ខេត្តកំពង់ឆ្នាំង៖ ភ្ញៀវទេសចរជនជាតិខ្មែរមួយក្រុម មានគ្នា ៤នាក់បានដើរលេងកម្សាន្តក្នុងព្រៃ ហើយវង្វេងផ្លូវបាត់ខ្លួនអស់រយៈពេល ៩ម៉ោង ទើបកម្លាំងអាជ្ញាធររកឃើញ នៅតំបន់រមណីយដ្ឋានធម្មជាតិទឹកធ្លាក់ថ្មក្រាល ដែលមានទីតាំងស្ថិតក្នុងភូមិចំកាម៉ុច ឃុំជៀប ស្រុកទឹកផុស ខេត្តកំពង់ឆ្នាំង កាលពីរសៀលថ្ងៃ២៦មេសា២០២០។
លោក សេង សាលី ប្រធានមន្ទីរទេសចរណ៍ខេត្តកំពង់ឆ្នាំងថ្លែងថា ក្នុងចំណោមភ្ញៀវទេសចរណ៍ទាំង ៦នាក់ មាន៤នាក់ ក្នុងនោះមានស្រីម្នាក់ផងដែរ បាននាំគ្នាដើរឡើងទៅលើកំពូលភ្នំជាកន្លែងទឹកធ្លាក់ ដែលគេហៅថាចំណុច «ស្រែទាក» ដោយពួកគេបានឡើង តាំងពីម៉ោង ២រសៀល រហូតដល់ម៉ោង ៨យប់ នៅតែមិនឃើញត្រឡប់មកវិញ ទើបអ្នកដែលរង់ចាំនៅខាងក្រោម ២នាក់ មានការជ្រួលច្របល់ ក៏បានទូរស័ព្ទទៅសមត្ថកិច្ចដើម្បីឲ្យមកជួយរុករក។
បន្ទាប់ពីដំណឹងនេះបានឮដល់អភិបាលខេត្តកំពង់ឆ្នាំង ឯកឧត្តមឈួរ ច័ន្ទឌឿន លោកក៏បានបញ្ជាកងកម្លាំងរួមមាន អាជ្ញាធរស្រុក អធិការស្រុក មន្ត្រីទេសចរណ៍ អាជ្ញាធរមូលដ្ឋាន ប្រជាការពារ កម្លាំងបរិស្ថានដែលឈរជើងនៅតំបន់នោះច្រើននាក់ នាំគ្នាឡើងរុករករហូត ដល់ម៉ោង១០និង៤៧នាទីយប់ ទើបប្រទះឃើញអ្នកទាំង៤នាក់នោះកំពុងនាំគ្នាដើរនៅក្នុងព្រៃលើកំពូលភ្នំ។
ពេលមកដល់ខាងក្រោម នៅពេលដែលអាជ្ញាធរសួរនាំ ទៅអ្នកទាំង៤នាក់ថា តើមូលហេតុអី្វបានជាពួកគេ មិនព្រមចុះពីលើកំពូលភ្នំនេះមក ពួកគេទាំង៤នាក់ក៏បានឆ្លើយដូចៗគ្នាថា នៅទីនោះសប្បាយណាស់ ពួកគេមិនចង់ចុះមកវិញទេ ចង់នៅលេងទីនោះជាបន្តទៀត ដោយសារតែពួកគេ មិនដែលជួបប្រទះកន្លែងណា ដែលសប្បាយដូចនៅទីនោះឡើយ។
រមណីយដ្ឋានធម្មជាតិទឹកធ្លាក់ថ្មក្រាល មានទីតាំងស្ថិតក្នុងភូមិកោះខ្ទុំ ឃុំជៀប ស្រុកទឹកផុស ខេត្តកំពងឆ្នាំង។ បើគេធ្វើដំណើរចេញពីរាជធានីភ្នំពេញ លើផ្លូវជាតិលេខ៥ រហូតទៅដល់ស្រុកកំពង់ត្រឡាច ម្តុំសាលាលេខ៥នោះ រមណីយដ្ឋានធម្មជាតិទឹកធ្លាក់ថ្មក្រាល ស្ថិតនៅទិសដៅខាងឆ្វេងដៃផ្លូវនេះ ពោលរមណីយដ្ឋាននេះ ស្ថិតនៅភាគខាងលិច នៃខេត្តកំពង់ឆ្នាំង ប្រមាណ៥០គីឡូម៉ែត្រ៕ដោយ បញ្ញាស័ក្តិ
