ខេត្តព្រះសីហនុ៖ ក្រុមអ្នករត់ការទំនិញចេញចូល ឬរត់ការជើងសារគយ តាមច្រកមន្ត្រីកំពង់ផែស្វយ័តក្រុងព្រះសីហនុ បានចោទថ្នាក់ដឹកនាំកំពង់ផែនេះ ថាបានបង្កើតឲ្យមានការិយាធិបតេយ្យច្រើនកន្លែង ហើយមន្ត្រីជំនាញនីមួយៗ បានតម្រូវឲ្យពួកគេបង់លុយថ្លៃសេវាផ្សេងៗ ដោយមិនបានចេញវិក្កយបត្រជូន ដូចគ្នាមន្ត្រីសាខាគយ និងរដ្ឋាករកំពង់ផែអន្តរជាតិក្រុងព្រះសីហនុបានប្រព្រឹត្តដែរ។
ក្រុមអ្នករត់ការទំនិញចេញចូលមួយចំនួន បានផ្តល់សម្ភាសដល់អ្នកយកព័ត៌មាន CEN.COM.KH ប្រចាំខេត្តព្រះសីហនុ នៅថ្ងៃអង្គារ ទី២៣ ខែមករា ឆ្នាំ២០១៨ ថា មន្ត្រីបំរើការងារនៅកំពង់ផែស្វយ័តក្រុងព្រះសីហនុ មួយចំនួន បានប្រើតួនាទី ទៅតាមជំនាញរៀងៗខ្លួន របស់ពួកគេ ដើម្បីប្រមូលលុយ ពីក្រុមអ្នករត់ការទំនិញ ឬជើងសារគយ ដោយមិនចេញវិក្កយបត្រ ដើម្បីបញ្ជាក់ការចំណាយ ដូចគ្នាមន្ត្រីគយ និងរដ្ឋាករប្រចាំកំពង់ផែអន្តរជាតិក្រុងព្រះសីហនុ ដឹកនាំដោយ លោក យ៉ឹក យូរ បានប្រព្រឹត្តដែរ។
ប្រភពដែល បានអះអាងថា រាល់ថ្ងៃនេះ ពួកគេបានចំណាយលុយ ដែលមន្ត្រីជំនាញ បំរើការនៅកំពង់ផែស្វយ័ត ដែលមិនបានចេញវិក័យបត្រជូនពួកគេរួមមាន៖ មន្ត្រីប្រចាំការនៅទីតាំងលើកដាក់ទំនិញ មន្ត្រីប្រចាំការនៅទីកន្លែងផ្ញើទូរទំនិញ មន្ត្រីមានតួនាទីស៊ីញ៉េលើឯកសារផ្សេងៗប្រចាំការនៅទីតាំង ឬនៅលើទីលាន ក្នុងកំពង់ផែស្វយ័ត និង មន្ត្រីប្រចាំការរាប់ក្បាលឡានដឹកទំនិញ ឬឡានដឹកកុងតេន័រជាដើម។
ផ្តើមពីបញ្ហានេះ ប្រភពពីក្រុមអ្នករត់ការ និង ឯកសារចំណាយលើដំណើរការងាររត់ការយកទូរទំនិញចេញចូលតាមច្រកកំពង់ផែស្វយ័តក្រុងព្រះសីហនុ បានស្នើដល់ លោក លូ គឹមឈុន ប្រតិភូរាជរដ្ឋាភិបាល និងជាអគ្គនាយកកំពង់ផែស្វយ័តក្រុងព្រះសីហនុ ជួយសម្របសម្រួល និងពិនិត្យ ឈានទៅកែប្រែជុំវិញសកម្មភាពមិនប្រក្រតី ដែលបានកើតមាននៅកំពង់ផែស្វយ័តនេះ ឲ្យបានត្រឹមត្រូវឡើងវិញ។ ជាងនេះ ទៀត ក្រុមអ្នករត់ការទំនិញ ក៏បានសំណូមពរ ដល់ថ្នាក់ដឹកនាំក្រសួងស្ថាប័នពាក់ព័ន្ធ ពិសេសស្ថាប័នអង្គភាពប្រឆាំងអំពើពុករលួយ ជួយបញ្ជូនមន្ត្រីចុះស៊ើបអង្កេតជុំវិញភាពមិនប្រក្រតី នៃអំពើពុករលួយ ដែលផ្តើមពីការបង្កើតឲ្យមានការិយាធិបតេយ្យច្រើនកន្លែងទាំងនៅកំពង់ផែស្វយ័តក្រុងព្រះសីហនុ ក៏ដូចជាអំពើពុករលួយ កំពុងកើតមាននៅក្នុងស្ថាប័នសាខាគយ និងរដ្ឋាករប្រចាំកំពង់ផែអន្តរជាតិក្រុងព្រះសីហនុឲ្យបានឆាប់តាម ដែលអាចធ្វើទៅបាន។
ប្រភពពីក្រុមអ្នករត់ការទំនិញមួយចំនួន បានឲ្យដឹងទៀតថា តាមធម្មតាការបង់ថ្លៃសេវាលើកដាក់ទំនិញនាំចូល និងនាំចេញ ក្រុមហ៊ុននាំទំនិញ តម្រូវឲ្យបង់ថ្លៃសេវាតាមវិក្កយបត្រ ឲ្យបានត្រឹមត្រូវ ដោយក្នុង ១ទូរៗ ឬ ១កុងតែន័រ ២០ហ្វីត(20feet) ត្រូវបង់ ៦៩.៣០ដុល្លារ (ហុកសិបប្រាំបួន ចុចសាមសិបសេនដុល្លារអាមេរិក)។ ក្នុងនោះសម្រាប់ កុងតេន័រ ៤០ហ្វីត ត្រូវបង់ ១០៥.៦០ដុល្លារអាមេរិក (មួយរយប្រាំដុល្លារចុច៦០សេនអាមេរិក)។ ប៉ុន្តែជាក់ស្តែង ក្រុមអ្នករត់ការទំនិញទាំងនោះ បានអះអាងថា ត្រូវមន្ត្រីខិលខូចមួយចំនួន បានឆ្លៀតឱកាសយកតួនាទី ឬជំនាញរៀងៗខ្លួន មកបង្ខំឲ្យក្រុមអ្នករត់ការ ត្រូវបង់លុយក្រៅផ្លូវការបន្ថែមទៀត ដោយមិនមានចេញវិក្កយបត្រជូនពួកគេនោះទេ។
ក្រុមអ្នករត់ការទំនិញ នៅកំពង់ផែស្វយ័ត ក្រុងព្រះសីហនុ បានអះអាងថា មន្ត្រីជំនាញនៅតាមការិយាធិបតេយ្យនីមួយៗ នៅក្នុងកំពង់ផែនេះ អាចរកលុយពុករលួយ ពីក្រុមអ្នករត់ការទំនិញ ឬរត់ការជើងសារគយ បានដោយងាយៗ មានដូចជា៖ ទី១/ នៅទីកន្លែង ឬទីលានលើកដាក់ទូរទំនិញ បានតម្រូវឲ្យក្រុមអ្នករត់ការបង់ថ្លៃសេវាបន្ថែម ដែលមិនមានវិក្កយបត្រចំនួន ១០,០០០៛(មួយម៉ឺនរៀល) ក្នុង ១ទូរ ២០ហ្វីត(20feet) និងកុងតែន័រ ៤០ហ្វីត ត្រូវបង់បន្ថែម ១៥,០០០៛ (មួយម៉ឺនប្រាំពាន់រៀល)។ ថ្លៃចំណាយខាងលើនេះ លោក ឡុន ស៊ីន ជាអ្នកប្រមូលយកលុយទាំងនោះ។
២. កន្លែងរាប់ក្បាលឡាន ក៏តម្រូវឲ្យអ្នករត់ការបង់ថ្លៃសេវាបន្ថែម ដែលមិនមានវិក្កយបត្រចំនួន ៣,៥០០៛(បីពាន់ប្រាំរយរៀល) ក្នុង ១ទូរ ២០ហ្វីត(20feet) និងកុងតេន័រ៤០ហ្វីត ត្រូវបង់បន្ថែម៦,០០០៛ (ប្រាំមួយពាន់រៀល) ។
៣. ថ្លៃស៊ីញ៉េលើឯកសារនៅទីលាន ក៏តម្រូវឲ្យអ្នករត់ការបង់ថ្លៃសេវាបន្ថែម មិនមានវិក្កយបត្រ ចំនួន ២,០០០៛(ពីរពាន់រៀល) ក្នុង ១ទូរ(កុងតែន័រ) ដោយថ្លៃចំណាយនេះ លោក ថៃ ម៉េងលី ជាអ្នកប្រមូលយក។
៤. ថ្លៃផ្ញើកុងតែន័រនៅទីលានទុកដាក់ទំនិញក្នុងកំពង់ផែ ត្រូវមន្ត្រីទាំងនោះតម្រូវឲ្យអ្នករត់ការបង់ថ្លៃសេវាបន្ថែម ទាំងមិនមានវិក្កយបត្រចំនួន ២០ដុល្លារសហរដ្ឋអាមេរិក(ម្ភៃដុល្លារ)សម្រាប់ ១ទូរ ២០ហ្វីត(20feet) ក្នុង ១ថ្ងៃ និងកុងតែន័រ ៤០ហ្វីត ត្រូវបង់បន្ថែម ៤០ដុល្លារ (សែសិបដុល្លារ)។ ប្រាក់ចំណាយនៅកន្លែងនេះ លោក ទុយ វណ្ណនី ជាអ្នកប្រមូលយកលុយទាំងនេះ ។
ត្រង់ចំណុចនេះ ក្រុមអ្នករត់ការគយ នៅកំពង់ផែស្វយ័តក្រុងព្រះសីហនុ បានអះអាងថា បើអ្នករត់ការទំនិញទាំងឡាយណាប្រញាប់ គឺត្រូវមន្ត្រីប្រចាំនៅកន្លែងឡានស្ទួច(RTG) តម្រូវឲ្យបង់ថ្លៃសេវាបន្ថែម ដែលមិនមានវិក្កយបត្រ ចាប់ពី ៥ដុល្លារ ទៅ ១០ដុល្លារក្នុង ១ទូរៗទៀមទៀត។
យ៉ាងនេះក្តី អ្នកយកព័ត៌មាន CEN.COM.KH ប្រចាំខេត្តព្រះសីហនុ មិនទាន់អាចសុំការបំភ្លឺជុំវិញព័ត៌មានខាងលើនេះ ពីមន្ត្រីមួយចំនួន កំពុងបំរើការងារនៅកំពង់ផែស្វយ័តក្រុងព្រះសីហនុ ដែលរងការចោទប្រកាន់ខាងលើបាន នៅឡើយទេ។ ជាងនេះទៀត ក៏មិនអាចទាក់ទង លោក លូ គឹមឈុន ប្រតិភូរាជរដ្ឋាភិបាល និងជាអគ្គនាយកកំពង់ផែស្វយ័តក្រុងព្រះសីហនុ ដើម្បីសុំការបំភ្លឺតាមទូរស័ព្ទ បាននៅឡើយដែរ កាលពីព្រឹកថ្ងៃអង្គារ ទី២៣ ខែមករា ឆ្នាំ២០១៨៕ ដែន សីមា
