បាត់ដំបង ៖ កម្លាំងប៉ូលិសការិយាល័យប្រឆាំងគ្រឿងញៀនខេត្តបាត់ដំបង បានចាប់បុរស៣នាក់ ជួញដូររក្សាទុកនិងថ្នាំម៉ាទឹកកក៦ថង់ សម្ភារពាក់ព័ន្ធមួយចំនួនទៀត កសាងសំណុំរឿងបញ្ជូនទៅតុលាការ ដើម្បីចាត់ការទៅតាមផ្លូវច្បាប់ នៅថ្ងៃទី២៨ ខែមេសា ឆ្នាំ២០២០។
ហេតុការណ៍ចាប់ឃាត់ខ្លួនបុរស៣នាក់នេះ បានធ្វើឡើង កាលពីម៉ោង១៣និង០០នាទី ថ្ងៃទី២៧ ខែមេសា ឆ្នាំ២០២០ នៅចំណុចវាលស្រែភូមិគោកដូង ឃុំពាមឯក ស្រុកឯកភ្នំ ខេត្តបាត់ដំបង។
លោកសុខ និមល នាយការិយាល័យប្រឆាំងបទល្មើសគ្រឿងញៀនខេត្តបាត់ដំបង បានឲ្យដឹងថា ជនសង្ស័យ៣នាក់ ដែលចាប់ឃាត់ខ្លួន ទី១ ឈ្មោះពៅ ប្រាំ ហៅវិម ភេទប្រុស អាយុ២៩ឆ្នាំ រស់នៅភូមិព្រៃទទឹង ឃុំអូរតាគី ស្រុកថ្មគោល ខេត្តបាត់ដំបង។ ទី២ ឈ្មោះម៉េត សាមើយ ហៅឈីង ភេទប្រុស អាយុ២០ឆ្នាំ រស់នៅភូមិត្រាង ឃុំអូរតាគី ស្រុកថ្មគោល ខេត្តបាត់ដំបង។ ទី៣ ឈ្មោះផាន សុផស្ស ភេទប្រុស អាយុ២៥ឆ្នាំ រស់នៅភូមិព្រៃទទឹង ឃុំអូរតាគី ស្រុកថ្មគោល ខេត្តបាត់ដំបង។ ក្នុងប្រតិបត្តិការនេះ កម្លាំងដកហូតបានថ្នាំម៉ាទឹកកក៦ថង់ សម្ភារសម្រាប់ប្រើប្រាស់ថ្នាំញៀនមួយចំនួនទៀត ហើយចាប់ឃាត់ខ្លួន កាលពីម៉ោង១៣និង០០នាទីថ្ងៃទី២៧ ខែមេសា ឆ្នាំ២០២០ នៅចំណុចវាលស្រែភូមិគោកដូង ឃុំពាមឯក ស្រុកឯកភ្នំ ខេត្តបាត់ដំបង។
លោកសុខ និមល បានបញ្ជាក់ថា កម្លាំងបានសហការជាមួយកម្លាំងប៉ូលិសស្រុក ចុះបង្ក្រាបបានករណីរនេះ ហើយចាប់ឃាត់ខ្លួនជនសង្ស័យម្នាក់ និងវត្ថុតាងបានភ្លាមៗជាក់ស្ដែងតែម្ដង។ បច្ចុប្បន្ននេះ កម្លាំងបានកសាងសំណុំរឿងបញ្ជូន ជនសង្ស័យនិងវត្ថុតាង ទៅតុលាការ ដើម្បីចាត់ការទៅតាមផ្លូវច្បាប់ នៅថ្ងៃទី២៨ ខែមេសា ឆ្នាំ២០២០ហើយ៕ ដោយ ៖ អ៊ុងសារុំ
