ភ្នំពេញ៖ កម្លាំងនគរបាលប៉ុស្តិ៍បង្ក្រាបបានស្ត្រីជនសង្ស័យម្នាក់ និងដកហូតគ្រឿងញៀនជិតកន្លះគីឡូ ក្រោយពីធ្វើការស្រាវជ្រាវ លុះព្រឹកឡើងមកឆែកឆេរត្រួតពិនិត្យផ្ទះជនសង្ស័យ នាព្រឹកថ្ងៃទី៣០ ខែ ឧសភា ឆ្នាំ ២០២០ នៅចំណុចផ្ទះគ្មានលេខ ផ្លូវលំ ស្ថិតនៅភូមិព្រែកតាគង់២ សង្កាត់ចាក់អង្រែលើ ខណ្ឌមានជ័យ ។
លោក អ៊ុំ រតនា នាយប៉ុស្តិ៍នគរបាលចាក់អង្រែលើ ខណ្ឌមានជ័យ បានឲ្យដឹងថា មុនកើតហេតុកាលវេលាម៉ោង១និង៣០នាទីរំលងអធ្រាត្រឈានចូលថ្ងៃទី៣០ ខែ ឧសភា ឆ្នាំ២០២០ កម្លាំងនគរបាលប៉ុស្តិ៍ល្បាត ដើម្បីបង្ការបទល្មើសក្នុងមូលដ្ឋាន ក្រោយមកប្រទះឃើញស្ត្រីជនសង្ស័យឈ្មោះ ផែងសុខខី អាយុ ២៤ឆ្នាំ ជនជាតិខ្មែរមុខរបរ អ្នកបោសសំអាតផ្ទះ ស្នាក់នៅ ផ្ទះជួលភូមិព្រែកតាគង់៣ សង្កាត់ចាក់អង្រែលើ ខណ្ឌមានជ័យ និងជាមុខសញ្ញាជួញដូរយោងតាមការស៊ើបអង្កេតយូរហើយ រួចក៏កម្លាំងនគរបាលប៉ុស្តិ៍ធ្វើការឃាត់រកឃើញថ្នាំញៀន៣កញ្ចប់ថង់ធំ ទម្ងន់ជិនកន្លះគីឡូក្រាម នៅលើដៃស្ត្រីជនសង្ស័យ នាំមកនគរបាលប៉ុស្តិ៍ដើម្បីសាកសួរនាំ ។
នគរបាលបន្តថា លុះដល់ព្រឹកថ្ងៃទី៣០ឧសភា លោក ម៉េង វិមានតារា អធិការខណ្ឌ ក៏បានដឹកនាំចុះទៅផ្ទះស្ត្រីជនសង្ស័យ ឆែកបន្តទៀត សហការជាមួយមេភូមិ និងលោកចៅសង្កាត់ ចូលក្នុងផ្ទះគ្មានបានដកហូតវត្ថុតាងខុសច្បាប់នោះ មានតែការដកហូតសម្ភារក្នុងផ្ទះជនសង្ស័យ កង្ហា និងទូរទស្សន៍១គ្រឿង មួយចំនួនទៀត ហើយយកមកអធិការដ្ឋាន និងកសាងសំណុំរឿងបញ្ជូន ទៅតុលាការ ដើមបីចាត់ការបន្តតាមនីតិវិធីច្បាប់ ៕
ដោយ៖សហការី CEN
