ភ្នំពេញ៖ បុរសម្នាក់ដែលមានវ័យប្រហែល៤០ឆ្នាំ ដែលជារត់ម៉ូតូកង់បី passapp ត្រូវបានអ្នកធ្វើដំណើរប្រទះឃើញដេកក្នុងម៉ូតូកង់បី ដោយមានអាការបែកពពុះមាត់ បាត់បង់ស្មារតីវង្វង់វង្វាន់ ដោយសង្ស័យត្រូវថ្នាំនរណាម្នាក់ ក៏ត្រូវបានបញ្ជូនទៅមន្ទីរពេទ្យភ្លាមៗ។ ហេតុការណ៍នេះបានកើតឡើងនៅវេលាម៉ោង១១ និង៣០នាទីថ្ងៃទី១៩ ខែឧសភាឆ្នាំ២០២០ នៅតាមបណ្តោយផ្លូវ២៧១ ភូមិបបុរី១០០ខ្នង សង្កាត់ទឹកថ្លា ខណ្ឌសែនសុខ។
បុរសខាងលើមិនត្រូវបានស្គាល់អត្តសញ្ញាណនោះទេ រីឯ ម៉ូតូកង់បី ពណ៌លឿងលាយបៃតង ដែលមានផ្លាកលេខ 1HL-7949 ។
យោងតាមប្រភពព័ត៌មានពីបុរសវ័យចំណាស់ម្នាក់ដែលនៅកន្លែងកើតហេតុបានឲ្យដឹងថា មុនពេលកើតហេតុបុរសរងគ្រោះដែលជាអ្នករត់ passapp បានដឹកនារីម្នាក់មកឈប់ទិញទឹកក្រឡុកនៅមុខមន្ទីរពេទ្យកុសុមៈ បានមួយសន្ទុះស្រាប់តែឃើញដេកបែកពពុះមាត់ បាត់បង់ស្មារតីនៅក្នុង passapp តែម្នាក់ឯង ឃើញដូច្នោះទើបប្រជាពលរដ្ឋនាំគ្នាជួយសម្រួលកាយគាត់ រួចបញ្ជូនទៅមន្ទីរទៅមន្ទីរពេទ្យតែម្តង ។
ដោយឡែកនៅក្នុងខ្លួនបុរសរងគ្រោះនោះមិនមានទូរស័ព្ទ ឬរបស់របរអ្វីផ្សេងនោះទេ ទើបសង្ស័យថា ត្រូវគេដាក់ថ្នាំយកទ្រព្យសម្បត្តិអស់ហើយ៕
ដោយ៖ហង់ ភក្ត្រា និងសាម៉េត
