នាយករដ្ឋមន្ត្រីឥណ្ឌា លោក Narendra Modi បាននិយាយកាលពីថ្ងៃចន្ទម្សិលមិញថា ឥណ្ឌានឹងធ្វើការបន្ធូរបន្ថយការលើការ បិទប្រទេស ទោះបីជាមានការរាយការណ៍ ពីការឆ្លងវីរុសកើនឡើងក្តី។
ឥណ្ឌាបានធ្វើការបិទដំណើរការអ្វីៗទាំងអស់ ក្នុងប្រទេសអស់រយៈពេល ៧សប្តាហ៍មកហើយ ដើម្បីទប់ស្កាត់ការរីករាលដាលនៃវីរុសកូរ៉ូណា។
លោក Modi បានប្រឈមនឹងការអំពាវនាវកាន់តែខ្លាំង ដើម្បីឲ្យបញ្ចប់ការបិទប្រទេស ដោយគណបក្សនយោបាយ អ្នកជំនួញ និងពលរដ្ឋនៃប្រទេសនេះ បាននិយាយថា វិធានការបិទប្រទេស របស់រដ្ឋាភិបាលបានបំផ្លាញ ជីវភាពរបស់មនុស្សរាប់លាននាក់ ដែលពឹងផ្អែកទៅលើប្រាក់កម្រៃប្រចាំថ្ងៃ សម្រាប់ចិញ្ជឹមជីវិត។
កាលពីថ្ងៃចន្ទ លោក Modi បានថ្លែងប្រាប់ប្រមុខរដ្ឋថា រដ្ឋាភិបាលនឹងធ្វើការបន្ធូរបន្ថយ ជាបន្តបន្ទាប់ ដែលការបិទនោះ ត្រូវបានពន្យារពេលរហូតដល់ថ្ងៃទី ១៧ ខែឧសភានេះ។
លោកនិយាយថា “យើងមានបញ្ហាប្រឈម ២គឺ ការកាត់បន្ថយអត្រាចម្លងជំងឺ និងបង្កើនសកម្មភាពសាធារណៈជាបន្តបន្ទាប់”។
លោកបន្តទៀតថា “ទោះបីជាយើងសម្លឹង មើលការដកការរឹតត្បតិជាបន្តបន្ទាប់ក្តី ពួកយើងគួរចងចាំជានិច្ចថា ទាល់តែពួកយើងរកឃើញវ៉ាក់សាំង ឬដំណោះស្រាយ ហើយអាវុធដ៏ធំបំផុត សម្រាប់ពួកយើងដើម្បីប្រយុទ្ធនឹងវីរុសគឺ ការអនុវត្តគម្លាតសង្គម”។
ឥណ្ឌាមានប្រជាជនសរុបទាំងអស់ជាង ១,៣ពាន់លាននាក់។ រហូតមកដល់ពេលនេះ ប្រទេសមានប្រជាជនច្រើនលេខ ២ក្នុងលោកនេះ មានអ្នកឆ្លងសរុប ៧៧.៧៥៦នាក់ និងអ្នកស្លាប់ ២.២៩៣នាក់។ អ្នកជាសះស្បើយមាន ២២.៤៥៥នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia