តាកែវ៖ ក្រោយមានសេចក្តីប្រកាសព័ត៌មានរបស់ក្រសួងសាធារណការ និងដឹកជញ្ជូន បានចេញកាលវិភាគត្រួតពិនិត្យលក្ខណៈបច្ចេកទេសយានជំនិះឆៀកចល័ត នៅតាមបណ្តាខេត្ត ថានឹងមានការត្រួតពិនិត្យលក្ខណៈបច្ចេកទេសយានយន្ត នៅខេត្តចំនួន ៤ រួមមាន ខេត្តមណ្ឌលគិរី ត្បូងឃ្មុំ បន្ទាយមានជ័យ និងខេត្តតាកែវ ចាប់ពីថ្ងៃទី ២៥ ដល់ថ្ងៃ២៩ ខែឧសភា ឆ្នាំ២០២០នេះ យើងឃើញថា មានបងប្អូនប្រជាពលរដ្ឋជាច្រើនក្នុងខេត្តតាកែវ ក៏ដូចជា ខេត្តផ្សេងៗនៅជាប់តាកែវ បានសម្រុកយករថយន្តរបស់ខ្លួនចូលមកឆៀក នៅមន្ទីរសាធារណការ និងដឹកជញ្ជូនខេត្តតាកែវ នៅព្រឹកថ្ងៃទី ២៥ ខែឧសភានេះយ៉ាងកកកុញ ។
មន្ត្រីជំនាញនៃមន្ទីរសាធារណការ និងដឹកជញ្ជូនខេត្តតាកែវ បានឲ្យដឹងថា មុន និងក្រោយការអនុវត្តន៍និងរឹតបន្តឹង ច្បាប់ចរាចរណ៍ផ្លូវគោកថ្មី នៅទូទាំងប្រទេស ក្រោមការសហការ រវាងក្រសួងសាធារណការ និងក្រុមហ៊ុន CMVIC បានចុះធ្វើការត្រួតពិនិត្យលក្ខណៈបច្ចេកទេស រថយន្ត “ឆៀកចល័ត” ក្នុងខេត្តតាកែវ បានជាច្រើនគ្រឿង សម្រុកចូលមកត្រួតពិនិត្យលក្ខណៈបច្ចេកទេសរថយន្តរបស់ខ្លួន។ រថយន្តទាំងអស់នេះ គឺមិនមែនមានតែពលរដ្ឋនៅក្នុងខេត្តតាកែវទេ ភាគច្រើន គឺមកពីបណ្ដាលខេត្តមួយចំនួនដូចជាកំពត កណ្ដាល កំពង់ស្ពឺជាដើម។
លោក អ៊ុំ ចាន់ធូ អនុប្រធានមន្ទីរសាធារណការខេត្ត បានមានប្រសាសន៍បន្តថា បន្ទាប់ពីប្រមុខរាជរដ្ឋាភិបាលកម្ពុជា បានដាក់ចេញការអនុវត្តន៍ច្បាប់ចរាចរណ៍តឹងរ៉ឹងបំផុត ចំពោះអ្នកធ្វើចរាចរណ៍លើទ្រូងផ្លូវ យើងសង្កេតឃើញថា មានរថយន្តជាច្រើនលើសការរំពឹង បានចូលមកធ្វើការត្រួតពិនិត្យលក្ខណៈបច្ចេកទេសយានយន្ត ហើយការត្រួតពិនិត្យនេះ គឺតម្រូវឲ្យម្ចាស់ រថយន្តយកប័ណ្ណសម្គាល់រថយន្ត និងរថយន្តមកពិនិត្យដោយផ្ទាល់ ហើយបើមន្ត្រីក្រុមហ៊ុនត្រួតពិនិត្យឃើញមានខុសលក្ខណៈបច្ចេក ទេសលើរថយន្តរបស់បងប្អូនប្រជាពលរដ្ឋ គឺមន្ត្រីនិងតម្រូវឲ្យម្ចាស់រថយន្តជួសជុល ឬបំពាក់សម្ភារឲ្យបានត្រឹមត្រូវជាមុនសិនមុននិងចេញវិញ្ញាបនបត្របញ្ជាក់ជូន។ ម្យ៉ាងទៀតការត្រួតពិនិត្យលក្ខណៈបច្ចេកទេសរថយន្តនេះ គឺមិនមានការប្រព្រឹត្តអំពើពុករលួយនោះទេ គឺយើងបានបិតតារាងដែលត្រូវ បង់ប្រាក់ ហើយម្ចាស់រថយន្តអាចបង់ប្រាក់តាមក្រុមហ៊ុនវីង ឬលីហួរ បានគ្រប់ទីកន្លែង។
សូមបញ្ជាក់ដែរថា ការដាក់ម៉ាស៊ីនត្រួតពិនិត្យលក្ខណៈបច្ចេកទេស រថយន្តនៅក្នុងខេត្តតាកែវ ពីសំណាក់ក្រុមហ៊ុន CMVIC បានទទួលសិទ្ធិពីក្រសួងសាធារណការ វាពិតជាបានកាត់បន្ថយការចំណាយ របស់បងប្អូនប្រជាពលរដ្ឋក្នុងខេត្តជាច្រើន ដែលពីមុនពួកគាត់បាននាំគ្នាទៅធ្វើការត្រួតពិនិត្យលក្ខណៈបច្ចេកទេស រថយន្តនៅរាជធានីភ្នំពេញ ដោយចំណាយពេលវេលាយូរ និងចំណាយថវិកាច្រើនថែមទៀតផង។ ការចុះមកត្រួតពិនិត្យលក្ខណៈបច្ចេកទេស ដល់កន្លែងបែបនេះបានជាធ្វើឲ្យប្រជាពលរដ្ឋ ដែលមានរថយន្តមានការសប្បាយចិត្ត និងពេញចិត្តក្នុងការយករថយន្តរបស់ខ្លួន មកត្រួតពិនិត្យលក្ខណៈបច្ចេកទេស។
ជាមួយគ្នានេះដែរ លោកវរសេនីយ៍ឯក សៅ ច័ន្ទសំណាង នាយការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តតាកែវ បានឲ្យដឹងថា ការអនុវត្តន៍ច្បាប់រឹតបន្ដឹងសុវត្ថិភាពចរាចរណ៍ផ្លូវគោកថ្មី គិតចាប់ពី ថ្ងៃទី១ ខែឧសភា ឆ្នាំ២០២០ មកដល់ថ្ងៃទី ២៤ ខែឧសភា នេះ មន្ត្រីនគរបាលចរាចរណ៍ខេត្តតាកែវ បានដាក់កម្លាំង នៅតាមគោលដៅសំខាន់ៗក្នុងខេត្តតាកែវ ដោយបានរកឃើញយានយន្តល្មើស ៣១២គ្រឿង ក្នុងនោះរថយន្តតូចធំ ៦០គ្រឿង និងម៉ូតូ២៥២គ្រឿង ៕ដោយ៖តាកែវ
