ប្រទេសថៃ៖ នៅថ្ងៃចន្ទនេះ បានរកឃើញអ្នកផ្ទុកវីរុសកូរ៉ូណាចំនួន ៩នាក់បន្ថែមទៀត និងមានអ្នកស្លាប់ម្នាក់ទៀត បណ្តាលឲ្យតួលេខនៃអ្នកឆ្លងសរុបក្នុងប្រទេសហក់ឡើងដល់ ២.៩៣១នាក់ ចំណែកអ្នកស្លាប់បានកើនដល់ ៥២នាក់។
នេះគឺជាលើកដំបូងហើយ ចាប់តាំងពីមានការផ្ទុះវីរុសកាលពីខែមករាមក ដែលមិនមានការឆ្លងថ្មីនៅក្នុងទីក្រុងបាងកក។ នេះជាការបញ្ជាក់របស់លោក Taweesin Wisanuyothin អ្នកនាំពាក្យរបស់មជ្ឍមណ្ឌលគ្រប់គ្រងស្ថានភាព COVID-19។
ក្នុងចំណោមករណីឆ្លងថ្មី មាន ៣ករណីពាក់ព័ន្ធករណីមុនៗ ខណៈដែល ២ករណីទៀតជាការឆ្លងមកពីក្រៅប្រទេស ដែលត្រូវបានដាក់ឲ្យស្ថិតនៅដាច់ដោយឡែក និង ៤ករណីទៀតឆ្លងនៅក្នុងខេត្ត Yala ជាកន្លែងដែលអាជ្ញាធរបានធ្វើតេស្តយ៉ាងច្រើនលើប្រជាជនដោយសារតែមានអត្រាឆ្លងខ្ពស់។
អ្នកស្លាប់ចុងក្រោយបង្អស់គឺជាស្ត្រីវ័យ ៦៤ឆ្នាំ។
សូមបញ្ជាក់ថា ក្នុងចំណោមអ្នកឆ្លងសរុបជិត ៣.០០០នាក់ មានអ្នកជំងឺចំនួន ២.៦០៩នាក់បានជាសះស្បើយ និងបានត្រឡប់ទៅផ្ទះវិញ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia