ភ្នំពេញ៖ កម្ពុជា – ម៉ាឡេស៊ី បានរួមគ្នាពង្រឹង ការអនុវត្ត អនុស្សរណ:នៃការយោគយល់គ្នាស្ដីពីការជ្រើសរើស បញ្ជូន និងគ្រប់គ្រងពលករខ្មែរ ទៅធ្វើការនៅប្រទេសម៉ាឡេស៊ី នាព្រឹកថ្ងៃអង្គារ៍ថ្ងៃទី២៣ ខែមករា ឆ្នាំ២០១៨ ក្រោមវត្តមាន លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នឹង លោក Dato’ Sri Richard Riot AnakJaem រដ្ឋមន្ត្រីក្រសួងធនធានមនុស្ស នៃប្រទេសម៉ាឡេស៊ី នៅសណ្ឋាគារសូហ្វីតែល។
លោករដ្ឋមន្ត្រីបានសម្តែងការស្វាគមន៍យ៉ាងកក់ក្តៅ និងថ្លែងអំណរគុណចំពោះគណៈប្រតិភូម៉ាឡេស៊ីដែលបានអញ្ជើញមកបំពេញទស្សនកិច្ចនៅប្រទេសកម្ពុជា និងចូលរួមកិច្ចប្រជុំថ្នាក់រដ្ឋមន្ត្រីលើកទី៣ស្តីពីការអនុវត្តនៃអនុស្សរណៈនៃការយោគយល់គ្នាក្នុងការជ្រើសរើស បណ្តុះបណ្តាល បញ្ជូន និងគ្រប់គ្រងពលករខ្មែរទៅធ្វើការនៅប្រទេសម៉ាឡេស៊ី នាថ្ងៃនេះ។
លោកបញ្ជាក់ថា ការបញ្ជូនពលករកម្ពុជាទៅធ្វើការនៅម៉ាឡេស៊ី បានចាប់ដំណើរការតាំងពីឆ្នាំ១៩៩៨ នៅក្រោយពេលដែលរាជរដ្ឋាភិបាលកម្ពុជាទទួលបានការអនុញ្ញាតពីរដ្ឋាភិបាលម៉ាឡេស៊ី ក្នុងខែតុលា ឆ្នាំ១៩៩៦។ ចាប់ពីពេលនោះមក ចំនួនពលករដែលបានបញ្ជូនទៅធ្វើការនៅម៉ាឡេស៊ី បានកើនឡើងជាបន្តបន្ទាប់។ ពលករ ដែលបានបញ្ជូនទៅធ្វើការនៅប្រទេស ម៉ាឡេស៊ី មានចំនួនសរុប ៤៦៥៤១នាក់ (ស្រី ៤០០៨៤នាក់) ក្នុងនោះ ពលករការងារផ្ទះមានចំនួន ៣៣៧០៧នាក់ ស្រីទាំងអស់។
លោករដ្ឋមន្ត្រីមានប្រសាសន៍បន្តថា ការខិតខំរបស់ប្រទេសបញ្ជូនតែម្ខាង មិនអាចធានាបាននូវការការពារ និងការលើកកម្ពស់សិទ្ធិរបស់ពលករទេសន្តប្រវេសន៍បានឡើយ បើមិនមានកិច្ចសហការល្អ និងការគាំទ្ររបស់ប្រទេសទទួលទេនោះ។ ចំពោះបញ្ហានេះ រាជរដ្ឋាភិបាលកម្ពុជា ទទួលស្គាល់អំពីកិច្ចខិតខំប្រឹងប្រែងដ៏ល្អប្រសើររបស់រដ្ឋាភិបាលម៉ាឡេស៊ី ក្នុងការដោះស្រាយរាល់បញ្ហាដែលបានជួបប្រទះនាពេលកន្លងមក។
លោកលើកឡើងទៀតថា ពិភពលោក ក៏ដូចជាបណ្តាប្រទេសក្នុងអាស៊ានមានការគាំទ្រ និងទទួលស្គាល់ថា ការធ្វើទេសន្តរប្រវេសន៍ការងារ ពិតជាបានចូលរួមយ៉ាងសំខាន់ក្នុងកិច្ចអភិវឌ្ឍន៍គ្រួសារ សហគមន៍ និងសេដ្ឋកិច្ចសង្គមក្នុងការកាត់បន្ថយភាពក្រីក្រផងដែរ។ ក្នុងទស្សនៈ បែបនេះ រាជរដ្ឋាភិបាលកម្ពុជាគាំទ្រក្នុងការធ្វើទេសន្តរប្រវេសន៍ការងារដោយស្របច្បាប់។ សម្រាប់ការងារនេះ កម្ពុជាមានការប្តេជ្ញាចិត្តថា សិទ្ធិរបស់ពលករនឹងត្រូវបានការពារយ៉ាងល្អ ដោយក្របខណ្ឌច្បាប់ដ៏រឹងមាំ ក្នុងវដ្តនៃទេសន្តរប្រវេសន៍។
ទោះជាយ៉ាងណាលោកសង្ឃឹមថា អនុស្សរណៈនៃការយោគយល់គ្នាដែលរដ្ឋាភិបាលនៃប្រទេសទាំងពីរបានចុះហត្ថលេខារួចមក ពិតជាឧបករណ៍ដ៏ប្រសើរសម្រាប់ដោះស្រាយបញ្ហាទាំងឡាយនោះ។ ដោយមានការប្តេជ្ញាចិត្តយ៉ាងខ្ពស់របស់ប្រទេសទាំងពីរ សិទ្ធិពលករកម្ពុជានៅប្រទេសម៉ាឡេស៊ី ពិតជានឹងត្រូវទទួលបានការការពារ និងការលើកកម្ពស់ដ៏ល្អប្រសើរ។ ជាលទ្ធផល ទេសន្តរប្រវេសន៍ការងារនឹងជួយលើកកម្ពស់កិច្ចអភិវឌ្ឍន៍ តាមរយៈការបង្កើតសហគ្រាសថ្មីៗ និងការពង្រឹងចំណងទាក់ទងរវាងប្រទេសទាំងពីរ តាមរយៈការផ្ទេរបច្ចេកវិទ្យា ជំនាញ និងធនធានផ្សេងៗទៀត៕ ដោយ៖បញ្ញាស័ក្តិ
