ភ្នំពេញ៖ ធនាគារ ADB ពិភាក្សាអំពីលទ្ធភាព នៃការសហការជាមួយ ធនាគារអភិវឌ្ឍន៍ជនបទ និងកសិកម្ម ដើម្បីចូលរួមអនុវត្ត “គម្រោងអភិវឌ្ឍន៍ការប្រកួតប្រជែងកសិ-ពាណិជ្ជកម្ម (Competitive Agribusiness Development Project)” ដែលគម្រោងផ្តោតលើការបង្កើនតម្លៃបន្ថែម ដល់តួអង្គនៃខ្សែសង្វាក់ផលិតកម្មកសិកម្ម ដើម្បីជំរុញផលិតកសិកម្មកសិកម្ម។
ការពិភាក្សានេះ ធ្វើឡើងដោយឯកឧត្តម កៅ ថាច អគ្គនាយកធនាគារអភិវឌ្ឍន៍ជនបទ និងកសិកម្ម និងសហការី បាន ជាមួយក្រុមបេសកកម្មធនាគារអភិវឌ្ឍន៍អាស៊ី (ADB) តាមរយៈ Video Conference។
ភាគី ធនាគារអភិវឌ្ឍន៍ជនបទ និងកសិកម្ម បានស្វាគមន៍ចូលរួមគាំទ្រ អនុវត្តគម្រោង ក្នុងគោលដៅអភិវឌ្ឍន៍វិស័យកសិកម្មនៅប្រទេសកម្ពុជា ហើយឯកឧត្តម ក៏បានគូសរំលេចអំពីបច្ចុប្បន្នដែលធ.អ.ជ.ក. បាននិងកំពុងជំរុញការផ្តល់ឥណទាន ដល់សហគមន៍កសិកម្ម និងម្ចាស់សហគ្រាសគ្រឹះស្ថានធុនតូច និងមធ្យម គាំទ្រផលិតកម្មបន្លែ ការចិញ្ចឹមសត្វ និងការចិញ្ចឹមត្រី។
ទន្ទឹមនេះ ឯកឧត្តមអគ្គនាយកធនាគារអភិវឌ្ឍន៍ជនបទ និងកសិកម្ម បានផ្តល់ជាយោបល់ដោយស្នើឱ្យ ADB គាំទ្រហិរញ្ញប្បទានគម្រោងមួយផ្នែកជា Credit Guarantee Scheme ដល់សហគមន៍កសិកម្ម ដើម្បីអាចឱ្យសហគមន៍មានលទ្ធភាព ខ្ចីឥណទានបាន ដោយសារបច្ចុប្បន្នសហគមន៍ ភាគច្រើនមិនមានទ្រព្យធានា ព្រមទាំងគាំទ្រដល់ផ្នែកហេដ្ឋារចនាសម្ព័ន្ធ ផលិតកម្មបន្លែ បន្ទាប់ពីប្រមូលផល (post-harvest infrastructure) ដូចជា Cool-room និង Pre-cool room ជាដើម។
ឯកឧត្តមអគ្គនាយក ក៏បានថ្លែងអំណរគុណដល់ ធនាគារអភិវឌ្ឍន៍អាស៊ី ដែលបានរួមចំណែកយ៉ាងសកម្ម ក្នុងការអភិវឌ្ឍន៍សេដ្ឋកិច្ចជាតិ តាមរយៈកម្មវិធីអភិវឌ្ឍន៍ជាច្រើនកន្លងមក៕ដោយ៖សម្ផស្ស