ស្ទឹងត្រែង៖ ប្រជាពលរដ្ឋជាច្រើននាក់ បាននាំគ្នាតវ៉ាសម្រុក ចូលអគារខណ្ឌរដ្ឋបាលជល ផលខេត្តស្ទឹងត្រែង នៅព្រឹកថ្ងៃទី១៩ ខែឧសភា ឆ្នាំ២០២០។
នៅព្រឹកថ្ងៃដដែល មន្ត្រីជលផលខេត្តស្ទឹងត្រែង បានចុះឃាត់បុរសម្នាក់ ដែលជាមុខសញ្ញ៉ារកស៊ីដឹកត្រីលក់។ ជលផល សង្ស័យថា បុរសមុខសញ្ញាដឹកជញ្ជូនត្រី ពាក់ព័ន្ធបទល្មើស ចេញពីតំបន់អភិរក្ស ដងទន្លេមេគង្គ នៅភូមិត្បូងខ្លា ឃុំអូរម្រះ ស្រុកសៀមបូក ខេត្តស្ទឹងត្រែង។
មន្ត្រីជំនាញជលផល ឃាត់សួរនាំយកទៅខណ្ឌជលផលខេត្ត ក៏ស្រាប់តែមានការតវ៉ា សម្រុកចូលអគាររដ្ឋបាលខណ្ឌជលផលខេត្តស្ទឹងត្រែង ក្នុងគោលបំណងទាមទារ ឲ្យមានការដោះលែងបុរសម្នាក់ ដែលត្រូវជលផលឃាត់ខ្លួនទៅវិញ។
លោក ទុំ នីរ៉ូ នាយខណ្ឌជលខេត្តស្ទឹងត្រែង បានបំភ្លឺថា ការសម្រុកចូលអគាររដ្ឋជាទង្វើខុសច្បាប់។ តែការយោគយល់ និងមានការសម្របសម្រួល មន្ត្រីជំនាញបានអនុញ្ញាតឲ្យបុរសអ្នកភូមិវិលត្រឡប់ទៅផ្ទះវិញ។ ករណីនេះ គឺជាការភាន់ច្រឡំ។ លោក នាយខណ្ឌជលផលបានបន្តថា ក្នុងរដូវបិទនេសាទនេះ ក្នុងតំបន់ខេត្តស្ទឹងត្រែង ច្បាប់មិនអនុញ្ញាតឲ្យមានការនេសាទ ដោយប្រើឧបករណ៍ខុសច្បាប់ ឬដឹកជញ្ជូនអនុផលត្រី ដែលមានពងលក្ខណៈជួញដូរឡើយ។
រដូវនេះ ត្រីរាប់លានក្បាល កំពុងពង ហើយបម្លាស់ទីទៅរកកន្លែងពងកូន។
លោកនី រ៉ូ សុំអំពាវនាវដល់ប្រជាពលរដ្ឋ ចូលរួមថែរក្សាអភិរក្សត្រីមេពូជ ដើម្បីគង់វង្សតកូនដល់ចៅ។ លោកថា ការចុះផ្សាយ ស្តីច្បាប់ជលផលឆ្នាំនេះ ឃើញថាប្រជាពលរដ្ឋខេត្តស្ទឹងត្រែង យល់ដឹងមិនប្រព្រឹត្តបទល្មើសនេសាទ ដូចជា ការប្រើឧបករឆក់ និងបណ្តែតមងកាត់ទន្លេស្អេកស្កះ ដូចរាល់ឆ្នាំទៀតឡើយ។
នៅឆ្នាំនេះ សហគមន៍ចំនួន៥៦ ត្រូវបានបង្កើតឡើង ដើម្បីការពារនិងទប់ស្កាត់ បទល្មើសនេសាទ។ ហើយជនសង្ស័យរួមទាំងវត្ថុតាង ជាច្រើនករណី ត្រូវបានបញ្ជូនសំណុំរឿង ទៅតុលាការ៕
ដោយ៖សុខុម