អ្នកវិទ្យាសាស្ត្ររបស់ចិនបានរកឃើញវត្តមានរបស់វីរុសកូរ៉ូណា នៅក្នុងទឹកកាមរបស់បុរសអ្នកជំងឺ ប៉ុន្តែគេត្រូវធ្វើការស្រាវជ្រាវបន្ថែមទៀត ដើម្បីកំណត់ថាតើវីរុសនោះអាចឆ្លងតាមរយៈការរួមភេទឬយ៉ាងណា។
ការរកឃើញពីការសិក្សាលើអ្នកជំងឺនៅមន្ទីរពេទ្យចិននេះ ត្រូវបានគេចុះផ្សាយកាលពីថ្ងៃព្រហស្បតិ៍ម្សិលមិញ នៅក្នុងទស្សនាវដ្តីវេជ្ជសាស្ត្រ JAMA។
វីរុស COVID-19 ឆ្លងតាមរយៈទឹកមាត់នៅផ្លូវដង្ហើម ឬការប៉ះពាល់ ហើយវីរុសនោះក៏ត្រូវបានគេរកឃើញមានវត្តមានក្នុងលាមក ទឹកមាត់ និងទឹកនោមផងដែរ។
អ្នកស្រាវជ្រាវនៅមន្ទីរពេទ្យ Shangqiu ស្ថិតក្នុងខេត្ត Henan បានធ្វើការសិក្សាដើម្បីកំណត់ថាតើវីរុសនោះមានវត្តមាននៅក្នុងទឹកកាមឬយ៉ាងណា។
ពួកគេបានធ្វើតេស្តលើទឹកកាមរបស់អ្នកជំងឺចំនួន ៣៨នាក់ ដែលមានអាយុពី ១៥ ទៅជាង ៥០ឆ្នាំ។
ហ្សែននៃវីរុសកូរ៉ូណា ត្រូវបានគេរកឃើញនៅក្នុងទឹកកាមរបស់អ្នកជំងឺ ៦នាក់ ដែលអ្នកជំងឺ ៤នាក់ស្ថិតក្នុងដំណាក់កាលឆ្លងធ្ងន់ធ្ងរ និង ២នាក់ទៀតស្ថិតក្នុងដំណាក់កាលជាសះស្បើយ។
អ្នកវិទ្យាសាស្ត្របានកត់សម្គាល់ថា ការសិក្សានៅមានកំរិតដោយសារតែធ្វើតេស្តលើសំណាកតិចតួច ដូច្នេះគេត្រូវការសិក្សាបន្ថែមទៀតដើម្បីកំណត់វាថាតើ វាអាចឆ្លងតាមការរួមភេទឬយ៉ាងណា៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia