ភ្នំពេញ៖ ការផ្លាស់ប្តូរឥរិយាបថអ្នកប្រើប្រាស់យានយន្ត និងផ្លូវសាធារណៈ ដោយគោរពច្បាប់ចរាចរណ៍ ការផ្លាស់ប្តូរច្បាប់ចរាចរណ៍ ការកែលម្អអ្នករំលោភផ្លូវថ្នល់ អ្នករំលោភចិញ្ចើមថ្នល់ សុទ្ធតែជាបច្ច័យចូលរួម នៃការកាត់បន្ថយគ្រោះថ្នាក់ចរាចរណ៍វាអាចលំបាកណាស់ក្នុងកាលៈទេសៈនៃជំងឺកូវីដ១៩ តែនេះជារបត់នៃការផ្លាស់ប្តូរ រួមគ្នាអនុវត្តឱ្យបានល្អនៃការគោរពច្បាប់ចរាចរណ៍ ដើម្បីសុវត្ថិភាពខ្លួនយើង គ្រួសារយើង និងសង្គមយើង ជាវិធានការតឹងរ៉ឹង មានអ្នកខ្លះព្រួយបារម្ភចំពោះអ្នកអនុវត្តន៍ច្បាប់ដោយលំអៀង ដោយពុករលួយ ដោយពុតត្បុតមិនល្អជាដើម។
ឯកឧត្តមហេង រតនា អគ្គនាយកស៊ីម៉ាក់ បានថ្លែងសារលើហ្វេសប៊ុកផ្លូវការ នៅថ្ងៃទី១ខែឧសភាឆ្នាំ២០២០ថា ពេលវេលាផ្លាស់ប្តូរសង្គមជាតិ ពីការស្លាប់ប្រជារដ្ឋខែ្មរច្រើនដោយសារសង្គ្រាម ហើយក្រោយសង្គ្រាម ត្រូវបញ្ចប់ផ្លាស់ប្តូរទៅជាស្លាប់ប្រជាជនខ្មែរ ច្រើនដោយសារគ្រាប់មីន/សំណល់ជាតិផ្ទុះពីសង្គ្រាម បន្ទាប់មកក្រោយអ៊ុនតាក់ ចប់អណត្តិមួយរយៈ បែរជាផ្លាស់ប្តូរទៅស្លាប់ប្រជាជនខ្មែរច្រើនដោយសារជំងឺអេដស៍ លើសស្លាប់ដោយសារគ្រាប់មីន បច្ចុប្បន្នប្រទេសរីកចម្រើន មានផ្លូវគមនាគមន៍ល្អយានយន្តគ្រប់ប្រភេទច្រើន ក៏ផ្លាស់ប្តូរជាស្លាប់ប្រជាជនខែ្មរ មានអត្រាខ្ពស់ជាងគេ ដោយសារគ្រោះថ្នាក់ចរាចរណ៍វិញម្តង! កាលពីស្រុកទេសនៅក្រ គ្មានផ្លូវល្អ (សូម្បីផ្លូវជាតិមហាវេទនាធ្វើដំណើរ) គ្មានឡាន គ្មានម៉ូតូ គ្មានត្រាក់ទ័រ គោយន្តច្រើនចរាចរណ៍ គ្មានឬមិនសូវមានគ្រោះថ្នាក់ចរាចរណ៍ដែរ។
ឯកឧត្តម បានលើកឡើងថា ជាធម្មតាទេ កាលណាមានផ្លាស់ប្តូរ មានអ្នកខ្លះមិនចង់ផ្លាស់ប្តូរទេ! តែជាភាពជាក់ស្តែងក្នុងករណីនេះ ការផ្លាស់ប្តូរឥរិយាបថអ្នកប្រើប្រាស់យានយន្ត និងផ្លូវសាធារណៈ ដោយគោរពច្បាប់ចរាចរណ៍ ការផ្លាស់ប្តូរច្បាប់ចរាចរណ៍ ការកែលម្អអ្នករំលោភផ្លូវថ្នល់ អ្នករំលោភចិញ្ចើមថ្នល់ សុទ្ធតែជាបច្ច័យចូលរួមនៃការកាត់បន្ថយគ្រោះថ្នាក់ចរាចរផងដែរ!។
ឯកឧត្តម បានបន្ថែមទៀតថា វាអាចលំបាកណាស់ក្នុងកាលៈទេសៈនៃជំងឺកូវីដ១៩ តែនេះជារបត់នៃការផ្លាស់ប្តូរ រួមគ្នាអនុវត្តឱ្យបានល្អនៃការគោរពច្បាប់ចរាចរណ៍ ដើម្បីសុវត្ថិភាពខ្លួនយើង គ្រួសារយើង និងសង្គមយើង! ស្តាប់ប្រជាជនមួយចំនួន មានការមិនពេញចិត្តដោយសារផាកពិន័យអស់លុយច្រើនពេក តែអ្នករៀបចំច្បាប់គិតថា យកការផាកពិន័យឱ្យច្រើនដើម្បីឱ្យខ្លាច ឱ្យរៀងចាល និងគោរពច្បាប់ល្អព្រោះខ្លាចខាតបង់លុយច្រើន។ ត្រូវមើលឱ្យឃើញវិធានការមួយចំនួនទៀតដែរ ដូចជាការបាត់សិទ្ធិបើកបរ ជាដើម។ ល។
ឯកឧត្តម បានបញ្ជាក់ថា “… សុទ្ធតែជាវិធានការតឹងរ៉ឹង! អ្នកខ្លះព្រួយបារម្ភចំពោះអ្នកអនុវត្តន៍ច្បាប់ដោយលំអៀង ដោយពុករលួយ ដោយពុតត្បុតមិនល្អជាដើម…នេះជាមូលហេតុទំនុកចិត្តលើសមត្ថកិច្ច។ យើងរួមគ្នាកែលម្អទាំងអស់គ្នា ទាំងមន្ត្រីអនុវត្តច្បាប់ ទាំងប្រជាពលរដ្ឋដែលត្រូវគោរពច្បាប់! នេះជាការផ្លាស់ប្តូរថ្មី និងធ្វើឱ្យសង្គមជាតិកាន់តែមានវិន័យ មានសុវត្ថិភាព និងសុខដុមរមនីយកម្មតទៅ!”៕
ដោយ៖កូឡាប