ខេត្តស្វាយរៀង ៖ អភិបាលខេត្តស្វាយរៀង បានស្នើឲ្យមន្ទីរធម្មការ និងសាសនាខេត្ត បន្តចូលរួមក្នុងយុទ្ធនាការផ្សព្វផ្សាយ នៅតាមទីវត្តអារាមនានា ដើម្បីរួមចំណែកធ្វើឲ្យកិច្ចការបង្ការ ទប់ស្កាត់ការឆ្លងរាលដាលនៃជំងឺកូវីដ១៩ នៅក្នុងខេត្តស្វាយរៀង កាន់តែទទួលបានជោគជ័យ។
ឯកឧត្តម ម៉ែន វិបុល អភិបាលខេត្តស្វាយរៀង បានថ្លែងបែបនេះ ក្នុងឱកាសទទួលយកអំណោយជាថវិកា ចំនួន ២.៧០០.០០០រៀល ពីលោក ទីវ សុភា ប្រធានមន្ទីរធម្មការ និងសាសនា ខេត្តស្វាយរៀង ព្រមទាំងមន្ត្រីក្របខណ្ឌ-មន្ត្រីកិច្ចសន្យា និងគ្រូពុទ្ធិកក្របខណ្ឌ-គ្រូពុទ្ធិកកិច្ចសន្យា នាព្រឹកថ្ងៃទី២២ ខែមេសា ឆ្នាំ២០២០នេះ នៅសាលប្រជុំសាលាខេត្ត ។
ឯកឧត្តមអភិបាលខេត្ត បានមានប្រសាសន៍កោតសរសើរនូវទឹកចិត្តដ៏ប្រពៃ របស់លោកប្រធានមន្ទីរធម្មការ និងសាសនាខេត្តស្វាយរៀង ព្រមទគ្រូពុទ្ធិរាជការនៃមន្ទីរ ដែលបានចូលរួមបរិច្ចាគនូវថវិកាផ្ទាល់ខ្លួន ដល់រដ្ឋបាលខេត្តសម្រាប់គាំទ្រ ការងារប្រយុទ្ធប្រឆាំង នឹងការរីករាលដាលនៃជំងឺកូវីដ១៩ ដែលនេះពិតជាសរបញ្ជាក់ឲ្យឃើញ ពីកាយវិការប្រកបដោយសប្បុរស និងជាវប្បធម៌នៃការចែករំលែក ជួយគ្នាក្នុងគ្រាលំបាក ហើយថវិកានេះ រដ្ឋបាលខេត្តនឹងយកទៅប្រើប្រាស់ បម្រើឲ្យសកម្មភាពនានា នៅមូលដ្ឋាន ទាំងការងារផ្សព្វផ្សាយ អប់រំពីវិធានការបង្ការ ទប់ស្កាត់ការឆ្លងរាលដាលនៃជំងឺកូវីដ១៩ ។
ឯកឧត្តមអភិបាលខេត្ត បានថ្លែងថា មន្ត្រីរាជការទាំងអស់នៃមន្ទីរធម្មការ និងសាសនាខេត្តស្វាយរៀង កន្លងមក បានចូលរួមចំណែក លើការងារជាច្រើនលើវិស័យសាសនា និងសង្គម យ៉ាងសកម្មជាមួយរដ្ឋបាលខេត្ត ដែលសបញ្ជាក់ឲ្យឃើញ ពីកាយវិការប្រកបដោយសប្បុរស និងភាពមិនអាចខ្វះបាន នូវការរួមចំណែកនៃវិស័យពុទ្ធចក្រ ចូលរួមជាមួយវិស័យអាណាចក្រ ក្នុងកិច្ចការដោះស្រាយបញ្ហាសង្គម ហើយរដ្ឋបាលខេត្ត នឹងយកអំណោយ ដែលបានផ្ដល់ជូននៅថ្ងៃនេះ ទៅប្រើប្រាស់បម្រើឲ្យសកម្មភាពនានា ទាំងការងារផ្សព្វផ្សាយអប់រំ ពីវិធានការបង្ការ ទប់ស្កាត់ការឆ្លងរាលដាលនៃជំងឺកូវីដ១៩ និងការងារសង្គម ជួយឧបត្ថម្ភដល់ប្រជាពលរដ្ឋ ដែលទទួលរងនូវផលប៉ះពាល់នៅមូលដ្ឋាន ស្របតាមអនុសាសន៍ដ៏ខ្ពង់ខ្ពស់ របស់សម្ដេចតេជោ នាយករដ្ឋមន្ត្រី ដែលទោះជាក្នុងកាលៈទេសៈណាក៏ដោយ មិនត្រូវឲ្យបងប្អូនប្រជាពលរដ្ឋណាម្នាក់ រស់នៅដោយអត់ស្បៀង ឬអាហារសម្រាប់បរិភោគនោះឡើយ ។
ឯកឧត្តមអភិបាលខេត្ត ក៏បានបង្ហាញនូវសេចក្ដីសង្ឃឹមជឿជាក់ថា តាមរយៈមន្ទីរធម្មការ និងសាសនាខេត្ត នឹងបន្តចូលរួមក្នុងយុទ្ធនាការផ្សព្វផ្សាយ នៅតាមទីវត្តអារាមនានា ដើម្បីរួមចំណែកធ្វើឲ្យកិច្ចការបង្ការ ទប់ស្កាត់ការឆ្លងរាលដាលនៃជំងឺកូវីដ១៩ នៅក្នុងខេត្តស្វាយរៀង កាន់តែទទួលបានជោគជ័យ និងទប់ស្កាត់បានជាបន្តទៀត មិនឲ្យមានប្រជាពលរដ្ឋ ឆ្លងនូវជំងឺរាតត្បាត ដ៏កាចសាហាវមួយនេះ ៕ ដោយ៖វ៉ៃកូ