បាត់ដំបង៖ ពលរដ្ឋនៅខេត្តបាត់ដំបង បានយករថយន្តតូចធំទៅធ្វើឆៀកជាច្រើនគ្រឿងខុសប្រក្រតី ខណៈដែលច្បាប់ចរាចរណ៍ផ្លូវគោក ត្រូវបានកែសម្រួលត្រង់ចំណុចមួយចំនួន ពិសេសចំណុចការផាកពិន័យ រាល់យានយន្តប្រព្រឹត្តល្មើសនឹងឈានចូលអនុវត្តនៅថ្ងៃទី១ ខែឧសភា ឆ្នាំ២០២០ខាងមុខ។
លោក សួ ប៊ុនរ៉ុង អនុប្រធានមន្ទីរសាធារណការ និងដឹកជញ្ជូន បានប្រាប់ឲ្យដឹង កាលពីរសៀលថ្ងៃទី២៩ ខែមេសា ឆ្នាំ២០២០ថា ជារៀងរាល់ថ្ងៃធ្វើការ គឺចាប់ពីថ្ងៃចន្ទ ដល់សុក្រ មានតែរថយន្តប្រមាណ ៥០ទៅ៦០គ្រឿងប៉ុណ្ណោះ ដែលបានមកធ្វើឆៀក ប៉ុន្តែនៅថ្ងៃទី២៩ ខែមេសា ឆ្នាំ២០២០នេះ មានរថយន្តសម្រុកមកធ្វើច្រើនតាំងពីព្រឹក រហូតដល់ល្ងាច ហើយមន្ត្រីមន្ទីរបានធ្វើឆៀករថយន្តរបស់ពលរដ្ឋ បានប្រមាណជិត ២០០គ្រឿង ហើយក៏មានរថយន្តនៅសល់ជាច្រើនទៀត។ ការមកធ្វើឆៀកនេះ ភាគច្រើនជារថយន្តជិតផុតកាលបរិច្ឆេទ ហើយការសម្រុកមកធ្វើនេះ គឺពួកគាត់បានយល់ដឹងច្រើនពីច្បាប់ចរាចរណ៍ថ្មី ដែលរាជរដ្ឋាភិបាលនឹងចាប់ផ្ដើមអនុវត្តន៍នៅថ្ងៃទី១ ខែឧសភា ឆ្នាំ២០២០ខាងមុខនេះ។
លោក សួ ប៊ុនរ៉ុង បានបញ្ជាក់ថា សម្រាប់មន្ទីរសាធារណការ និងដឹកជញ្ជូន នឹងធ្វើឆៀក រថយន្តរបស់ពលរដ្ឋ នៅថ្ងៃសៅរ៍ និងអាទិត្យផងដែរ តាមសេចក្តីប្រកាសរបស់ក្រសួង ហើយការធ្វើនេះ ធ្វើឲ្យមានតម្លាភាព អ្នកមកមុនធ្វើមុខ អ្នកមកក្រោយធ្វើក្រោយ ។
គួរបញ្ជាក់ផងដែរថា រាជរដ្ឋាភិបាល បានសម្រេចកែប្រែនូវមាត្រាមួយចំនួន ក្នុងច្បាប់ចរាចរណ៍ផ្លូវគោក ដែលត្រូវបានអនុម័តនៅអំឡុងឆ្នាំ២០១៥ ដោយការកែប្រែនេះ ភាគច្រើនផ្ដោតទៅលើការផាកពិន័យ ក្នុងគោលបំណងកាត់បន្ថយគ្រោះថ្នាក់ចរាចរណ៍ ៕ដោយ ៖ អ៊ុងសារុំ
