មេដឹកនាំហុងកុងអ្នកស្រី Carrie Lam នៅថ្ងៃអង្គារនេះបានធ្វើការបញ្ជាក់បន្ថែមថា សំណើរច្បាប់សន្តិសុខជាតិនឹងមិនប៉ះពាល់ដល់សិទ្ធិ និងសេរីភាពហុងកុងឡើយ។
ការបញ្ជាក់របស់អ្នកស្រីកើតឡើងក្រោយពេលមានការព្រួយបារម្ភ អំពោះច្បាប់ថ្មីដែលស្នើដោយទីក្រុងប៉េកាំង។ អាមេរិចបានព្រមានដកហូតសិទ្ធិពាណិជ្ជកម្មពិសេសចេញពីហុងកុង បើចិនអនុម័តច្បាប់នោះ ដើម្បីគ្រប់គ្រងហុងកុង។
អ្នកស្រី Carrie Lam និយាយថា ក្តីកង្វល់ទាំងនោះត្រូវចាំមើលសេចក្តីលម្អិតនៃសេចក្តីស្នើច្បាប់សិន។
សូមបញ្ជាក់ថា កាលពីសប្តាហ៍មុន ទីក្រុងប៉េកាំងបានដាក់ស្នើច្បាប់សន្តិសុខជាតិសម្រាប់ទីក្រុងហុងកុងដែលច្បាប់នោះមានគោលបំណងដោះស្រាយបញ្ហាការធ្វើអបគមន៍ ការបះបោរ និងសកម្មភាពភេរវកម្ម ហើយគេអាចនឹងឃើញចិនបង្កើតភ្នាក់ងារស៊ើបការណ៍នៅក្នុងទីក្រុងហុងកុង។
មេប៉ូលិសនៅហុងកុងបានថ្លែងកាលពីថ្ងៃអាទិត្យកន្លងទៅថា សកម្មភាពភេរវកម្មដែលគំរាមកំហែងសន្តិសុខជាតិ កំពុងតែកើតច្រើនឡើងនៅក្នុងទីក្រុង។ ការថ្លែងដូចនេះកើតឡើង ក្រោយពេលបាតុករហុងកុងរាប់ពាន់នាក់ បានធ្វើការតវ៉ាតាមដងផ្លូវប្រឆាំងនឹងច្បាប់សន្តិសុខ។
ទីក្រុងហុងកុង ត្រូវបានអង់គ្លេសប្រគល់ទៅអោយចិនវិញក្នុងឆ្នាំ ១៩៩៧ក្រោមកិច្ចព្រមព្រៀងផ្តល់ស្វ័យភាព និងសិទ្ធិសេរីភាពដល់ទីក្រុងនេះសម្រាប់រយៈពេល ៥០ឆ្នាំ។ ការទទួលបានសិទ្ធិស្វ័យភាពពិសេសរបស់ទីក្រុងហុងកុង ក៏មានចែងក្នុងច្បាប់អាមេរិចដែរ៕
អត្ថបទប្រែសម្រួលដោយ៖ សុភ័ក្រ
ប្រភព៖ Reuters