បន្ទាយមានជ័យ ៖ ឯកឧត្តម នាយឧត្តមសេនីយ៍ កែ គឹមយ៉ាន បានថ្លែងបន្តថា កម្ពុជា ក្រោមការដឹកនាំដ៏ឈ្លាសវៃរបស់សម្តេចតេជោ ហ៊ុន សែន បានដាក់ចេញនូវវិធានការប្រកបដោយភាពស្វាហាប់ ដើម្បីបង្ការកុំឱ្យមានការរីករាលដាលជំងឺ COVID-19 នៅកម្ពុជា និងរក្សាបាននូវទំនាក់ទំនង ជាប្រចាំជាមួយអន្តរជាតិ តាមរយៈកាយវិការមនុស្សធម៌ និងបានធ្វើឲ្យទំនាក់ទំនងកម្ពុជា និងចិនកាន់តែស៊ីជម្រៅ បង្ហាញពីការជួយគ្នាក្នុងគ្រាក្រ។
ថ្ងៃទី២៣ ខែមេសា ឆ្នាំ២០២០ ឯកឧត្ដម នាយឧត្តមសេនីយ៍ កែ គឹមយ៉ាន អ្នកតំណាងរាស្ត្រ ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ បានអញ្ជើញចុះជួបសំណេះសំណាល និងចែកអំណោយដល់ប្រជាពលរដ្ឋក្រីក្រ ជួបការលំបាកចំនួន១៥០០គ្រួសារ នៅខេត្តបន្ទាយមានជ័យ ។
ក្នុងឱកាសនោះ ឯកឧត្តម នាយឧត្តមសេនីយ៍ កែ គឹមយ៉ាន វាយតម្លៃខ្ពស់ចំពោះអាជ្ញាធរមានសមត្ថកិច្ច គ្រប់លំដាប់ថ្នាក់ ប្រជាពលរដ្ឋ ថ្នាក់ដឹកនាំ និងគ្រប់សាសនា នៅក្នុងកាលៈទេសៈប្រទេសកំពុងប្រឈមមុខ នឹងការគំរាមកំហែង នៃជំងឺរាតត្បាតCOVID-19 បានរួមគ្នាជាធ្លុងមួយប្រកបដោយស្មារតីទទួលខុសត្រូវខ្ពស់អនុវត្តតាមការអំពាវនាវ និងណែនាំរបស់រាជរដ្ឋាភិបាល ព្រមទាំងបរិច្ចាគធនធាន និងសម្ភារផ្ទាល់ខ្លួនដល់គណៈកម្មការជាតិប្រយុទ្ធនឹងជំងឺកូវីដ១៩ ។
ជាមួយនឹងបញ្ហាកូវីដ១៩ ពុំទាន់មានសញ្ញាធូរស្រាលនោះ ឯកឧត្តម នាយឧត្តមសេនីយ៍ កែ គឹមយ៉ាន បានសំណូមពរដល់អ្នកពាក់ព័ន្ធទាំងអស់ ត្រូវខិតខំថែរក្សាសុខសន្តិភាព សណ្តាប់ធ្នាប់សាធារណៈ ទប់ស្កាត់ព័ត៌មានក្លែងក្លាយបង្កចលាចលសម្របសម្រួលចរាចរទំនិញឆ្លងកាត់ បន្តអនុវត្តតាមការណែនាំរបស់រាជរដ្ឋាភិបាល រក្សាគម្លាតសុវត្ថិភាព អនាម័យជាប្រចាំ មិនចេញក្រៅបើមិនចាំបាច់ បន្តអនុវត្តការធ្វើចត្តាឡីស័កពលករ ដែលមកពីក្រៅប្រទេសនិងកម្មករដែលត្រឡប់មកពីស្រុកកំណើត ក្នុងកំឡុងពេលចូលឆ្នាំ បន្តព្យាបាល ថែទាំអ្នកជំងឺកូវីដ១៩ បន្តឧបត្ថម្ភស្បៀងសង្គ្រោះដល់គ្រួសារជនក្រីក្ររងផលប៉ះពាល់ធ្ងន់ធ្ងរដោយសារជំងឺកូវីដ១៩ បំផុស ជំរុញឱ្យធ្វើកសិកម្ម ដាំដំណាំរួមផ្សំ ចិញ្ចឹមសត្វដើម្បីជួយទ្រទ្រង់សេដ្ឋកិច្ចគ្រួសារជំរុញការរៀនសូត្រតាមប្រព័ន្ធ online ដើម្បីពង្រឹងចំណេះដឹង និងគុណភាពសិក្សានិងប្រែក្លាយបញ្ហាប្រឈមពីជំងឺកូវីដ១៩ ឱ្យក្លាយទៅជាកាលានុវត្តន៍ថ្មីប្រែក្លាយធនធានមនុស្សជំនាន់ថ្មីក្លាយជាធនធានដ៏មានសក្តានុពលសម្រាប់អភិវឌ្ឍន៍សេដ្ឋកិច្ចជាតិ ដើម្បីសម្រេចបានតាមចក្ខុវិស័យ ជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងប្រទេសអភិវឌ្ឍន៍នៅឆ្នាំ២០៥០៕ ដោយ៖កូឡាប
