ភ្នំពេញ៖ ប្រិយមិត្ត និងមហាជន ជាពិសេសលោកយាយលោកតាជាពុទ្ធបរិស័ទជិតឆ្ងាយ ប្រាកដជាស្គាល់ច្បាស់ហើយ ព្រះសង្ឃ ឡុង ចន្ថា ដែលជាសង្ឃដ៏ល្បីមួយអង្គនៅលើបណ្តាញសង្គម Facebook និង Youtube ដែលតែងលើកយករឿងរ៉ាវក្នុងសង្គមបែបលក្ខណៈជេរបញ្ចោរឥតទើសក្បាលអ្នកណា ជាជាងយកព្រះធម៌មកទេសនាមកអប់រំ ដូចព្រះសង្ឃដទៃ ដែលមើលទៅដូចជាមិនសរម្យទាល់តែសោះ។
ជាការពិតណាស់ កាលពីពេលកន្លងមក ក្រៅពីមានទំនាស់ពាក្យសម្តីជាមួយស្ត្រីម្នាក់បង្កឲ្យមានការភ្ញាក់ផ្អើលនៅលើបណ្តាញសង្គម ព្រះសង្ឃ ឡុង ចន្ថា ក៏ធ្លាប់ត្រូវទទួលការព្រមានពីក្រសួងធម្មការ និងសាសនា ម្តងរួចមកហើយ ពាក់ព័ន្ធរឿងទេសនាភាគច្រើនបែបជេរបញ្ចោរគេឯងដ៏មិនគួរគប្បី។
ដោយឡែក ថ្មីៗនេះ ស្រាប់តែបែកធ្លាយវីដេអូឃ្លីប បង្ហាញពីសកម្មភាពព្រះសង្ឃ ឡុង ចន្ថា ឆាតញ៉ែស្រី បង្កឲ្យមានការភ្ញាក់ផ្អើលជាខ្លាំងនៅលើបណ្តាញសង្គមហ្វេប៊ុក ដែលនាំឲ្យពុទ្ធបរិស័ទដែលតែងតែគោរពប្រតិបត្តិតាមព្រះពុទ្ធសាសនា សម្តែងនូវការខកចិត្ត និងខឹងសម្បារយ៉ាងខ្លាំងតែម្តង។
ទាក់ទងនឹងទង្វើប្រព្រឹត្តប្រាកចាកពីធម៌វិន័យរបស់ព្រះសង្ឃ ឡុង ចន្ថា នេះផងដែរ បើតាមលោក សេង សុមុនី បានបញ្ជាក់ឲ្យដឹងថា ព្រះសង្ឃ ឡុង ចន្ថា គឺធ្លាប់ត្រូវបានទទួលលលិខិតព្រមានម្តងរួចមកហើយ ពីខាងក្រសួងធម្មការនិងសាសនា ពាក់ព័ន្ធការទេសនាបែរជាជេរបញ្ចោរ ហើយនៅពេលនេះផងដែរ លោកកំពុងជំរុញករណីនេះទៅគណៈសង្ឃនាយក ដើម្បីមាននីតិវិធីឲ្យបានឆាប់រហ័សទៅលើព្រះសង្ឃរូបនេះ។
ប៉ុន្តែទោះជាយ៉ាងណា អ្នកសារព័ត៌មានពុំអាចទំនាក់ទំនង ព្រះសង្ឃ ឡុង ចន្ថា ដើម្បីស្រាយបំភ្លឺបានទេ៕ ដោយ៖ លឹម ហុង
