ប៉ូលិសនៅភាគខាងលិចប្រទេសអូស្ត្រាលី បានបាញ់សម្លាប់បុរសម្នាក់ ក្រោយពេលមនុស្សជាច្រើននាក់ ត្រូវបានចាក់ឲ្យរងរបួស នៅក្នុងផ្សារទំនើបមួយកន្លែង ស្ថិតក្នុងតំបន់ Pilbara។
ក្នុងហេតុការណ៍នោះ មនុស្សចំនួន ៥នាក់បានរងរបួសពីការវាយប្រហារ ហើយជនរងគ្រោះ ២នាក់កំពុងស្ថិតក្នុងស្ថានភាពធ្ងន់ធ្ងរ។
សាក្សីបានប្រាប់ប្រព័ន្ធផ្សព្វផ្សាយក្នុងតំបន់ថា ពួកគេឃើញបុរសម្នាក់គ្រវី “កាំបិតមួយដ៏ធំ” ទៅលើអ្នកទិញអីវ៉ាន់ និងមន្ត្រីប៉ូលិស មុនពេលឮសំឡេងស្រែកយំ។
នាយករដ្ឋមន្ត្រីនៃអូស្ត្រាលីភាគខាងលិច លោក Mark McGowan បានហៅហេតុការណ៍នោះថាជា “សោកនាដកម្ម”។
ប៉ូលិសបាននិយាយថា មិនមានការគំរាមកំហែងបន្តទៀត ដល់សុវត្ថិភាពសាធារណៈឡើយ និងបានអំពាវណាវដល់ប្រជាជន ចូលរួមផ្តល់ភស្តុតាងជាវីដេអូ។ មិនមានការបញ្ជាក់មួយថា ហេតុការណ៍នោះ ពាក់ព័ន្ធនឹងភេរវកម្មឡើយ។
ការវាយប្រហារដោយកាំបិត កើតឡើងនៅម៉ោង ១០ព្រឹក ថ្ងៃសុក្រ។ ស្ត្រីម្នាក់បានថ្លែងថា គាត់បានរតចេញ ក្រោយពេលប្រទះឃើញបុរសម្នាក់ នៅខាងក្រៅទ្វារចូលផ្សារទំនើប។
ស្ត្រីនោះនិយាយថា “ខ្ញុំបានឃើញបុរសនោះគ្រវីកាំបិតដាក់ស្ត្រីម្នាក់ ដែលដាក់ក្មេងនៅក្នុងរទេះរុញ។ បន្ទាប់មកគាត់ក៏ដើរចេញពីស្ត្រីនោះ និងបានចូលមកខាងក្នុងផ្សារ។ ដោយសារខ្ញុំនៅទីនោះ បុរសនោះបានគ្រវីដាក់ខ្ញុំ”។
បុរសដែលស្លាប់នោះ មិនត្រូវបានគេបញ្ជាក់ពីអត្តសញ្ញាណឡើយ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
