ស្វាយរៀង៖ ករណីគ្រោះថ្នាក់ចរាចរណ៍បង្កឡើង ដោយរថយន្តពាក់ស្លាកលេខរដ្ឋ បុកជាមួយរថយន្តក្រឡុកស៊ីម៉ងត៍ បែកកង់រ៉េចង្កូតបុករះម៉ូតូបញ្ច្រាសទិសគ្នា បណ្តាលឲ្យកម្មករ កម្មការិនី៨នាក់រងរបួស និងម៉ូតូ៦គ្រឿងរងការខូចខាត។ ចំណែកអ្នកបើករថយន្ត បានរត់គេចខ្លួនបាត់។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៥ល្ងាច ថ្ងៃទី៨ ខែឧសភា ឆ្នាំ២០២០ ស្ថិតលើកំណាត់ផ្លូវជាតិលេខ១ ក្នុងភូមិសាមគ្គី សង្កាត់ច្រកម្ទេស ក្រុងបាវិត ខេត្តស្វាយរៀង។
តាមប្រភពសាក្សីនៅកន្លែងកើតហេតុ បានឲ្យដឹងថា នៅពេលមុនកើតហេតុ គេឃើញរថយន្តមួយគ្រឿង ពាក់ស្លាកលេខរដ្ឋ 13.2 .0867 ក្នុងទិសដៅពីលិចមកកើត លើកំណាត់ផ្លូវជាតិលេខ១ ស្រាប់តែមកដល់ចំណុចកើតហេតុ មានរថយន្តក្រឡុកស៊ីម៉ងត៍ បើកបញ្ច្រាសគ្នា ក៏បុកយ៉ាងពេញទំហឹង បណ្ដាលអោយរថយន្ត ពាក់ផ្លាកលេខរដ្ឋបែកកង់ រួចក៏រេចង្កូតបុករះម៉ូតូ របស់កម្មករក្មការិនី៦គ្រឿង កំពុងជិះតាមផ្លូវ បណ្ដាលដួលរដូករណែលពេញផ្លូវ ។ សមត្ថកិច្ចនគរបាលក្រុងបាវិត បានមកដល់ចុះវាស់វែង និងអូសយករថយន្តនិងម៉ូតូ៦គ្រឿង មករក្សាទុក ដើម្បីដោះស្រាយពេលក្រោយ។
បើតាមសមត្ថកិច្ចនគរបាលក្រុងបាវិត បានឱ្យដឹងថា ម្ចាស់រថយន្តពាក់ផ្លាកលេខរដ្ឋបង្កហេតុក្រោយពីឃើញ សភាពការណ៍មិនស្រួលបើកទ្វារ រថយន្តរត់គេចខ្លួនភ្លាមៗ។ ចំណែកកម្មករកម្មការិនី៨នាក់ បានរងរបួសធ្ងន់ស្រាល ត្រូវបានបញ្ជូនមកសង្គ្រោះនៅមន្ទីរពេទ្យបង្អែកជីភូ ក្រុងបាវិត៕ដោយ៖កូឡាប