សៀមរាប៖ សត្វព្រៃដែលរួមមានទាំងប្រភេទសត្វជិតផុតពូជផងនោះ ត្រូវបានគេកាត់ក្បាល ជើង និងខ្លួនជាដុំៗដាក់លក់នៅតាមផ្សារ តាមផ្លូវសាធារណៈ និងតាមការបញ្ជាទិញតាមទូរស័ព្ទហើយនៅតាមភោជនីយដ្ឋាន ក៏មានលក់ម្ហូបសាច់សត្វព្រៃដែរ ។
ជាក់ស្តែង អាហារដ្ឋានចំនួន ៣ ទីតាំងនៅខេត្តសៀមរាប កសាច់សត្វព្រៃមកធ្វើម្ហូបអាហារលក់ជូនភ្ញៀវ ដោយខុសច្បាប់ ត្រូវកងកម្លាំងសមត្ថកិច្ច សង្កាត់រដ្ឋបាលព្រៃឈើប្រាសាទបាគង នៃខណ្ឌរដ្ឋបាលព្រៃឈើសៀមរាប សហការជាមួយក្រុមអន្តរាគមន៍ បង្ក្រាបបទល្មើសសត្វព្រៃចល័តនៃរដ្ឋបាលព្រៃឈើ បានចុះបង្ក្រាបបទល្មើសសត្វព្រៃ នាថ្ងៃទី២៤ ខែឧសភា ឆ្នាំ២០២០ ។
អាហារដ្ឋាន និងវត្ថុតាង ដែលបង្ក្រាបបាននោះរួមមាន៖ ១) អាហារដ្ឋានម្លប់មហាហេង ស្ថិតនៅភូមិទ្រាំងសង្កាត់ស្លក្រាម ក្រុងសៀមរាប ដោយរឹបអូសបានសត្វទោមងាប់ចំនួន ១១ក្បាល លលកងាប់ចំនួន ៥០ក្បាល និងចាបស្រូវងាប់ចំនួន ២៣០ក្បាល។ ២) អាហារដ្ឋានថារីម៉ាក់ប្រាង្គ ស្ថិតនៅភូមិទ្រាំង សង្កាត់ស្លក្រាម ក្រុងសៀមរាប ដោយរឹបអូសបានសាច់ជ្រូកព្រៃស្រស់ចំនួន ៣គីឡូក្រាម លលកទ្រាំងងាប់ចំនួន ៣៧ក្បាល ចាបស្រូវងាប់ចំនួន ១៥០ក្បាល និងក្រួចអឺតងាប់ចំនួន ១០ក្បាល។ ៣) អាហារដ្ឋានសម្រស់ម្លប់ម៉ាក់ប្រាង្គថ្មី ស្ថិតនៅភូមិទ្រាំង សង្កាត់ស្លក្រាម ក្រុងសៀមរាប ដោយរឹបអូសបានសាច់អន្សងស្រស់ចំនួន ៣,៣គីឡូក្រាម សាច់ជ្រូកព្រៃស្រស់ចំនួន ៥,៣គីឡូក្រាម ចាបស្រូវងាប់ចំនួន ៨០ក្បាល លលកបាយងាប់ចំនួន ១០ក្បាល និងអណ្តើកស្រែងាប់ ១ក្បាល ស្មើនឹង ០,៨គីឡូក្រាម។
រដ្ឋបាលព្រៃឈើ បានបន្តថា វត្ថុតាងទាំងអស់ខាងលើ ត្រូវបានកប់បំផ្លាញចោល នៅថ្នាលបណ្តុះកូនឈើស្ពានអង្គរ ស្ថិតក្នុងភូមិអញ្ចាញ សង្កាត់នគរធំ ក្រុងសៀមរាប។
សាច់សត្វព្រៃ ដូចជា ប្រើស ឈ្លូស ត្រគួត អណ្តើក និងជ្រូកព្រៃជាដើម គេឃើញតាំងលក់ដោយបើកជំហរក្នុងផ្សារមួយចំនួននៅបណ្តាខេត្តនាភូមិភាគឦសាន ដោយគ្មានខ្លាចរអាច្បាប់។ ពលរដ្ឋ និងមន្ត្រីសង្គមស៊ីវិលសង្កេតឃើញថា ជនល្មើសមុខដដែលៗ លក់សត្វព្រៃជារបបអាជីពចិញ្ចឹមជីវិតខុសច្បាប់ច្រើនឆ្នាំមក ហើយ ដែលអាជ្ញាធរធ្លាប់ឃាត់ខ្លួនត្រឹមធ្វើកិច្ចសន្យារបញ្ឈប់ និងវិន័យជាប្រាក់តិចតូច ក្រោយមកពួកគេលក់សត្វព្រៃវិញដដែល។
ពលរដ្ឋ និងមន្ត្រីសង្គមស៊ីវិល រិះគន់សមត្ថកិច្ចជំនាញគ្រប់ស្ថាប័ន ក្នុងខេត្តនេះថា ព្រងើយកន្តើយក្នុងកិច្ចសហការគ្នា លប់បំបាត់ការជួញដូរសត្វព្រៃឲ្យមានប្រសិទ្ធភាព ដើម្បីរួមចំណែកអភិរក្សសត្វព្រៃកម្រជិតផុតពូជ ដែលនៅសេសសល់តិចតូចនៅខេត្តភាគឦសាននេះ។ ពួកគេអង្កេតឃើញថា នៅតាមភោជនីយដ្ឋានមួយចំនួន ក៏មានការចម្អិនអាហារពីសាច់សត្វព្រៃជាច្រើនប្រភេទ ដើម្បីជួញដូរ និងធ្វើជាគ្រឿងក្លែម ហើយក៏មានមន្ត្រីនគរបាលយុត្តិធម៌ខ្លះចូលចិត្តបរិភោគសាច់ព្រៃនេះដែរ៕
ដោយ៖កូឡាប
