ប្រធានាធិបតីអាមេរិចដូណាល់ ត្រាំ បាននិយាយថា ប្រទេសចិន “នឹងធ្វើអ្វីគ្រប់យា់ងដែលពួកគេអាចធ្វើបាន” ដើម្បីឲ្យគាត់ចាញ់ការបោះឆ្នោតឡើងវិញ។ លោកត្រាំបានបង្កើនការរិះគន់យ៉ាងខ្លាំងទៅលើប៉េកាំង ចំពេលអាមេរិច កំពុងរងការរាតត្បាតយ៉ាងខ្លាំងពីវីរុសកូរ៉ូណា។
នៅក្នុងកិច្ចសម្ភាសន៍នៅសេតវិមាន ជាមួយនឹងទីភ្នាក់ងារសារព័ត៌មាន Reuters លោកនិយាយថា ទីក្រុងប៉េកាំងប្រឈម នឹងផលវិបាកជាច្រើន របស់អាមេរិចពីការផ្ទុះវីរុស។
លោកថ្លែងថា ចិនគួរតែអនុញ្ញាតិឲ្យពិភពលោក បានដឹងអំពីការឆ្លងរាតដាល ឲ្យបានឆាប់រហ័ស។
លោកត្រាំ ខ្លួនឯងជារឿយៗ រងការរិះគន់ថា មិនបានចាត់វិធានការគ្រប់គ្រាន់ដើម្បីទប់ស្កាត់ការរាតត្បាតរបស់វីរុសកូរ៉ូណា។
រហូតមកដល់ពេលនេះ តួលេខនៃអ្នកឆ្លងវីរុសកូរ៉ូណានៅអាមេរិចមានជាង ១.០០០.០០០នាក់ និងស្លាប់ជាង ៦០.០០០នាក់។ វីរុសក៏បានញាំញីសេដ្ឋកិច្ចអាមេរិចយ៉ាងខ្លាំង។
យុទ្ធធនាការបោះឆ្នោតសម្រាប់អាណិត្តថ្មី នៅអាមេរិច នឹងចាប់ផ្តើមនៅក្នុងខែវិច្ឆិកា។
ត្រាំ ថ្លែងប្រាប់ Reuters ដូច្នេះថា “មានរឿងជាច្រើនដែលខ្ញុំអាចធ្វើ។ ពួកយើងកំពុងរកមើលពីអ្វីដែលបានកើតឡើង”។
លោកបន្ថែមថា “ចិននឹងធ្វើអ្វីគ្រប់យ៉ាងដែលពួកគេអាចធ្វើ ដើម្បីឲ្យខ្ញុំចាញ់ការប្រកួតប្រជែង (ការបោះឆ្នោត)”។
សូមបញ្ជាក់ថា ប្រទេសចិន កន្លែងដែលវីរុសកូរ៉ូណា ឬ COVID-19 ផ្ទុះចេញកំពុងប្រឈមនឹងផលវិបាកជាច្រើន ដោយសារតែប្រទេសជាច្រើនទំនងធ្វើការប្តឹងចិន ដើម្បីឲ្យផ្តល់សំណងដល់ពួកគេ ដោយសារការបំផ្លាញសេដ្ឋកិច្ចរបស់វីរុស។
កាលពីពេលថ្មីៗនេះ អូស្ត្រាលីក៏បានស្នើឲ្យមានការស៊ើបអង្កេត រកប្រភពនៃវីរុសកូរ៉ូណាផងដែរ ប៉ុន្តែត្រូវបានចិនច្រានចោល ដោយលើកឡើងថា វាជារឿងនយោបាយ និងប្រាប់វិញថា វាជាពេលដែលត្រូវប្រយុទ្ធប្រឆាំងនឹងវីរុស៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
