាទៅវិញទៅមកតាមរយៈក្រុមជំនួយការ ឬទីប្រឹក្សា។ សូមអ្នកនាំពាក្យតាមស្ថាប័នក្រសួងត្រូវពង្រឹងសម្ថភាពរបស់ខ្លួន ត្រូវមានចំនេះដឹងច្បាស់លាស់ត្រឹមត្រូវក្នុងការផ្តល់ព័ត៌មាន។ អ្នកសារព័ត៌មានត្រូវស្វះស្វែងខិតខំយកព័ត៌មានដោយខ្លួនឯង កុំយកព័ត៌មានពីគេមកផ្សាយដោយគ្មានប្រភពច្បាស់លាស់ ឬពត៌មានផ្អូម។
សម្តេចតេជោ ហ៊ុន សែន បានសំណូមពរដល់ស្ថាប័នសារព័ត៌មានទាំងអស់នូវចំនុចសំខាន់ៗមួយចំនួនដូចជា:
១)ស្ថាប័នព័ត៌មានទាំងអស់ ត្រូវដើរតួនាទីជាស្ថាប័នព័ត៌មានពិត គឺជាកញ្ចក់ឆ្លុះបញ្ចាំងពីសង្គមជាតិពិតប្រាកដ។ សូមកុំឲ្យកញ្ចក់នោះជាកញ្ចក់ដែលបែកធ្លុះផ្សាយព័ត៌មានមិនពិតពីសង្គម។
២) ស្ថាប័នព័ត៌មានរដ្ឋ និងឯកជនត្រូវផ្សព្វផ្សាយព័ត៌មានពិតជាមួយនឹងការពន្យល់ច្បាស់លាស់ទៅប្រជាពលរដ្ឋអោយបានយល់ជ្រួលជ្រាបអំពីទិសដៅនិងគោលបំណងរបស់រាជរដ្ឋាភិបាល។
៣)ស្នើអោយសារព័ត៌មានត្រូវចេះចូលរួមជួយរិះគន់ដើម្បីស្ថាបនារាល់កំហុសឆ្គង និងផែនការដែលបានដាក់ចេញ នៃក្រសួងស្ថាប័ននានា ដើម្បីធ្វើការកែលំអរ។ មិនមែនរិះគន់ដើម្បីតែជាន់ពន្លិចនោះទេ។ សម្តេចតេជោ ក៏ចង់ឲ្យអ្នកសារព័ត៌ជាតិមានក្លាយទៅជាអ្នកវិភាគផងដែរចំពោះព្រឹត្តិការណ៍ក្រៅប្រទេស ពីព្រោះកន្លងមកមានបរទេសគេវិភាគ និងផ្សាយពីកម្ពុជាផងដែរ។
៤) កុំធ្វើជាអ្នកសារព័ត៌មានសម្រាប់តែជម្រិតទាលុយពីគេ។
៥) ត្រូវធ្វើនិងផ្សព្វផ្សាយព័ត៌មានឲ្យរហ័សទាន់ពេលវេលា កុំអោយព័ត៌មានយឺត (ព័ត៌មានផ្អូម)។
៦)ត្រូវជ្រើសរើសម៉ោងផ្សាយណាមួយដែលគេចង់មើល ចៀសវាងផ្សាយនៅថ្ងៃ សុក្រ សៅរ៍ ឬថ្ងៃអាទិត្យ ដែលគ្មានអ្នកចង់មើល។
នៅចុងបញ្ចប់ សម្តេចតេជោ ហ៊ុន សែន នាយករដ្ឋមន្ត្រី បានជូនពរដល់បងប្អូនកូនក្មួយជាអ្នកសារព័ត៌មានទាំងអស់គឺទាំងរួមទាំងអ្នកសរសេររិះគន់ ជួបតែសេចក្តីសុខ សេចក្តីចម្រើនគ្រប់ៗគ្នា និងបានសប្បាយរីករាយក្នុងការបរិភោគអាហារសាមគ្គីនាពេលរាត្រីយប់នេះ៕ ដោយ៖កូឡាប
