ភ្នំពេញ៖ មនុស្សជាច្រើន អ្នកណាៗក៏ធ្លាប់លឺ និងល្បីដែរថា រាល់ម៉ូតូ ឡាន ដែលបង្កបទល្មើស នោះពេលទៅដល់កន្លែងប៉ុស្តិ៍ ឬ ខណ្ឌ ហើយ ពេលម្ចាស់មកយកវិញ គឺសង្ឃឹមតិចតួចណាស់ ដែលរបស់ទ្រព្យរបស់ពួកគេនៅល្អទាំងស្រុង។ ជាក់ស្តែង ដូចដែលម្ចាស់រថយន្តកាម៉ារីបាឡែនពណ៌ស១គ្រឿងជាដើម បានបង្ហោះវីដេអូដោយសម្តែងនូវការហួសចិត្តខ្លាំងបំផុត ដែលសឹងតែពុំនឹកស្មានដល់ នៅពេលដែលគាត់បានឃើញរថយន្តរងគ្រោះរបស់គាត់ ត្រូវបានដោះគ្រឿងទាំងក្នុងនិងក្រៅគ្មានសល់ ដោយបន្សល់ទុកតែសំបកម៉ាស៊ីន និងតួរថយន្តប៉ុណ្ណោះ ក្រោយត្រូវបានអូសមករក្សាទុកនៅអធិការដ្ឋាននគរបាលស្រុកអង្គស្នួល ខេត្តកណ្ដាលកាលពីឆ្នាំមុន។
បើតាមម្ចាស់រថយន្ត បាននិយាយរៀបរាប់នៅក្នុងវីដេអូ នោះរថយន្តរបស់គាត់ បានជួបគ្រោះថ្នាក់ចរាចរណ៍បុកគ្នាកាលពីឆ្នាំមុន ហើយក៏ត្រូវបានសមត្ថកិច្ចអូសយកមករក្សាទុក ដើម្បីរង់ចាំការដោះស្រាយ ។ ប៉ុន្តែ ដោយសារការដោះស្រាយត្រូវអូសបន្លាយ ហេតុនេះ រថយន្តរបស់គាត់ក៏ត្រូវបានរក្សាទុករហូតមកទល់ពេលនេះតែម្តង។
ទោះយ៉ាងណា ខណៈដែលគាត់បានមកពិនិត្យមើលរថយន្តនៅពេលនេះ គាត់ពិតជាស្រឡាំងកាំងតែម្តង ខណៈឃើញរថយន្តត្រូវបានដោះយកគ្មានសល់ដូចជា៖ ម៉ាញ៉េ ស្តុប តាបឡូ អាគុយ និងគ្រឿងក្នុងជាច្រើនទៀត ដោយទុកតែសម្បកម៉ាស៊ីនតែប៉ុណ្ណោះ។
ម្ចាស់រថយន្តដែលមានគណនីហ្វេសប៊ុកឈ្មោះ Hok Tanghong បានបង្ហោះរូបភាព និងវីដេអូជាក់ស្តែង ដោយសរសេរបញ្ជាក់ទាំងហួសចិត្តថា៖ “នេះហើយឡានខ្ញុំដែលបានរក្សាទុកនៅក្នុងអធិការដ្ឋាននគរបាល ស្រុកអង្គស្នួល ខេត្តកណ្ដាលហើយ ពេលមកគ្រឿងពេញ ដលពេលមកដកឡានវិញស៊ីគ្រឿងអស់សុំខ្លាចហើយលោកប៉ូលិសសេអើយ ធ្លាប់តែលឺគេថាអីឡូវជួបផ្ទាល់ខ្លួនឯងបានដឹង” ៕
ដោយ៖ លឹម ហុង
