ភ្នំពេញ៖ ការរីករាលដាលនៃជំងឺកូវីដ ១៩ បានបង្កផលប៉ះពាល់ ដល់វិស័យសេដ្ឋកិច្ចជាសកល និងវិស័យទ្រទ្រង់សំខាន់ៗមួយចំនួន ដូចជា វិស័យសេវាកម្ម ដែលនៅក្នុងនោះ មានវិស័យទេសចរណ៍ជាដើម។
លោក ហូ វណ្ឌី ទីប្រឹក្សាសមាគមទេសចរណ៍ បានឲ្យដឹងថា ដ៏រាបណាប្រទេសទាំងអស់ បើកទ្វាទទួលស្វាគមភ្ញៀវទេសចរឡើងវិញ និងក្រុមហ៊ុនអាកាសចរណ៍ បើកដំណើរការជាធម្មតាឡើងវិញ ទើបធ្វើឲ្យវិស័យទេសចរណ៍ ងើបឡើងវិញដែរ។
ប៉ុន្តែដោយសារពុំមានភាពធូរស្រាស ឬសញ្ញាវិជ្ជមាន លោក ហូ វណ្ឌី បានលើកឡើងថា បើក្នុងករណីប្រទេសកម្ពុជា ក៏ដូចជាបណ្តាប្រទេសដទៃទៀតនៅតែបន្តបិទទ្វារ ដោយសារជំងឺកូវីដ១៩ យើងត្រូវតែខិតខំនៅក្នុងស្រុករបស់យើងសិន ហើយខិតខំធ្វើយ៉ាងណា ឲ្យវិស័យទាំងអស់ដើរទន្ទឹមគ្នា ទី១ វិស័យដឹកជញ្ជូន ទី២ វិស័យភោជនីយដ្ឋាន និងអាហារដ្ឋាន និងទី៣ វិស័យស្នាក់នៅ ត្រូវធ្វើយ៉ាងណាឲ្យមានដំណើរការល្អ ដែលចំណុចទាំងនេះ វាអាស្រ័យទៅលើគោលនយោបាយលើកទឹកចិត្ត ក៏ដូចជាការជួយទ្រទ្រង់មួយចំនួន ពីក្រសួងសាមីផង និងអន្តរក្រសួងផង ដើម្បីធ្វើយ៉ាងណាឲ្យវិស័យទាំង៣ខាងលើនេះ អាចដំណើរបាន នោះនិងអាចជួយទ្រទ្រង់ដល់វិស័យផ្សេងៗទៀតបាន។
បើតាមលោក ហូ វណ្ឌី ក្រុមហ៊ុនទេសចរណ៍ក្នុងស្រុក បានផ្អាកដំណើរការអាជីវកម្មអស់ហើយ ក្រុមហ៊ុនខ្លះផ្អាកតាំងពីខែ១ ខែ២ ឬខែ៣ ហើយក្រុមហ៊ុនខ្លះទៀត ក៏ចាប់ផ្តើមផ្អាកដំណើរការបណ្តើរៗហើយដែរ ប៉ុន្តែក្រុមហ៊ុនទេសចរណ៍ទាំងនោះ ទទួលបានការលើកទឹកចិត្ត ពីក្រសួងការងារ ជាពិសេសពីអគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុ ក្នុងការពន្យារពេលបង់ពន្ធ ដែលនេះជាការជួយទ្រទ្រង់ ផ្នែកផ្លូវអារម្មណ៍របស់អ្នករកទទួលទាន ក្នុងវិស័យទេសចរណ៍នៅកម្ពុជា។
បើតាមប្រសាសន៍របស់ប្រមុខរាជរដ្ឋាភិបាលកម្ពុជា សម្តេចតេជោហ៊ុន សែន នៅដើមឆ្នាំ២០២០នេះ ភ្ញៀវទេសចរអន្តរជាតិមកកម្ពុជា បានធ្លាក់ចុះប្រមាណ ៣០,៧% ក្នុងនោះទេសចរចិន បានធ្លាក់ចុះ ក្នុងរង្វង់៤០% ធៀបនឹងរយៈពេលដូចគ្នានៅឆ្នាំ ២០១៩។ បើប្រៀបធៀបជាមួយគោលដៅទេសចរណ៍ ក្នុងតំបន់ប្រទេសជិតខាងកម្ពុជា អត្រានៃការធ្លាក់ចុះចំនួនភ្ញៀវទេសចរអន្តរជាតិ មកកម្ពុជា គឺមានកម្រិតស្រាលនៅឡើយ។
សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានចាត់ទុកវិស័យទេសចរណ៍ គឺជាមាសបៃតង និងជាសសរស្ដម្ភនៃសេដ្ឋកិច្ចជាតិ ខណៈចំណូល ដែលបានមកពីភ្ញៀវទេសចរអន្តរជាតិឆ្នាំ២០១៩ មានចំនួន៤.៩១៩ លានដុល្លារ ឬជិត១៣% នៃផលិតផលសរុបក្នុងស្រុក។
បច្ចុប្បន្ន ដោយមិនគិតពីផលប៉ះពាល់នៃជំងឺឆ្លងកូវីដ១៩ វិស័យទេសចរណ៍កម្ពុជា មានការរីកចម្រើន គួរឲ្យកត់សម្គាល់ នៅក្នុងរយៈពេលមួយទសវត្សរ៍ចុងក្រោយនេះ ដោយធ្វើឲ្យកម្ពុជា បានក្លាយជាគោលដៅទេសចរណ៍ប្រកបដោយភាពទាក់ទាញ រួមចំណែកក្នុងការអភិវឌ្ឍសង្គមជាតិ។ ឆ្នាំ២០១៩កន្លងទៅ ចំនួនភ្ញៀវទេសចរអន្តរជាតិ បានមកប្រទេសកម្ពុជា មានប្រមាណ ៦,៦ លាននាក់ កើនឡើង៣ដង បើធៀបនឹង១០ឆ្នាំមុន ដែលមានចំនួនប្រមាណ ២,១៦លាននាក់ប៉ុណ្ណោះ៕ដោយ៖សម្ផស្ស