ភ្នំពេញ៖ ក្នុងរយៈពេល៤ខែ ចាប់ពីខែមករា-មេសា ឆ្នាំ២០២០នេះ កិច្ចប្រតិបត្តិការបោសសម្អាតមីន និងសំណល់ជាតិផ្ទុះពីសង្គ្រាម អង្គភាពស៊ីម៉ាក់ បានបោសសម្អាតផ្ទៃដីចម្ការមីន និងចម្ការ គ្រាប់បាន ប្រមាណជិត៣០គីឡូម៉ែត្រក្រឡា រុករកឃើញនិងកម្ទេចចោលសំណល់ជាតិផ្ទុះពីសង្គ្រាមគ្រប់ប្រភេទជិត១៤.០០០គ្រាប់។
ឯកឧត្តមហេង រតនា អគ្គនាយកស៊ីម៉ាក់ បានសរសេរលើហ្វេសប៊ុក នៅថ្ងៃទី២៥ខែឧសភានេះថា លទ្ធផលប្រតិបត្តិការរបស់អង្គភាពស៊ីម៉ាក់រយៈពេល៤ខែ (១ មករា-៣០ មេសា ២០២០)និងផែនការឆ្ពោះទៅមុខក្នុងឆ្នាំ២០២០។
ឯកឧត្តម បានបន្តថា បើទោះបីជាជំងឺឆ្លងកូវីដ១៩ បានគំរាមកំហែងខ្លាំងក្លាយ៉ាងណាក៏ដោយ ក៏ក្នុងរយៈពេល៤ខែ (មករា-មេសា ឆ្នាំ២០២០)នេះ កិច្ចប្រតិបត្តិការបោសសម្អាតមីន និងសំណល់ជាតិផ្ទុះពីសង្គ្រាម របស់អង្គភាពស៊ីម៉ាក់ បានប្រព្រឹតិ្តទៅដោយរលូន និងបានទទួលលទ្ធផលគួរជាទីមោទនៈ។
ជាលទ្ធផល អង្គភាពស៊ីម៉ាក់ បានបោសសម្អាតផ្ទៃដីចម្ការមីន និងចម្ការ គ្រាប់បាន ប្រមាណជិត៣០គីឡូម៉ែត្រក្រឡា រុករកឃើញនិងកម្ទេចចោលសំណល់ជាតិផ្ទុះពីសង្គ្រាមគ្រប់ប្រភេទជិត១ម៉ឺន៤ពាន់គ្រាប់ (ជិត១៤.០០០គ្រាប់) និងឆ្លើយតបសំណើសុំ អន្តរាគមន៍ បន្ទាន់បានចំនួន១.១៨៤ករណី ។ ទន្ទឹងនឹងនេះលទ្ធផលការងារអប់រំយល់ដឹង ពីមីនបានចំនួន៦.០៣០លើក មានអ្នកចូលរួមសរុប៥៣៧.៨៤៥នាក់ ហើយការស្រាវជ្រាវព័ត៌មានចំការមីន/គ្រាប់ និងការងារហ្វឹកហ្វឺនក៏សម្រេចបានលទ្ធផលគួរឱ្យកត់សម្គាល់ផងដែរ។
បើប្រៀបធៀបលទ្ធផលនេះ ជាមួយផែនការប្រចាំឆ្នាំ២០២០ ឃើញថា អង្គភាពសម្រេចបានប្រមាណ៣៥% នៃផែនការហើយ។ ផែនការបន្តគឺសំដៅសម្រេចផែនការសរុបមានចំនួនជាង៨១គីឡីម៉ែត្រក្រឡា ហើយបើលទ្ធភាពពង្រីកកម្លាំងអាចដំណើរទាន់ពេលវេលា និងសម្រេចបាន១១២គីឡូម៉ែត្រក្រឡា៕
ដោយ៖កូឡាប
