តាកែវ៖ សំណង់ធ្វើជិតរួចរាល់ទៅហើយ អាជ្ញាធរខេត្តតាកែវទើបចុះមកឃាត់ សង្ស័យមានភ្លើងខៀវ ហើយទើបធ្វើលើដីប្រឡាយសាធារណៈរបស់រដ្ឋ បានយ៉ាងស្រួលបែបនេះ ។
ប្រជាពលរដ្ឋនៅក្នុងភូមិ១ សង្កាត់រកាក្នុង ក្រុងដូនកែវ ខេត្តតាកែវ បាននាំគ្នានិយាយថា សំណង់រឹងមួយបាននិងកំពុងសាងសង់រំលោភយកដីប្រឡាយ មកក្រោយរាប់សិបម៉ែត្រ តែមិនមានការអើពើពីសំណាក់អាជ្ញាធរ ឬសមត្ថកិច្ចជំនាញពាក់ព័ន្ធឡើយ លុះមានការចេញផ្សព្វផ្សាយតាមបណ្តាញសង្គមហ្វេសប៊ុក ទើបលេចឮដំណឹងថា អាជ្ញាធរក្រុងដូនកែវដែលដឹកនាំលោកប៉ាន ភារៈ ធ្លាប់ចុះមកហាមឃាត់ ២ដងរួចមកហើយ តែម្ចាស់ផ្ទះហាក់បីដូចជាមិនខ្លាចរអា ឬបញ្ឈប់សកម្មភាពសាងសង់ឡើយ សង្ស័យមានភ្លើងខៀវពីអាជ្ញាធរខេត្ត ។
សូមបញ្ជាក់ផងដែរថា កាលពីពេលថ្មីនេះនៅថ្ងៃទី ២៨ ខែឧសភា ឆ្នាំ២០២០ អាជ្ញាធរខេត្តតាកែវ ដឹកនាំដោយលោកម៉ឹង វុទ្ធី អភិបាលរងខេត្ត បានចុះទៅធ្វើការហាមឃាត់ហើយ ហើយបានបញ្ជាក់ថាសំណង់នេះ គឺមិនទាន់មានច្បាប់សាងសង់នោះទេ ។
ប្រជាពលរដ្ឋរស់នៅទីនោះ រង់ចាំមើលថា ការសាងសង់ចូលដីប្រឡាយដោយគ្មានច្បាប់សាងសង់នោះ តើរដ្ឋបាលខេត្តតាកែវ មានវិធានការបែបណាបន្ត បើសាងសង់បាន ជិត ៧៥ភាគរយទៅហើយ តើគួរវាយកម្ទេចចោលឬទុកឲ្យលួចសាងសង់បន្តទៀត នេះជាការលើឡើងពីមតិប្រជាពលរដ្ឋ ដែលលោក ហាក់បីដូចជាអស់ជំនឿលើចំណាក់ការរបស់អាជ្ញាធរ ខណៈការសាងសំណង់លើដីប្រឡាយ លើដីរបស់រដ្ឋនៅក្នុងខេត្តតាកែវ អាចសាងសង់បានដោយសេរី ទាំងដែលគ្មានការអនុញ្ញាតពីជំនាញសុរិយោដី ៕
ដោយ៖តាកែវ