ភ្នំពេញ៖ វីដេអូមួយបានបង្កឲ្យមានការភ្ញាក់ផ្អើលជាខ្លាំង ដែលបង្ហាញឲ្យឃើញប៉ូលិសស្បែកខ្មៅម្នាក់ ចាប់ផាកពិន័យប្រជាពលរដ្ឋណាដែលជិះម៉ូតូ រថយន្តខុសច្បាប់ ក្នុងនោះដូចជាជិះពុំពាក់មួកសុវត្ថិភាពជាដើម។ កាយវិការទាំងនេះ ត្រូវបានគេចាត់ទុកថា ជាការសម្តែងធ្វើត្រាប់តាមការអនុវត្តច្បាប់ចរាចរណ៍ផ្លូវគោកថ្មីៗនេះ ពីប៉ូលិសកម្ពុជាយើង ខណៈផ្លាកនៅដៃខាងធ្វេងរបស់ប៉ូលិសស្បែកខ្មៅនេះ បង្ហាញរូបទង់ជាតិកម្ពុជានៅលើអាវ យ៉ាងច្បាស់តែម្តង។
តាមរយៈនេះ គេក៏បានសួរថាតើការអនុវត្តន៍ច្បាប់ចរាចរណ៍ថ្មីនេះ ប្រហែលជាល្អ ឬ មិនល្អយ៉ាងណាទៅ បានជាធ្វើឲ្យពិភពលោកចាប់អារម្មណ៍ រហូតសម្តែងធ្វើត្រាប់តាមបែបនេះ ។ ហើយអ្វីដែលគួរឲ្យអស់សំណើចទៀតនោះ គឺប៉ូលិសស្បែកខ្មៅនៅប្រទេសក្នុងតំបន់អាហ្វ្រិកនៅក្នុងវីដេអូសម្តែងនេះ បានខំយករបស់អ្វីមកញាត់ក្នុងពោះឡើងប៉ោងដូចប៉ូលិសកម្ពុជាយើងដុះក្បាលពោះធំៗអ៊ីចឹងដែរ។
ជាក់ស្តែងមែនទែនទៅ គឺនៅក្នុងវីដេអូនៃការសម្តែងនេះ ក៏បានបង្ហាញឲ្យឃើញជ្រុងមួយ អ្នកជិះខុសច្បាប់ ឬយានយន្តពុំមានគ្រប់លក្ខណៈ បានយកលុយសូកប៉ូលិសដោយឥតអៀនខ្មាស នៅចំពោះមុខហ្វូងមនុស្សពេញផ្លូវថ្នល់ទៀតផង៕ ដោយ៖ លឹម ហុង