ខេត្តស្វាយរៀងៈ លោកជំទាវ ដួង វណ្ណាបានអំពាវនាវ ដល់ប្រជាពលរដ្ឋទូទាំងប្រទេស បន្តអនុវត្តតាមការណែនាំរបស់ក្រសួងសុខាភិបាល ឱ្យបានត្រឹមត្រូវ ដើម្បីចូលរួមទប់ស្កាត់ការរីករាលដាលនៃជំងឺឆ្លងកូវីដ១៩ ពិសេសការថែរក្សាសុខភាពផ្ទាល់ខ្លួនឱ្យបានរឹងមាំ ការធ្វើអនាម័យ លាងសម្អាតដៃជាប្រចាំ និងត្រូវចេះតាមដានសុខភាព បើមានការសង្ស័យ ត្រូវប្រឹក្សាជាមួយគ្រូពេទ្យជំនាញ ឬក៏ទាក់ទងទូរស័ព្ទទៅលេខ ១១៥ ។
លោក វូ ម៉ៅ ប្រធានសមាកមន៍មិត្តភាពកម្ពុជា វៀតណាម បានឧបត្ថម្ភអាល់កុលចំនួន ៥០០ ដប ម៉ាស់ពេទ្យ ៧,៥០០ ម៉ាស់ ម៉ាស់ក្រណាត់ ៥,០០០ ម៉ាស និងថវិកា ចំនួន ៥០ លានដុង ជូនដល់លោកស្រី ដួង វណ្ណា តំណាងរាស្ត្រមណ្ឌលស្វាយ រៀង ដើម្បីចុះយុទ្ធនាការប្រយុទ្ធប្រឆាំងជំងឺកូវីដ ១៩ នៅព្រឹកថ្ងៃទី ២២ ខែមេសា ឆ្នាំ២០២០។
ក្នុងឱកាសនោះលោកជំទាវ ដួង វណ្ណា បាននាំមកនូវ ប្រសាសន៍របស់សម្តេចតេជោ ហ៊ុនសែន នាយករដ្ឋមន្ត្រីនៃ ព្រះរាជាណាចក្រកម្ពុជា ដែលផ្តាំផ្ញើសួរសុខទុក្ខ និងថ្លែងអំណរគុណយ៉ាងជ្រាលជ្រៅចំពោះទឹកចិត្តដ៏សប្បុរសរបស់លោក វូ ម៉ៅ ដែលបានឧបត្ថម្ភជាអាល់កុល ម៉ាស សម្រាប់ប្រយុទ្ធនឹងជំងឺកូវីដ ១៩ ហើយលោកជំទាវ នឹង ចាត់ចែងបែកចែកសម្ភារទាំងនេះ ទៅតាមស្រុកនានាក្នុងខេត្ត ដើម្បីប្រើប្រាស់ទៅតាមតម្រូវការចាំបាច់ ជាពិសេសក្នុងយុទ្ធនាការទប់ស្កាត់ការរីករាលដាល និងប្រយុទ្ធនឹងជំងឺកូវីដ១៩ នៅក្នុងព្រះរាជាណាចក្រកម្ពុជា ។
លោកជំទាវ ដួង វណ្ណា បានសម្តែងនូវការកោតសរសើរ ចំពោះកាយវិការមនុស្សធម៌របស់លោក ដែលបានចូលរួមចំណែកផ្តល់នូវសម្ភារ សម្រាប់ពលរដ្ឋប្រើប្រាស់ក្នុងការការពារជំងឺកូវីដ ១៩ ។ លោកជំទាវបានគូសបញ្ជាក់ថា នេះការចូលរួមចំណែកយ៉ាងសំខាន់ និងបានឆ្លុះបង្ហាញពីស្មារតីសាមគ្គីនិងវប្បធម៌ជួយគ្នាទៅវិញ ទៅមកក្នុងគ្រាមានអាសន្ន និងចាំបាច់ ។
លោកជំទាវ ដួង វណ្ណា បានថ្លែងអំណរគុណ ចំពោះប្រមុខដឹកនាំរាជរដ្ឋាភិបាល មន្ត្រីសុខាភិបាល អាជ្ញាធរពាក់ព័ន្ធ ដៃគូអភិវឌ្ឍន៍នានា បងប្អូនប្រជាពលរដ្ឋគ្រប់ទិសទី ពិសេសក្រុមគ្រូពេទ្យជំនាញ ដែលបានខិតខំបំពេញ ការងារ ដ៏លំបាកនេះ ទាំងថ្ងៃ ទាំងយប់ ដើម្បីការពារសុខភាពប្រជាពលរដ្ឋ ។
លោកជំទាវ បានបន្ថែមទៀតថា ចំពោះសកម្មភាពនៃការផ្សព្វផ្សាយ អប់រំ ដល់ប្រជាពលរដ្ឋឱ្យយល់ដឹង ពីវិធានការការពារ និងចូលរួមទប់ស្កាត់ ការឆ្លងរីករាលដាល នៃជំងឺកូវីដ១៩ ព្រមទាំងការជួយសង្គ្រោះ ដល់ប្រជាពលរដ្ឋដែលមានជីវភាពក្រីក្រលំបាក មិនមែនបញ្ចប់ត្រឹមតែប៉ុណ្ណេះទេ គឺក្រុមការងារនៅតែបន្តធ្វើជាប់ជាប្រចាំ ដើម្បីជួយដល់ប្រជាពលរដ្ឋ និងប្រយុទ្ធប្រឆាំងនឹងជំងឺឆ្លងកូវីដ ១៩ ដ៏កាចសាហាវមួយនេះ៕ ដោយ៖ វ៉ៃកូ