ភ្នំពេញា៖ ដើម្បីស្តាប់នូវរាល់បញ្ហាអ្វីគ្រប់យ៉ាងដែលប្រជាពលរដ្ឋចង់បាន ក្នុងការកែលម្អក្នុងសហគមន៍ វេទិកាផ្សព្វផ្សាយនិងពិគ្រោះយោបល់ របស់ក្រុមប្រឹក្សារាជធានីភ្នំពេញ ត្រូវបានធ្វើឡើងនៅកោះពេជ្រ កាលពីព្រឹកថ្ងៃទី១០ខែតុលានេះ។បើតាមលោកជាម ហេង មន្ត្រីរដ្ឋបាលរាជធានីភ្នំពេញ បានឲ្យដឹងថា វាទិកាផ្សព្វផ្សាយនិងពិគ្រោះយោបល់ របស់ក្រុមប្រឹក្សារាជធានី នាពេលនេះ ផ្តោតសំខាន់ពាក់ព័ន្ធបញ្ហា៣ចំណុច ដែលទាក់ទងនឹងកង្វល់ផ្ទាល់របស់ប្រជាពលរដ្ឋ ក្នុងនោះរួមមាន បញ្ហាសន្តិសុខ សណ្តាប់ធ្នាប់ បញ្ហាបរិស្ថាន និងបញ្ហាអភិវឌ្ឍមូលដ្ឋាន។
លោកសួន រិនឌី សមាជិកក្រុមប្រឹក្សារាជធានីភ្នំពេញ បានមានប្រសាសន៍ថា វាទិកាផ្សព្វផ្សាយនិងពិគ្រោះយោបល់ នឹងផ្តល់ជូនដល់ប្រជាពលរដ្ឋ ក្នុងការចូលរួមក្នុងដំណើរការអភិបាលកិច្ចល្អ និងជាប្រព័ន្ធមួយសម្រាប់លើកកម្ពស់គណនេយ្យភាព តម្លាភាពក្នុងការពិនិត្យមើល ក្នុងការផ្តល់សេវាសាធារណៈ របស់រដ្ឋបាលរាជធានីភ្នំពេញ ក្នុងគោលបំណងដើម្បីធានាថា នូវរាល់បញ្ហាអាទិភាពរបស់ប្រជាពលរដ្ឋ នៅមូលដ្ឋានត្រូវបានពិនិត្យដោះស្រាយនិងឆ្លើយតប គ្រប់អ្នកពាក់ព័ន្ធទាំងអស់ក្នុងមូលដ្ឋាន ត្រូវបានរួមបញ្ចូល បរិយាប័ន្នក្នុងដំណើរការ នៃការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ។ ម្យ៉ាងទៀត ក្រុមប្រឹក្សារាជធានីភ្នំពេញ មានគោលបំណងជំរុញនូវវប្បធម៌ នៃការសិក្សានិងការលើកកម្ពស់ គណនេយ្យភាពតាមបែបប្រជាធិបតេយ្យ នៃការរៀបចំវេទិកាផ្សព្វផ្សាយនិងពិគ្រោះយោបល់ នូវរៀងរាល់ត្រីមាសទី៤ ក្នុងឆ្នាំនីមួយៗ ហើយផ្តល់ឱកាសនោះក្រុមប្រឹក្សារាជធានីភ្នំពេញ នឹងធ្វើការផ្តល់ជូនព័ត៌មានដល់ប្រជាពលរដ្ឋ និងសមិទ្ធដែលក្រុមប្រឹក្សាសម្រេចបាននាពេលកន្លងមក និងបញ្ហាប្រឈមនានា ។ ផ្តល់ព័ត៌មានដល់ប្រជាពលរដ្ឋអំពីអាទិភាពនៃការអភិវឌ្ឍរបស់ក្រុមប្រឹក្សាទៅឆ្នាំខាងមុខ ផ្តល់ឱកាសដល់ប្រជាពលរដ្ឋដើម្បីពិភាក្សាលើរបាយការណ៍របស់ក្រុមប្រឹក្សា ទទួលយកអនុសាសន៍និងសំណូមពររបស់ប្រជាពលរដ្ឋ ដើម្បីពិភាក្សានិងឆ្លើយតប។
លោកសមាជិកក្រុមប្រឹក្សារាជធានី បានបញ្ជាក់បន្ថែមថា រាល់សំណួរសំណើសំណូមពររបស់ប្រជាពលរដ្ឋ ដែលបានដាក់ជូនក្រុមប្រឹក្សារាជធានីនាពេលឆ្នាំ២០១៦កន្លងមក គឺក្រុមប្រឹក្សាបានចាត់ឲ្យគណៈអភិបាលរាជធានីភ្នំពេញ ធ្វើការដោះស្រាយជាបន្តបន្ទាប់ និងសំណូមពរមួយចំនួនដែលពាក់ព័ន្ធនឹងថវិកាអភិវឌ្ឍន៍របស់រាជធានី ត្រូវបានដាក់ចូលក្នុងផែនការអភិវឌ្ឍ៣ឆ្នាំរំកិល។
គួរបញ្ជាក់ថា សម្រាប់រដ្ឋបាលរាជធានីភ្នំពេញ ការចូលរួមមតិយោបល់ និងលើកឡើងនូវសំណើ សំណួរ សំណូមពររបស់ប្រជាពលរដ្ឋ ពិតបាននាំមកនូវសក្តានុពលយ៉ាងធំធេង និងបានធ្វើឲ្យរដ្ឋបាលរាជធានីភ្នំពេញ ឆ្លុះបញ្ចាំងនូវចំណុចអសកម្មនាពេលកន្លងមក ដើម្បីរដ្ឋបាលរាជធានីធ្វើការកែលម្អឡើងវិញ និងអភិវឌ្ឍន៍ក្នុងមូលដ្ឋានឲ្យបានល្អប្រសើរ និងស្វែងរកនូវដំណោះស្រាយ ជូនប្រជាពលរដ្ឋឲ្យមានតម្លាភាព និងមានប្រសិទ្ធភាព ក្នុងនាមជាតំណាងរដ្ឋបាលសាធារណៈ៕ដោយ៖កូឡាប
