ភ្នំពេញ៖ បារីអេឡិចត្រូនិក SISHA និង E-Cigare tte គឺជាបារីអេឡិចត្រូនិកដែលជាផលិតផល ញៀនថ្មីកំពុងបង្ក ហានិភ័យដល់យុវជនកម្ពុជានាពេលបច្ចុប្បន្ន និងអនាគត។
អង្គការចលនាដើម្បីសុខភាពកម្ពុជា (CMH) ជាអង្គការ ធ្វើការងារទាក់ទងនឹងផលប៉ះពាល់សុខភាពសាធារណៈ បានអះអាងថា ការប្រើប្រាស់ផលិតផលថ្មាំជក់នៅប្រទេសកម្ពុជា បានសម្តែងក្តីព្រួយបារម្ភថ្មីចំពោះការកើន ឡើងអ្នកប្រើប្រាស់បារីអេឡិចត្រូនិចសម័យថ្មី ជាពិសេសភាគច្រើនក្នុងស្រទាប់ជាយុវវ័យ។
លោកវេជ្ជបណ្ឌិត មុំ គង់ នាយកប្រតិបត្តិអង្គការចលនាដើម្បីសុខភាពកម្ពុជា (CMH Cambodia) បានបញ្ជាក់ឲ្យដឹងថ្ងៃ៩ ឧសភានេះថា បារីអេឡិចត្រូនិកជាបារីមិនដុត ឬមិនប្រើ ស្លឹកថ្នាំជក់ តែវាប្រើល្បាយសូឡិចស្យុងផលិតចំហាយជាតិពុល ដែលអ្នកប្រើប្រាស់ ស្រូបចូល។ បារីអេឡិចត្រូនិកមានឈ្មោះថា SISHA និងE-Cigaretteនេះ វាបានបង្កហានិភ័យ ដល់អ្នកប្រើប្រាស់ គិតត្រឹមខែកុម្ភៈ ឆ្នាំ២០២០ នៅសហរដ្ឋអាមេរិកមាន ការរងរបួសសួត ពាក់ព័ន្ធនឹងការប្រើប្រាស់ បារីអេឡិចត្រូនិកប្រមាណ ២៨០០ករណី ក្នុងនោះ អ្នកស្លាប់ជាង ៦០នាក់។ ហានិភ័យផ្សេង ទៀតដែល អាចកើតមាន គឺមហារីកសួត មហារីក ក្រពះ មហារីក ប្លោកនោម មហារីកបំពង់អាហារ ជំងឺផ្លូវដង្ហើម និងជំងឺបេះដូង។ ផលិតផល ញៀនថ្មីមួយ ប្រភេទទៀត គឺជាឧបករណ៍កំដៅ សារធាតុថ្នាំជក់ ដែលស្រដៀង នឹងបារីធម្មតា។ យុវជនត្រូវ បានគេបំភ័នថា ការប្រើ ប្រាស់បារី អេឡិចត្រូនិក គឺជាមធ្យោបាយផ្តាច់បារីដែល មាន សុវត្ថិភាព និងមិនប៉ះពាល់ដល់បរិស្ថាន ព្រមទាំងទទួលស្គាល់ដោយអ្នកវិទ្យា សាស្ត្រមួយ ចំនួន។
លោកវេជ្ជបណ្ឌិត មុំ គង់ ប្រធានអង្គការចលនាដើម្បីសុខភាពកម្ពុជា បានលើកឡើងថា ការជក់បារីអេឡិចត្រូនិច មានសាធាតុធ្វើអោយប៉ះពាល់ដល់សុខភាពអ្នកប្រើប្រាស់ដូចគ្នានឹងការជក់បារីដែរ ប៉ុន្តែឧបករណ៍ជក់សម័យថ្មីមួយនេះ អាចនឹងមានគ្រោះថ្នាក់កាន់តែខ្លាំងជាងបារី ប្រសិនបើឧបករណ៍នេះ អាចលាយបញ្ចូលនូវសារធាតុញៀនបាន និងងាយស្រួលដល់អ្នកប្រើប្រាស់។
លោកវេជ្ជបណ្ឌិត មុំ គង់ នាយកប្រតិបត្តិអង្គការចលនាដើម្បីសុខភាពកម្ពុជា បានលើកឡើងថា នៅពេលបច្ចុប្បន្ននេះបារីអេឡិចត្រូនិក ត្រូវបានផ្សព្វផ្សាយ យ៉ាងទូលំ ទូលាយតាមអ៊ីនធឺណិត ហើយជាឧបករណ៍ផ្តាច់បារី ប៉ុន្តែវាពុំដូច្នោះឡើយ។ បារីអេឡិចត្រូនិក គឺជាគ្រឿង ញៀនប្រភេទថ្មី ដែលបាន និងកំពុងពង្វក់អារម្មណ៍យុវជនខ្មែរ ឱ្យឈ្លក់វង្វេង ឈានទៅដល់ ការបោះ បង់ការសិក្សា ការងារ និងបង្កបញ្ហាសង្គមផ្សេងៗទៀតគួ រឱ្យព្រួយ បារម្ភ។
លោកបន្តថា ដូចចែង ក្នុងសេចក្តីណែនាំស្តីពី វិធានការបង្ការបញ្ឈប់ការប្រើប្រាស់ ការធ្វើអាជីវកម្ម និងការនាំ ចូលផលិតផល SISHA និងE-Cigarette ជាបារីអេឡិចត្រូនិក នៅក្នុងព្រះរាជាណាចក្រកម្ពុជា អាជ្ញាធរពាក់ព័ន្ធត្រូវចាត់វិធានការ ជាបន្ទាន់ដោយត្រូវរឹប អូសយកផលិតផលទាំងនោះមករក្សាទុក តាមសេចក្តីណែនាំរបស់អាជ្ញាធរជាតិ ប្រយុទ្ធ ប្រឆាំងគ្រឿងញៀន ដែលបានរឹតបន្តឹងការអនុវត្តឱ្យបានម៉ឺងម៉ាត់ ដើម្បីការពារ សុខភាពប្រជាជន ជាពិសេសយុវជនកម្ពុជាឱ្យបានទាន់ពេលវេ លា ស្រប តាមប្រធាន បទនៃទិវាពិភពលោកគ្មានថ្នាំជក់នាថ្ងៃទី៣១ ខែឧសភា ឆ្នាំ២០២០ ដើម្បីការពារយុវជន ពីឧបាយ កលឧស្សាហកម្មថ្នាំជក់ និងបង្ការពួកគេពីការគ្រោះ ថ្នាក់ដោយការប្រើប្រាស់ថ្នាំជក់និងនីកូទី។
លោកវេជ្ជបណ្ឌិត មុំ គង់ ក៏បានស្នើរអាជ្ញាធរមានសមត្ថកិច្ចពាក់ព័ន្ធឱ្យមានការបកស្រាយបន្ថែម ចំពោះផលប៉ះពាល់ពីបារីអេឡិចត្រូនិចនេះ បើទោះជាអាជ្ញាធរ ធ្លាប់បកស្រាយពីផលប៉ះពាល់ហើយក៏ដោយ តែបានសង្កេតឃើញចំនួនអ្នកប្រើប្រាស់កាន់តែទូលំទូលាយជាងមុន។ ម្យ៉ាងវិញទៀត ដើម្បីឱ្យសាធារណជនបានដឹងអំពីផលប៉ះពាល់ ព្រោះពីមួយថ្ងៃទៅមួយថ្ងៃ អ្នកប្រើប្រាស់មានកាន់តែច្រើនឡើងៗ និងកុំឱ្យខាតបង់ដល់សេដ្ឋកិច្ចកម្ពុជាច្រើនថែមទៀត ដោយសារតែការប្រើប្រាស់បារីអេឡិចត្រូនិចនេះ។
យោងតាមរបាយការណ៍សិក្សា និងស្រាវជ្រាវរបស់អង្គការចលនាដើម្បីសុខភាពកម្ពុជា បានឱ្យដឹងថា តាំងពីឆ្នាំ២០១៤មកម្លេះ អាជ្ញាធរជាតិប្រយុទ្ធប្រឆាំងគ្រឿងញៀន បានបញ្ជាក់ច្បាស់ថា បារីអេឡិកត្រូនិច គឺជាគ្រឿងញៀនប្រភេទថ្មីដែលបាន និងកំពុងពង្វក់ស្មារតីយុវជនខ្មែរឱ្យឈ្លក់វង្វែង ឈានទៅបោះបង់ការសិក្សា ការងារ និងបង្កបញ្ហាសង្គមផ្សេងទៀត គួរឱ្យព្រួយបារម្ភ។ អាជ្ញាធរជាតិប្រយុទ្ធប្រឆាំងគ្រឿងញៀន ក៏បានបង្ហាញនូវសុឆន្ទៈ ក្នុងការហាមឃាត់ការធ្វើការចរាចរណ៍ លក់ផលិតផលបារីអេឡិកត្រូនិច តាមរយៈការចេញសេចក្តីណែនាំ ស្តីពីវិធានការ បង្ការ ការប្រើប្រាស់និងការធ្វើអាជីវកម្ម និងការនាំចូលផលិតផលស៊ីហ្សា និងបារីអេឡិកត្រូនិច នៅក្នុងប្រទេសកម្ពុជា។
ទោះជាយ៉ាងនេះក៏ដោយ គិតត្រឹមឆ្នាំ២០១៩ បានសង្កេតឃើញមានការចែកចាយកាន់តែច្រើនឡើងៗ នូវផលិតផលបារីអេឡិកត្រូនិចតាមអ៊ីនធើណិត តួយ៉ាងដូចជាការផ្សាយលក់ក្នុងទំព័រហ្វេសប៊ុក និងយូធូបជាដើម។ បារីអេឡិកត្រូនិច ក៏ជាប្រភេទមួយនៃផលិតផលថ្នាំជក់ដែលត្រូវបានច្បាប់ស្តីពីការត្រួតពិនិត្យថ្នាំជក់ ហាមឃាត់ការផ្សាយលក់គ្រប់រូបភាព។ ក្នុងន័យនេះ ការផ្សព្វផ្សាយបារីអេឡិកត្រូនិច ជាការល្មើសទៅលើទាំងសេចក្តីណែនាំរបស់អាជ្ងាធរជាតិប្រយុទ្ធប្រឆាំងគ្រឿងញៀន និងច្បាប់ស្តីពីការត្រួតពិនិត្យថ្នាំជក់។
របាយការណ៍បន្តថា បារីអេឡិកត្រូនិច ត្រូវបានគេហៅឈ្មោះផ្សេងៗគ្នា ដូចជា e-cigs, e-hookahs, vapes, vape pens, tank systems, mods ជាដើម។ វាមានទំហំ និងរូបរាងជាច្រើន។ មួយចំនួនមានរូបរាងដូចបារីធម្មតា ខ្លះទៀតខុសគ្នាយ៉ាងខ្លាំងពីបារីធម្មតា។ បារីអេឡិកត្រូនិច ដំណើរការដោយប្រើថាមពលដោយការដុតកម្តៅវត្ថុរាវដែលដាក់នៅក្នុងកំប៉ុងដែលផ្ទុកវត្ថុរាវនោះ។ ក្រៅពីមានផ្ទុកកម្រិតនីកូទីនខ្ពស់ អ្នកជំនាញបានលើកឡើងថា បារីអេឡិកត្រូនិចផ្ទុកសារធាតុគីមីផ្ដល់រសជាតិសិប្បនិមិត្តដែលពុល ដូចជា ប្រូទីឡែនគ្រីកូល គ្លីសេរីន លោហធាតុ ដូចជាសំណរ និងសារធាតុរសជាតិដែលពុលនិងបង្កជំងឺសួត ជំងឺមហារីក និងសារធាតុគីមីជាច្រើនមុខទៀត។
ចំពោះបារីអេឡិកត្រូនិចដែលគេអះអាងថា គ្មានជាតិនីកូទីន ត្រូវបានគេរកឃើញថា មានផ្ទុកជាតិនីកូទីន។ ការនៅក្បែរនរណាម្នាក់ ដែលប្រើប្រាស់បារីអេឡិកត្រូនិច រងផលប៉ះពាល់ស្រដៀងគ្នា និងការស្រូបផ្សេងបារីធម្មតាដែរ។ ទោះបីគេត្រូវធ្វើការសិក្សាស្រាវជ្រាវអំពីបារីអេឡិកត្រូនិចបន្ថែមទៀតក៏ដោយ ក៏ភស្តុតាងអំពីផលប់ះពាល់ដែលត្រូវបានរកឃើញ បញ្ជាក់យ៉ាងច្បាស់ថា យើងមិនគួរប្រើប្រាស់បារីអេឡិកត្រូនិចឡើយ៕ដោយ៖កូឡាប
