ភ្នំពេញ ៖ ទីស្តីការគណៈរដ្ឋមន្ត្រី នៅព្រលប់ថ្ងៃទី២២ ខែមេសា ឆ្នាំ២០២០នេះ បានចេញសេចក្ដីប្រកាសព័ត៌មាន លើសន្និសីទសារព័ត៌មាន ស្ដីពី”ការគ្រប់គ្រងប្រទេសជាតិស្ថិតក្នុងភាពអាសន្ន” បន្ទាប់ពីធ្វើសន្និសីទសារព័ត៌មានចប់ ។
បើតាមឯកឧត្តម ផៃ ស៊ីផាន អ្នកនាំពាក្យរាជរដ្ឋាភិបាល បានថ្លែងថា នៅថ្ងៃពុធ ទី២២ ខែមេសា ឆ្នាំ២០២០ វេលាម៉ោង៩ និង៣០នាទីព្រឹក អង្គភាពអ្នកនាំពាក្យរាជរដ្ឋាភិបាលបានរៀបចំសន្និសីទសារព័ត៌មានស្តីពី “ការគ្រប់គ្រងប្រទេសជាតិ ស្ថិតក្នុងភាពអាសន្ន” ដែលមានវាគ្មិនអញ្ជើញចូលរួមគឺ ឯកឧត្ដម ជិន មាលីន រដ្ឋលេខាធិការ និងជាអ្នកនាំពាក្យក្រសួងយុត្តិធម៌។
ទីស្តីការគណៈរដ្ឋមន្ត្រី បានលើកឡើងថា កូវីដ១៩ គឺជាភាពចាំបាច់ និងមានសារសំខាន់ណាស់ ដើម្បីជាវិធានការការពារ កាលៈទេសៈណាមួយកើតឡើង ជាយថាហេតុណាមួយ យ៉ាងណាមិញ កម្ពុជាមិនមានការចាំបាច់អនុវត្តច្បាប់នេះ ស្របពេលកូវីដ១៩នេះអាចគ្រប់គ្រងបាន នេះជាការលើកឡើងដោយលោកអ្នកនាំពាក្យក្រសួងយុត្តិធម៌។
គណៈរដ្ឋមន្ត្រី បានបញ្ជាក់ថា “ការបង្កើតឲ្យមានច្បាប់នេះ ឡើង មិនស្ថិតនៅក្នុងគោលការណ៍ ដើម្បីរិតត្បិត ឬរំលោភបំពានសិទ្ធិប្រជាពលរដ្ឋនោះទេ ប៉ុន្តែច្បាប់នេះ បង្កើតឡើងដើម្បីពង្រឹងប្រជាធិបតេយ្យ នីតិរដ្ឋ និងសិទ្ធិមនុស្សនៅកម្ពុជា”៕
ដោយ៖កូឡាប
