កំពត ៖ ខ្មាន់កាំភ្លើងដែលបាញ់ប្រហារ ត្រូវបុរសម្នាក់ ចំកំប៉េះគូទបណ្ដាលឲ្យរងរបួសធ្ងន់ ត្រូវកម្លាំងនគរបាលនាយកដ្ឋាននគរបាលព្រហ្មទណ្ឌ សហការជាមួយកម្លាំង នៃស្នងការដ្ឋាននគរបាលខេត្តកំពតចាប់ខ្លួនបានហើយ ក្រោយរត់គេចទៅលាក់ខ្លួននៅស្រុកជុំគិរី ខេត្តកំពត។
ស្នងការនគរបាលខេត្តកំពត លោកឧត្តមសេនីយ៍ទោ ម៉ៅ ច័ន្ទមធុរិទ្ធ បានប្រាប់បណ្ដាញផ្សព្វផ្សាយឲ្យដឹងថា ខ្មាន់កាំភ្លើងនេះ ត្រូវចាប់ខ្លួននៅរសៀលថ្ងៃទី២៨ ខែមេសា ឆ្នាំ២០២០នេះ ពេលរូបគេកំពុងរត់គេចខ្លួន នៅតាមបណ្ដោយផ្លូវជាតិលេខ៤១ ស្ថិតក្នុងស្រុកជុំគិរី ខេត្តកំពត។
លោកឧត្តមសេនីយ៍ត្រី ជាវ វិបុល អនុប្រធាននាយកដ្ឋាននគរបាលព្រហ្មទណ្ឌ ឲ្យដឹងថា ជនល្មើសឈ្មោះ កែ រ័ត្នវិជ្ជា ជាអ្នកធ្វើសកម្មភាពផ្ទាល់ ក្នុងចំណោមបក្ខពួកចំនួន៣នាក់។
ខ្មាន់កាំភ្លើង គឺជាមន្ដ្រីនគរបាល នៃស្នងការដ្ឋាននគរបាលរាជធានីភ្នំពេញ។
សូមបញ្ជាក់ថា ហេតុការណ៍នេះ បានកើតឡើងនៅវេលាម៉ោងជាង៣យប់ថ្ងៃទី២៦ ខែមេសា ឆ្នាំ២០២០ ដែលមានទីតាំងស្ថិត នៅតាមបណ្ដោយផ្លូវលេខ៥១ មុខសូរិយាម៉ល ស្ថិតក្នុងសង្កាត់ផ្សារថ្មីទី៣ ខណ្ឌដូនពេញ រាជធានី ជនសង្ស័យមួយក្រុម បានដកកាំភ្លើងបាញ់ចំនួនពីរគ្រាប់ បណ្ដាលឲ្យបុរសម្នាក់របួសធ្ងន់ ៕
ដោយ៖កូឡាប