វីដេអូ និងរូបភាពបង្ហាញពីសកម្មភាពនារីវៀតណាមម្នាក់ នៅក្នុងទីក្រុងហូជីមិញ លួចផ្កាសាធារណៈ នៅលើស្ពាន Nguyen Luong Bang ស្រុក Phu My Hung នៅតែបន្តរីករាលដាលនៅលើអ៊ីនធឺណិត ។
បុរសម្នាក់ឈ្មោះថា MT ជាម្ចាស់ឃ្លីប ដែលបានឃើញហេតុការណ៍ ដែលបានកើតឡើងកាលពីព្រឹកថ្ងៃទី២៨ ខែកញ្ញា កន្លងទៅ បានប្រាប់ឲ្យដឹងថា គាត់បានឃើញនារីម្នាក់ស្ថិតក្នុងសម្លៀកបំពាក់ខោខ្លីពណ៌ផ្កាឈូក អាវយឺតពណ៌ក្រម៉ៅ ពាក់ម៉ាស និងមួកត្រួតគ្នាឃ្លុំយ៉ាងជិត បានឈប់ម៉ូតូ គុបមានផ្លាកលេខ 32-546F6 នៅអែបខាងស្តាំ ហើយឡើងលើខឿនស្ពាន ដើម្បីលួចយកផ្កា (confetti ) ដាំលម្អលើនោះ។
បើទោះបីមានមនុស្សជិះឆ្លងកាត់ និងគេបានឃើញផ្ទាល់ភ្នែកយ៉ាងណា ក៏សកម្មភាពរបស់នារីរូបនេះ ពុំត្រូវបានរារាំងនោះដែរ ដោយនាងបានដកយកដើមផ្កាជាច្រើនដាក់ចូលថង់ប្លាស្ទីក រួចជិះម៉ូតូចេញទៅយ៉ាងរំភើយ ដែលហាក់ដូចគ្មានរឿងអ្វីកើតឡើង។
យ៉ាងណាមិញ ក្រោយវីដេអូនេះត្រូវបានបង្ហោះឡើងបណ្តាញសង្គមហ្វេសប៊ុក មនុស្សជាច្រើនបានសម្តែងនូវការហួសចិត្តជាខ្លាំងតែម្តង ក្នុងនោះមានការ Comment ដាក់យ៉ាងចាស់ៗដៃយ៉ាងដូច្នេះថា៖ «នាងខ្វះលុយណាស់មែនទេ! តើដើមផ្កាហ្នឹង១ដើមថ្លៃប៉ុន្មាន ហេតុអ្វីបានជានាងធ្វើបែបនេះ គិតទៅតម្លៃមនុស្សថោកជាងដើមឈើទៅទៀត» ។ ព្រោះតែស្អប់ពេក ម្នាក់ទៀតបានដាក់ថា៖ «បើនាងខ្វះលុយខ្លាំង មកយកពីខ្ញុំទៅ ខ្ញុំចេញលុយឲ្យ ត្រឹមសម្បត្តិផ្កាប៉ុន្មានដើម ដែលនាំឲ្យនាងល្បីបែបនេះ» ៕
ប្រែសម្រួល៖ លឹម ហុង (ប្រភព៖ motthegioi.vn)
